2 Kurintu 4 - Ya Baru nga Tulag

Ya namnama diya agsirsirbi e̍ Kristu

¹ Ket gapu iya panangaasi ne̍ Apu Diyus dakami, nitalec na dakami yani nga panagsirbi mi nga mangipakaemmu maipanggep e̍ Kristu. Itu nga madi kami makumsa iya panagsirbi mi,

² no di lugud inadeyyuwan mi ngasin diya pampamaayen nga sinisikap, se̍ diya nakal-alyew. Ket se̍ adeyyuwan mi pe̍ yin ya mangallilaw ka toley iya panursuru mi, se̍ madi kami met sabaliyan ya banbanag niya kagi ne̍ Apu Diyus. Ngem ya pamaayen mi nga gennung, itarus mi lugud ya pudnu, nga awan ilinglinged mi. Ipasingen mi kadiya amin nga toley ya napudnu nga panggep mi, tasun mamati da kuma. Ket emmu pe̍ ne̍ Apu Diyus nga tutu yani.

³ Ngem no uwed da toley nga nalingdan ya pannakaawat da maipanggep iya Makaparagsac nga Damag nga isursuru mi, ket itu diyan diya toley nga agturung iya pakapukawan da.

⁴ Ket diyan nga madi mamati, sinikapan niya diyus da nga agturay idi nga timpu. Ta arig nga kinulap na da tasun madi da makasingen iya wada. Itu ya gapu na nga madi da maawatan ya kinapateg niya Makaparagsac nga Damag maipanggep iya kinadayaw ne̍ Kristu, nga igina ya pakasingnan e̍ Apu Diyus.

⁵ Ket ya ikaskasaba mi, bekken met nga maipanggep iya kinadayaw mi, no di lugud maipanggep iya kinaApu ne̍ Je̍su Kristu. Ket dakami, agsirsirbi kami dakayu gapu e̍ Je̍sus.

⁶ E̍ Apu Diyus ya nagkunen itun nga, “Lumtuwad kuma ya wada iya gicbet,” kunen na. Ket igina mettas ya arig nga nangpawada kadiya panpanunut mi, tasun ipasingen mi nge̍ Kristu dakayu. Ket itu ya pakaemmuwan mi iya kinadayaw ne̍ Apu Diyus.

⁷ Ket dakami ya nangitalkan ne̍ Apu Diyus idi nga napateg nga banbanag maipanggep iya Makaparagsac nga Damag. Ket dakami, arig nga kadawyan nas nga banga nga napayan ka napateg nga unay nga gameng. Agten kami ngarud iyan, tasun maipasingen nga bekken nga dakami ya tumaudan nidi nga kangatuwan nga pannakabalin, no di ngas e̍ Apu Diyus.

⁸ Ket dakami, naparigatan kami nga pe̍yeng, ngem bekken kami nga naabakan. No duduma, mariribukan kami, ngem madi kami latta makumsa.

⁹ Mairurumen kami pe̍ no duduma, ngem orey a, ta madi nakami nga baybay-an nge̍ Apu Diyus. Pasaray makabkabil kami, ngem agbiyag kami pekkem.

¹⁰ Ket ya kasasaad mi, narigat ngarud, ta arig nga pe̍yeng nga masingen kadiya beggi mi ya agten mettas nga panagrigat ne̍ Je̍sus ito pannakatey na. Ket napasamac diyan dakami tasun ya pannakabalin niya biyag ne̍ Je̍sus kuma ya masingen kadiya beggi mi.

¹¹ Ta bayat mi nga agbibiyag pekkem, pe̍yeng nga maipusta diya beggi mi ka pannakatey, gapu iya panagsirbi mi e̍ Je̍sus. Ket maipalubus diyan tasun masingen kuma kadiya uwed pannakatey na nga beggi mi ya pannakabalin niya biyag ne̍ Je̍sus.

¹² Dikad pe̍ iya agten iyan, kabulun mi nga pe̍yeng ya patey gapu iya panagsirbi mi e̍ Je̍sus. Ngem orey agten iyan a, ya panagrigat mi, ta itu mettas ya paglaingan nu nga pakae̍cdanan nu ka biyag.

¹³ Ket agten kami met pe̍ ito naisurat iya Bibliya nga kunen na, “Sipapati yac e̍ Apu Diyus, itu nga nikagkagic pe̍ ya panamatic,” kunen na. Ket no dakami, agten iyan met pe̍ ya banag niya panamati mi. Ta mamati kami pe̍, ket itu met ya ibagbaga mi.

¹⁴ Ta emmu mi met nga e̍ Apu Diyus nga nangpaungar e̍ Apu Je̍sus, igina met pe̍ ya mangpaungar nad dactida, gapu iya pannakairaman tida e̍ Je̍sus. Ket dakami se̍ dakayu, iyadenni nactida nad nge̍ Apu Diyus igina mettas.

¹⁵ Ket amin didi nga pakaparparigatan mi, paglaingan nu da met. Ta gapu iya siaayat nga asi ne̍ Apu Diyus, umad-adu kuma diya kaasiyan ne̍ Apu Diyus nga agyaman igina. Ket iya agten iyan, mapadayawan ngarud nge̍ Apu Diyus.

Ya panagbiyag diya agsirsirbi e̍ Kristu

¹⁶ Itu yan ya gapu na nga madi kami makumsa iya panagsirbi mi. Ket ya kinapudnu na, orey no kumapkapsut diya beggi mi, inalgew met nga mapabileg diya panpanunut mi.

¹⁷ Ta amin didi nga pakaparparigatan mi, bekken da nga nadagsen winno agnanayun. Ket itured mi ngasin, gapu iya panagnamnama mi iya kinadayaw nga mae̍cde̍ nad dakami gapu iya panangitured mi kadidi nga pakaparparigatan mi ita. Ket iyan nga kinadayaw, madi ngarud agpatingga se̍ awan kapada na.

¹⁸ Ta bekken nga diya masingsingen idi nga lubung ya laglagipen mi, no di lugud diya di masingen nga banbanag. Ta diya masingen nga banbanag, ket agpatingga da nad mettas. Ngem diya madi masingen nga banbanag, ket agnanayun da met.