2 Kurintu 5 - Ya Baru nga Tulag

¹ Ket madi kami ngarud makumsa kadiya pakarigrigatan mi. Ta emmu mi nga orey no matey tida, se̍ mapirdi didi nga beggi tida, nga arig ngas nga bawi diya biyag tida idi nga lubung, ket emmu mi ngarud nga sukatan nad ne̍ Apu Diyus ka madi matey nga beggi no uwed tida ka langitin. E̍ Apu Diyus mettas ya paggayatan niyan nga agnanayun nga beggi nga maiyarig ka baley nga bekken nga inariman toley.

² Ket bayat niya kauwed tida pekkem idi nga lubung, matoran tida ngas, ta padpadaanan tida ya pannakasukat didi nga beggi tida ka beggi nga agtaud ka langit.

³ Dikad pe̍ masukatan nad diya beggi tida nga idi nin. Ket iya agten iyan, uwed manin beggi tidan.

⁴ Ta bayat niya kauwed tida pekkem idi nga naiyarig nga bawi niya biyag tida, agrigrigat tida pekkem. Matoran tida ngarud, ngem bekken nga ya pannakaipac didi nga beggi tida ya tartarigagayan tida, no di lugud ya pannakasukat da ka kabarbaru, tasun didi nga beggi tida nga uwed pannakatey na, masukatan ka beggi nga agbiyag ka agnanayun.

⁵ Ket e̍ Apu Diyus met ya nangisagana dactida para iyan nga maariman nad mettas. Ket ne̍cde̍ na pe̍ ya Ispiritu na dactida, nga itu ya mangpatalged nga maipaay nad nga tutu dactida diyan.

⁶ Itu nga natalged nga pe̍yeng ya panpanunut mi. Ket emmu mi nga bayat niya kinauwed pekkem didi nga beggi mi, madi kami pekkem nga makipagedyan iya Apu iya edyan na.

⁷ Ta ita, panamati ngas met maipanggep iya pannakaitipun tida nad igina ya pagnamnamaan mi iya panagbiyag mi, ta madi tida pekkem masingen.

⁸ Natalged ngarud ya panpanunut mi, ket gabgabay mi ya pumanaw kuma kadidi nga beggi mi, tasun mawe̍ kami kuma makipagedyan iya Apu win.

⁹ Ngem orey no uwed kami pekkem idi nga beggi, winno uwed kami iya edyan niya Apu win, ket panggep mi met latta ya mangay-ayu igina.

¹⁰ Ta uwed nad met pannakaisangu tida nga amin e̍ Kristu iya tugew nga pangukuman na. Ket awaten nad niya tunggal isa dactida ya maitutup igina, sigun iya winangel tida ito sibibiyag tida pekkem idi nga lubung, nabaru man winno dake̍c.

Ya banag niya panagsirsirbi dito apustule̍s

¹¹ Dikad gapu ta emmu mi ya mansing iya Apu, aw-awisen mi ngarud diya toley, tasun agtungpal da kuma pe̍ yin igina. Ket e̍ Apu Diyus, emmu na met ya kinapudnu diya pangpanggep mi, ket namnamaec nga emmu nu pe̍ yin diya napudnu nga pangpanggep mi.

¹² Bekken met nga panangipasindayaw mi manin yani nga kunen mi dakayu. Ngem isurat mi lugud didi tasun madi kayu kuma nga malyew kadiya toley gapu dakami, no di lugud emmu nu kuma ya nabaru nga maisungbat nu nga sitatalged maipanggep dakami kadiya agpaspasindayaw. Igida diyan diya mangipasindayaw gapu ngas kadiya masingen nga banbanag nga maar-ariman da, nga bekken nga gapu kadiya napudnu nga panggep nga madi masingen.

¹³ Ket no uwed da agkunen nga agellut kami kanu gapu iya panangisursuru mi, ket mabalin, a. Ngem orey a, ta agpaay kami met latta e̍ Apu Diyus. Ket no nabaru kanu ya panpanunut mi, mayat met pe̍, ta agpaay kami met iya pannakatulung nu.

¹⁴ Ta madagdag kami iya panagsirbi mi e̍ Kristu, gapu iya pannakaawat mi iya panagayat na dakami. Ta napanecnekkan min nga natey nge̍ Kristu nga is-isa para kadiya amin nga toley. Ket itu ya gapu na nga naibilang nga natey pe̍ yin diya amin nga toley.

¹⁵ Ket yan nga isa nga natey, natey ngarud nga maipaay iya paglaingan diya amin nga toley. Ket itu nga diya amin nga sibibiyag gapu igina, madi da kuma agtungtungpalin kadiya bukud da mettas nga tartarigagay, no di lugud agpaay dan iya tarigagay ne̍ Kristu win. Ta igina met ya natey se̍ napagungar para dactida.

¹⁶ Dikad pe̍ manipud ita, madi kami ibilang nga ya kasasaad niya kinatoley niya orey nagan na nga toley ya napateg gin. Ket orey no ya kinatoley ne̍ Kristu ya nibilang mi nga napateg itun, sabali yin ya panpanunut mi maipanggep iginan.

¹⁷ Ket agten iyan met pe̍ ya panangibilang niya orey nagan na nga toley nga maitipun e̍ Kristu. Ta ya toley nga maitipun e̍ Kristu, maiyarig nga kabarbaru nga parsuwa ngin. Ket nabaliwanin dito daan nga panpanunut na ka kabarbaru nga panpanunutin.

¹⁸ Ket amin didi nga panagbalbaliw tida, nagtaud da e̍ Apu Diyus. Igina pe̍ ya nangitunus dactida igina mettas gapu e̍ Kristu. Igina pe̍ ya nangitalec dakami idi nga panagsirbi mi nga mangipakaemmu iya panangitunus na kadiya toley igina.

¹⁹ Ket ya kayat mi nga kagiyen, agten idi: Ya panangitunus ne̍ Apu Diyus kadiya toley igina, ket gapu ito winangel ne̍ Kristu. Ket gapu ito winangel ne̍ Kristu, awan ibilang ne̍ Apu Diyus nga basul dan. Ket nitalec na pe̍ dakami ya panangisuru mi maipanggep iyan nga panangitunus na kadiya toley igina.

²⁰ Ngarud, dakamin ya ebbon ne̍ Kristu nga mangibegbeggi igina kadiya toley yin. Ket gapu dakami, awisen ne̍ Apu Diyus diya toltoley. Itu nga gapu ito winangel ne̍ Kristu win, aw-awisen dakayu nga awaten nu kuma ngarudin ya e̍cde̍ ne̍ Apu Diyus nga pakaitunusan nu igina.

²¹ Ta gapu dactida, pinagbalin ne̍ Apu Diyus nge̍ Kristu nga nadusa gapu ka basul, orey awan met pulus basul na. Agten iyan ya winangel na, tasun gapu iya pannakaitipun tida e̍ Kristu, agbalin tida nga napalinteg, nga agten mettas iya kinalinteg ne̍ Apu Diyus.