2 Kurintu 7 - Ya Baru nga Tulag

¹ Ket dakayu nga patpatgec, gapu kadiyan nga nikarkari ne̍ Apu Diyus dactida, ipac tida kuma ngarudin diya amin nga makapadake̍c iya beggi winno panpanunut tida. Ket an-anayen tida lugud ya panagbiyag tida nga sililinteg, gapu ta daydayawen tida nga situtuluc nge̍ Apu Diyus.

To pakaanggemman ne̍ Pablu gapu kadito iKurintu

² Ket dakayu, agayat kayu kuma pe̍ dakami nga awan kuma iyikeb nu maigapu dakami. Awan met winangwangel mi nga dake̍c iya orey nagan na nga toley. Awan met pe̍ nariribukan iya kasasaad na gapu dakami, se̍ awan pe̍ ginundawayan mi nga orey nagan na nga toley.

³ Didi nga kinagkagic, bekken dakayu nga pabasulen. Ta agten met ito kunec: Napateg kayu nga unay dakami. Itu nga nakasagana kami nga makibiyang dakayu, orey no masapul tida nga matey, winno sibibiyag tida pekkem.

⁴ Dackel ya namnamac maigapu dakayu, se̍ napalaus pe̍ ya ragsac ku gapu dakayu. Dakayu met ya pakaliwliwaac nga pe̍yeng, ket itu nga iya orey nagan na nga pakariribukan mi, aganggem mac met pekkem.

⁵ Ket nariribuc kami ngarud itun, ta orey ito dimateng kami ennid Mase̍dunya ngin, awan imang mi. Ta orey awac nga pennan mi idi, uwed da latta pakariribukan mi gapu iya panangringgur diya duduma dakami, se̍ gapu pe̍ iya danag mi maipanggep kadiya duduma.

⁶ Ngem orey agten iyan itun, e̍ Apu Diyus met ya mamacpaanggem kadiya agladingit. Ket iya agten iyan, pinaanggem nakami nga tutu itun gapu ito inumbe̍t ne̍ Titu ennid.

⁷ Ket bekken nas nga ya inumbe̍t na ennid to nangparagsac dakami, no di pe̍ ito nipadamag na nga maipanggep dakayu iyan Kurintu. Ta niliwliwa na dakami to anggem na gapu dakayu, nga itu pe̍ kanu ya pakaliwliwaan na. Nipadamag na pe̍ ya essut nu nga makasingen iyaken manin, ket nibaga na pe̍ ya panagbabawi nu nga silaladingit ito napasamac itun. Nipadamag na pe̍ nga napasnec kayu kanu nga mangisakit iyaken. Ket itu diyan diya makapaanggem nga unay iyaken.

⁸ Ket no maipanggep ito surat ku dakayu itun, orey no pinagleddaang nakayu, madic agbabawi nga nangisurat. Ket ya kinapudnu na, lumdaang ngac met pe̍ ito nisurat ku, a. Ta emmuc nga pinagleddaang nakayu, orey bekken nga nabayag to panagleddaang nu.

⁹ Ket ita, aganggem mac pe̍, bekken nga gapu ta linumdaang kayu, no di lugud gapu ta nagbalin nga pagbabawiyan nu to leddaang nu. Ta nagladingit kayu sigun iya tarigagay ne̍ Apu Diyus dakayu, itu nga awan napirdi iya panamati nu gapu ito winangel mi dakayu.

¹⁰ Ta ya panagladingit diya toley sigun iya tarigagay ne̍ Apu Diyus, nabaru ya pagbanagan na, ta itu ya pagbabawiyan da, nga pakaisalakanan da. Ket kalpasan na, awan ladingit dan. Ngem sabali met nga gennung ya pagbanagan niya panagladingit diya bekken nga mamati idi nga lubung. Ta diya panagladingit da, itu ya mangiturung igida iya agnanayun nga patey.

¹¹ Ket no dakayu, lemlemtan nu lugud ya nabaru nga nagbanagan nu iyan nga panagleddaang nu, ta inusar met ne̍ Apu Diyus para dakayu. Ta gapu ito panagleddaang nu, agpasnec kayun iya panamati nu, se̍ napasnec kayu pe̍ nga nangipalinteg kaditun nga basbasul, se̍ napalaus to unget nu maigapu kadiyan. Napalaus met pe̍ to ansing nu gapu kadiyan, se̍ napasnec pe̍ to panagsingpet nu iyaken, se̍ to kinagaed nu. Napasnec kayu met nga mangdusa ito nakabasul. Ket gapu ka amin diyan nga winangel nun, nipanecnec nu met nga awan nga tutu pakairamanan nu itun nga dake̍c.

¹² Ket orey nagsurat tac ka agten itun, bekken met nga naipaay ito nakabasul winno to nakabasulan na. Nisurat ku lugud yan tasun mailawlawag dakayu iya imatang ne̍ Apu Diyus nga tutu ya kinapasnec nu nga agtungpal dakami.

¹³ Ket naliwliwa kami ngarudin gapu iya nabaru nga nagbanagan na. Ket bekken nas nga iyan, no di lugud napaanggem kami pe̍ gapu iya panaganggem ne̍ Titu ito pannakaliwliwa na gapu dakayu nga amin.

¹⁴ Ket ito di pekkem nawe̍ nge̍ Titu iya edyan nu, uwed nibagac igina nga panangidaydayaw ku dakayu. Ket madi yac pe̍ napaay gapu dakayu, ta pinapudnuwan nu mettin to nibagac e̍ Titu maipanggep dakayu. Ket pudnu ngarud met dito nibagac e̍ Titu, nga agten mettas kadito amin nga nibagac dakayu itun.

¹⁵ Ket imir-irut ya ayat na dakayu no malaglagip na ya kinamanagtungpal nu nga amin, se̍ ito panangsangaili nu nga sidadayaw se̍ siaannad igina.

¹⁶ Ket iyaken, aganggem mac nga unay, ta emmuc kun nga mapagtalkan kayu ka aminin.