2 Kurintu 6 - Ya Baru nga Tulag

Ya panangipanecnec de̍ Pablu nga pudnu da nga agsirsirbi e̍ Apu Diyus

¹ Ket gapu ta kabulun nakami nge̍ Apu Diyus idi nga wangel mi, ibilin mi pe̍ nga sipapasnec dakayu nga bekken nu kuma nga iyaleng-aleng ya siaayat nga asi ne̍ Apu Diyus dactida, tasun madi kuma masayang.

² Ta uwed naipadtu iya Bibliya nga kunen ne̍ Apu Diyus, “Ket ito nadatngan ya kustu nga timpu nan, nikasuc ya panagawag mu. Ket tinulungan naka iyan nga timpu, nga itu to nakaisalakanam,” kunen na. Dumngeg kayu ngarud idi nin! Nadatngan mettin ya kustu nga timpu nan. Ngarud, itu win ya timpu nga pannakaisalakan niya toley.

³ Ket dakami, agannad kami ngarud, tasun awan kuma wanglen mi nga pakaiyaw-awanan diya toley maigapu iya pammati tida, tasun awan makagi nga dake̍c maipanggep iya panagsirbi mi nga mangipakaemmu maipanggep e̍ Kristu.

⁴ Ket ya wanglen mi nga gennung, ket pe̍yeng nga ipasingen mi nga pudnu kami nga agsirsirbi e̍ Apu Diyus. Ipasingen mi yani kadiya orey nagan na nga wangwanglen mi, agten iya panaganus mi ka adu, se̍ gapu iya panangitured mi kadiya pagladladingitan mi se̍ diya pakaparparigatan nga malaklak-aman mi se̍ diya pakasikuran mi.

⁵ Ket masingen pe̍ nga pudnu kami nga agsirsirbi e̍ Apu Diyus gapu iya panangitured mi ka bacbaut, pannakaibalbalud, se̍ pannakaor-orot mi. Itured mi pe̍ ya agbannug, se̍ ya agsulap se̍ agbisin, gapu iya panagsirsirbi mi e̍ Apu Diyus.

⁶ Ket ipasingen mi pe̍ nga pudnu kami nga agsirsirbi e̍ Apu Diyus gapu iya nadalus nga panagbiyag mi, se̍ iya pannakaemmu mi maipanggep iya panamati e̍ Kristu, se̍ iya panagpasinsiya se̍ panangngaasi mi ka toley, se̍ gapu iya kauwed niya Ispiritu Santu dakami, se̍ gapu pe̍ iya napudnu nga panagayat mi.

⁷ Ket ipasingen mi pe̍ nga pudnu kami nga agsirsirbi e̍ Apu Diyus gapu iya kinapudnu niya isursuru mi, se̍ gapu iya kauwed niya pannakabalin ne̍ Apu Diyus dakami. Ket arig nga pangabac mi ka dake̍c ya panagwangel mi ka nalinteg, nga itu ya maiyarig ka panggubat nga armas se̍ kalasag mi.

⁸ Ket gapu ta pudnu nga agsirsirbi kami e̍ Apu Diyus, patgen dakami diya duduma, ngem irurumen dakami met diya duduma. Paliwen dakami ngarud diya duduma, ket idaydayaw dakami met nga gennung diya duduma. Ibilang dakami diya duduma nga mangal-allilaw, ngem agpudnu kami met latta.

⁹ Ibilang dakami nga arig nga diya di da em-emmu, orey agdindinamag kami met. Ket ibilang dakami nga arig nga isa nga agngangabit nga pe̍yeng ka pannakatey na, ngem emmu nu met nga sibibiyag kami pekkem. Ibilang dakami nga naukumin, ngem bekken kami nga napatey.

¹⁰ Ket ibilang dakami nga lumdaang, ngem naragsac kami met latta nga pe̍yeng. Ibilang dakami nga napanglaw, ngem gapu dakami, adu met diya nagbalin nga arig nga nabacnangin iya pammati da. Ket ibilang dakami nga awan bukud mi nga kukuwa idi nga lubung, ngem naipaay met dakami ya amin nga banbanag.

¹¹ Ket dakayu nga iKurintu, awan nilimed mi dakayu nga uwed iya panpanunut mi. Awan pe̍ kessay niya panangipateg mi dakayu.

¹² Awan ngarud pagkurangan niya panagayat mi dakayu. Ngem dakayu, uwed met pagkurangan nu iya panagayat nu dakami.

¹³ Ket gapu ta ibilang nakayu nga anac kun, kunec dakayu nga subalitan nu kuma ya panangipateg mi dakayu, nga awan kuma kessay niya panangipateg nu dakami.

Ya pannakibulun kadiya bekken nga mamati

¹⁴ Madi kayu kuma nga maitipun kadiya bekken nga mamati, ta bekken nga rumbeng ya agten iyan nga panagtitipun. Bekken ngarud nga rumbeng, ta madi mabalin nga agtipun ya agpaay ka nalinteg se̍ ya agpaay ka dake̍c. Ket agten pe̍ nga madi mabalin nga agtipun ya wada se̍ ya gicbet.

¹⁵ Ket madi pe̍ mabalin nga agtunus de̍ Kristu nge̍ Satanas. Ket agten pe̍ kadiya mamati e̍ Kristu, ta awan met pannakitunus da kadiya bekken nga mamati.

¹⁶ Maiyarig pe̍ yani iya te̍mplu nga pagedyanan ne̍ Apu Diyus se̍ diya bulbultu. Ta diya bulbultu, bekken da met nga tumutup iya te̍mplu ne̍ Apu Diyus. Ket ya kinapudnu na, dactida met ya te̍mplu nga paged-edyanan niya sibibiyag nga Diyus! Itu met to nibaga ne̍ Apu Diyus itun nga kinunen na, “Igida nad ya pagedyanac, ket makibulubulun nac nad igidan. Ta iyaken nad ya daydayawen da nga Diyus da, ket igida ya ibilang ku nga toley ku,” kunen na.

¹⁷ Ket kunen pe̍ niya Apu, “Itu nga sumina kayu ngarud kadiya toley nga ibilang ku nga dake̍c, tasun maiduma kayu igida. Ket madi kayu makitipun kadiya agten iyanin. Ket iya agten iyan, annamungan nakayu nad met.

¹⁸ Ket iyaken ya agbalin nga Ama nun, ket dakayu nga lalaki se̍ babey, dakayu diya an-anac kun, kunen niya Apu nga Mannakabalin ka amin.” kunen na.