2 Kurintu 2 - Ya Baru nga Tulag

¹ Ket itu nga madi yac inumbe̍t nga simacwar iyanin, ta madic gabay no pakapaldaangan nu manin ya panangsacwar ku dakayu.

² Ta no paldaangan nakayu, nagan ngarud pe̍ ya mangparagsac iyaken nin? Ta dakayu mettas ya namnamaec nga pakaragsakac. Ket kumaan na ya panangparagsac nu iyaken no lumdaang kayun?

³ Itu ya gapu nito panagsurat ku dakayu itun, ta gabay ku no mapalinteg kuma nga mona itun diya nangpaldaang iyaken. Agten iyan ngarud, ta di yac gabay ya umbe̍t tac mapaldaangan gapu dakayu ita, no di gabay ku lugud no paanggemmen dac kuma. Ket emmuc met nga ya makapaanggem iyaken, itu pe̍ ya paganggemman nu.

⁴ Ket ito panagsurat ku dakayu itun, napalaus ya pannakariribuc se̍ leddaang ku gapu dakayu. Nakaluwa ngac met pe̍ itun nga panagsurat ku dakayu. Ket ya nisurat ku nga iyan, bekken ku nga nisurat tasun paldaangen nakayu, no di lugud gabay ku nga maemmuwan nu kuma ya napalaus nga panagayat ku dakayu.

Ya panangpakawan kuma dito taga-Kurintu ito nakabasul

⁵ Ket to toley iyan nga nangariman ka makapaldaang, bekken nas nga iyaken ya pinaldaangan na, no di lugud pe̍ dakayu nga amin. Agten nas iyan ya ibagac kun ita, ta madic gabay nga surukan ya panangilbec tida igina.

⁶ Kustu mettin ya pannakadusa na gapu iya panagmadi diya kaaduwan iya bungguy nu iginan.

⁷ Itu nga pakawanen nu lugudin, se̍ liwliwaen nu pe̍, ta kaynun no maaminan ka namnama gapu iya napalaus nga leddaang na.

⁸ Dikad pe̍ ibilin ku nga sipapasnec dakayu nga ipasingen nu kuma lugud manin ya ayat nu igina.

⁹ Ket pangsintir ku met dakayu to nisurat ku itun, ta emmuwec kuma no managtungpal kayu nga tutu iya pamagbagac.

¹⁰ Ket maemmuwan nu kuma nga no uwed pakawanen nu iyan, basta napakawan ku pe̍ yin. Ngarud, no uwed masapul ku nga pakawanen nga kabulun nu iyan, pakawanec ngarud iya imatang ne̍ Kristu, maigapu mettas iya paglaingan nu.

¹¹ Ket iya agten iyan, pakawanec ngarud yan nga nakabasul iya edyan nu, tasun awan kuma gundaway ne̍ Satanas dactida. Ta emmu tida ngarud diya dake̍c nga pangpanggep ne̍ Satanas.

Maiyarig ka nabangug ya panangipakaemmu e̍ Kristu

¹² Ket ito nawe̍ yac ka Truwas tasun mangikasaba ngac iya Makaparagsac nga Damag maipanggep e̍ Kristu, nadateng ku ya gundaway ku antuni nga nangariman iya nangibonan niya Apu iyaken.

¹³ Ngem madi met nagtalna ya panpanunut ku, ta panggep ku ya sumabet kuma e̍ kabsat tida nga Titu, ngem awan met. Itu nga nagpakada ngac kadito toley antuni, se̍ yac inumbe̍t ennid Mase̍dunya ngin.

¹⁴ Ngem agyaman nac latta e̍ Apu Diyus, ta igina ya mangidaldalan dakami nga sibaballaigi, gapu iya pannakaitipun tida e̍ Kristu. Ket se̍ dakami ya usaren ne̍ Apu Diyus iya pannakaiwaragawag niya damag maipanggep e̍ Kristu kadiya amin nga lugar. Ket idi nga damag maipanggep e̍ Kristu, arig nga nabangug nga ellab.

¹⁵ Ket iya agten iyan, dakami ya maiyarig iya pagedyanan niya nabangug nga ellab nga tumaud mettas e̍ Kristu. Ket ya panangiwaragawag mi maipanggep e̍ Kristu idi nga lubung, itu ya maiyarig iya panagwaras niyan nga ellab kadiya toley nga naibilang nga maisalakan, se̍ orey pe̍ kadiya naibilang nga mapukaw.

¹⁶ Ket diya toley nga madi da emmu ya panangisalakan ne̍ Apu Diyus, dake̍c igida yan nga ellab, ta itu ya ellab niya pakatayan da. Ngem diya toley nga makaemmu win iya panangisalakan na igida, ket nabaru met igida yan nga ellab, ta itu ya ellab niya pakabiyagan da. Ay, masdaaw wac. Ta emmuc nga awan sigud nga kabaellan mi idi nga panagsirbi mi e̍ Apu Diyus. Ta awan toley nga maikari idi!

¹⁷ No dakami, bekken kami met nga agten kadiya duduma nga mangipacpakaemmu maipanggep e̍ Apu Diyus nga panguwartaan da ngas ya panangasaba da. Ta dakami, gapu iya pannakaitipun mi e̍ Kristu, mangasaba kami sigun iya panangibon ne̍ Apu Diyus dakami. Napudnu ngas met ya panggep mi, ket e̍ Apu Diyus met ya mangsipsiput dakami.