2 Kurintu 12 - Ya Baru nga Tulag

Diya nipakaemmu niya Apu e̍ Pablu

¹ Ay-ay! Masapul kidin nga ituluy ku ya panagpasindayaw kun. Orey awan lugud pagsirbiyan niya panagpasindayaw, ket ibagac pekkem mas to nipasingen se̍ nipakaemmu niya Apu iyaken.

² Ket agten idi to napasamac iyaken: Uwed emmuc nga toley nga isa nga makitiptipun e̍ Kristu. Ket yan nga toley, naipangatu met itun iya pagedyanan iya ngudu nga maawagan ka maikatlu nga langit. Napalabes ya sangapulu ket eppat nga dagunin nanipud ito napasamac yan. Madi yac emmu no sibebeggi nga naalac winno bekken yan nga toley itun. E̍ Apu Diyus ngas ya makaemmu.

³ Ya emmuc ngas, ket basta naalac yan nga toley ito lugar nga maawagan pe̍ ka Paraisu. Ngem madic met emmu no sibebeggi nga naalac winno bekken. E̍ ngas Apu Diyus ya makaemmu iyan.

⁴ Ket iyan nga toley, uwed nagicgicna na antuni nga madi mabalin niya toley nga ipatarus, se̍ madi maipalubus nga kagiyen niya toley.

⁵ Ket no maipanggep iya napasamac iya agten iyan nga toley, mabalin ku nga ipasindayaw. Ngem no maipanggep iya bukud ku nga kabaellan, madic ipasindayaw, malacsid no maigapu ngas kadiya naibilang nga pagkapsutac.

⁶ Ngem iyaken, no gabay ku kuma ngas ya agpasindayaw, bekken nac nga arig nga isa nga buwakaw. Ta no agpasindayaw wac kuma, pudnu was met diya ikagkagic nga pagpasindayaw ku. Ngem madic gabay ya agpasindayaw, ta madic gabay no uwed da mangpadayaw iyaken gapu was iya makagic maipanggep iya beggic. Diya napaw-is nga masingen se̍ magicna da mettas iyaken, didi kuma ngas ya lagipen dan.

⁷ Ket gapu ta uwed adu nga nakaskasdaaw nga nipaspasingen ne̍ Apu Diyus iyaken, kaynun no tumangsit tac. Itu nga nipalubus ne̍ Apu Diyus nga e̍cdan nac nge̍ Satanas ka sakit ku, nga itu ya arig nga rasi nga uwed iya sebbit ku nga mamarigat iyaken, tasun di yac kuma gabay ya mangipasindayaw kadiyan nga napasamac iyaken.

⁸ Ket name̍tlu win nga nikarkararag ku iya Apu tasun ipac na kuma yani nga sakit ku.

⁹ Ngem agten idi to sungbat na iyaken: “Umdas mettin ya siaayat nga asi nga itulung ku ikew iya panangitured mu. Ta ya kinakapsut niya toley, itu ya kangrunaan nga gundaway niya pannakabalin ku.” Dikad pe̍ ya kinakapsut ku, itu lugud ya ibilang ku nga napatpateg nga pagpasindayaw ku. Ta gapu iya kinakapsut ku, ket ya pannakabalin ne̍ Kristu ya mangtulung iyaken.

¹⁰ Ket iya agten iyan, gapu iya panagsirsirbic e̍ Kristu, pakaragsakac ngas met diya pagkapsutac, se̍ diya pakaiyal-alyewwac se̍ diya pakarigrigatac se̍ pakairurumnac se̍ diya pagladladingitac. Ta emmuc nga ya pagkapsutac, ket itu met yan ya pakapabilgac.

Ya panagayat ne̍ Pablu kadito iKurintu

¹¹ Ay! Arig gac ngarud nga isa nga agkurang ya panpanunut na, gapu kadiyan nga kinunec. Ngem napilit tac met gapu dakayu. Ta dakayu kuma ya mangipadayaw nga gennung iyaken. Ngem madi kayu met, itu nga napilit tac nga nangibaga. Ta orey no awan kuma sirsirbic, bekken nac met nga nababbaba ngem kadito nakaturturay kanu nga apustule̍s, iya orey nagan na.

¹² Ngarud, ito kauwed ku iyan nga edyan nu, nasingen nu met dito pammanecnec niya kinaapustul ku. Ta nasingen nu dito winangel ku nga siaanus nga unay ito uwed dac iyan nga edyan nu itun, agten kadiya pagilasinan iya turay ku, se̍ diya nakaskasdaaw se̍ diya mangipasingen iya pannakabalin ne̍ Apu Diyus.

¹³ Ket ya tinungpal ku dakayu, agten met pe̍ iyan to tinungpal ku kadito duduma nga bungguy diya mamati, malacsid nga madi nakayu pinarparigat ka kasapulac ka pagbiyag. Ket no basul yan, pakawanen dac ngarud, a!

¹⁴ Ket ita, nakasagana ngac nga umbe̍t manin iya maikatlu nga isasacwar ku dakayu. Ket panggep ku manin nga madi nakayu parigaten ka kasapulac no sacwaran nakayu manin. Ta bekken nga ya sanicwa nu ya ipatpateg ku, no di lugud dakayu mettas. Ket rumbeng ngarud met yan nga panpanunut, ata arig kayu nga anac ku. Ket emmu tida nga bekken nga diya anac ya mangistimar kadiya naganac igida, no di lugud diya makin-anac ya mangistimar kuma kadiya anac da.

¹⁵ Ket pagragsakac met ya panangipaay ku iya orey nagan na nga uwed iyaken para iya paglaingan nu, agraman pe̍ ya biyag ku. Ket iya agten iyan, lumallalu ngarud ya panangipateg ku dakayu. Ngem di ngarud nasipar no ume̍t-e̍teng nga gennung ya panangipateg nu iyaken?

¹⁶ Ket orey emmu nu nga tutu nga di nakayu pinarigat ka kasapulac, uwed da kanu latta mangunen nga nalaing ngac kanu nga agsikap, ket naallilaw nakayu kanu iya kinasikap ku.

¹⁷ Ngem ape̍ makagi da ya agten iyan? Uwed kad panangsikap ku dakayu gapu kadito nibon ku iya edyan nu?

¹⁸ Iyaken mettas ya nangdagdag e̍ Titu nga mawe̍ iyan. Se̍ iyaken ya nangibon ito kabulun na nga isa nga kabsat tida. Sinikapan nakayu kad nge̍ Titu itun? Di ngarud agpada kami nge̍ Titu ka panggep? Se̍ di ngarud pe̍ agpada kami ka ugali?

¹⁹ Kaynun no pagarupen nu nga nilawlawag mi diyan dakayu tasun ikalinteggan mi kuma ya beggi mi dakayu. Ngem bekken met! Ta gapu iya pannakaitipun mi e̍ Kristu, natalged kami nga mangibaga kadidi, orey iya imatang mettas ne̍ Apu Diyus. Ket amin didi nga panangilawlawag mi dakayu nga patpatgec nga taga-Kurintu, ilawlawag mi met tasun mapabileg kuma ya panamati nu.

²⁰ Ta madanagan nac, nga no makadateng ngac nad iya edyan nun, kaynun no ya nakem nun, sabali iya namnamaec dakayu. Ket no agten iyan, ya nakem ku, sabali ngarud nad pe̍ yin iya namnamaen nu iyaken. Ta kaynun no uwed nad madatngac nga panagsusuway nu se̍ panagiinnimun nu, se̍ siuuyung nga panagiinnunget nu, se̍ panagsisinnupyat nu, winno kaynun no uwed nad panagpipinnadake̍c nu se̍ panagiinnamis nu, winno panagpaspasindayaw nu, se̍ panagkusu nu.

²¹ Madanagan nac ngarud maipanggep idi nga isasacwar ku manin dakayu. Ta kaynun no paalyewwen nac ya Diyus ku maigapu dakayu, no mapaladingit tac nad gapu kadiya adu nga nakabasul iyan. Ta kaynun no madi da pekkem babawiyen dito dake̍c nga ugali da, nga agten iya pannakikamalala, se̍ ya panagtungtungpal da kadiya naalas nga ricricna niya beggi da.