2 Kurintu 11 - Ya Baru nga Tulag

Diya busid nga manursuru maipanggep e̍ Je̍sus

¹ Ket anusan dac kay idi nga e̍teng pekkem nga maibagac, ta agten iya kagi niya isa nga agkurang yani nin. Ngem anusan dac kuma ngasin, a.

² Ta arig nga iyimun nakayu, gapu iya napasnec nga panangasikasuc dakayu, nga agten mettas iya panangasikasu ne̍ Apu Diyus dakayu. Ta iyaken, maiyarig gac iya mangiyasawa dakayu e̍ Kristu. Ket dakayu ya maiyarig iya isa nga nadalus nga nubya nga naitulag e̍ Kristu nga nubyu na, nga ig-igina ngas ya pakiasawaan na.

³ Ngem madanagan nac maipanggep dakayu gapu kadito sabali nga mangaskasaba. Ta kaynun no maallilaw kayu nga agten ito E̍ba itun nga inallilaw nito malaga gapu iya kinasikap na. Ket no mapagten kayu iyan, kaynun no maiyaw-awan kayu iya napasnec se̍ napudnu nga panagsirbi nu e̍ Kristu win.

⁴ Ta nalaka kayu met nga mangpalubus iya orey nagan na nga mangasaba nga umbe̍t iya edyan nu. Ta awaten nu met latta, orey uwed isuru na maipanggep e̍ Je̍sus nga sabali ito nisuru mi dakayu, winno orey sabali ya isuru na maipanggep iya Ispiritu nga nae̍cde̍ dakayu, winno uwed panursuru na maipanggep iya Makaparagsac nga Damag nga sabali iya naisuru dakayun.

⁵ Ngem madic met maabac kadiyan nga nakaturturay kanu nga apustule̍s.

⁶ Ta orey bekken nac nga nalaing nga agipalpalawag, bekken nac met nga agkurang ka pannakaemmu maipanggep iya ipalawag ku. Ket nipanecnec mi met nga nalaing yan dakayu kadito amin nga winangel mi.

⁷ Ape̍? Basul aya to winangel ku ito madic nakitangdan dakayu ito panangisuruc dakayu iya Makaparagsac nga Damag nga paikagi ne̍ Apu Diyus? Bekken ngarud nga basul, ta nagpakumbaba ngac iya saad ku, tasun maipangatu kuma ya kasasaad nu iya imatang ne̍ Apu Diyus.

⁸ Ket diya duduma nga bungguy diya mamati kadiya duduma nga ili, igida ya timultulung iyaken kadito masapsapul ku, tasun makapagsirbi yac dakayu itun. Itu nga arig nga igida ya nagkurang gapu iyaken, tasun dakayu ya mabalin ku nga pagsirbiyan.

⁹ Ket orey nagkurangac kadito masapsapul ku ito kauwed ku iya edyan nu, awan pinarigat ku nga nagpatulungan dakayu, ta tinulungan dac itun dito kakabsat nga gayat ennid Mase̍dunya. Itu nga awan pinarparigat ku dakayu ka orey nagan na. Ket orey nungey, panggep ku nga madi nakayu nad nga parigaten.

¹⁰ Ket gapu ta pagtalkac ya kinapudnu maipanggep e̍ Kristu, pakaragsakac met ya mangipakaemmu iya agten idi nga ugalic nga madi agpatulung. Itu nga ipakaemmuc ngarud yani nga ugalic iya orey awac nga lugar iyan nga prubinsiya nga Akaya.

¹¹ Ngem madi kayu kuma pagarupen nga madi nakayu patpatgen gapu idi nga ugalic nga madi agpatulung dakayu. Ta ya kinapudnu na, patpatgen nakayu, ket emmu met ne̍ Apu Diyus nga tutu yani.

¹² Ket idi nga ugalic, ituluy ku latta, tasun maipac kuma ya gundaway dito sinan-apustule̍s nga agpaspasindayaw. Ta kayat da nga kagiyen nga agpada kanu ya ugali da se̍ ya ugali mi.

¹³ Maipac kuma ngarud ya gundaway diya agten iyan nga toley, ta busid da met nga apustule̍s. Ket mangal-allilaw da ngas maipanggep iya kinaapustul da, ta sisisikap da nga agkunen nga apustule̍s da kanu ne̍ Kristu.

¹⁴ Ngem bekken tida kuma nga masdaaw iya agten iyan nga gangey da. Ta orey e̍ Satanas, emmu na met nga pagbaliwen ya langa na tasun makapagparang nga arig nga isa nga anghe̍l nga mangipawada iya kinapudnu.

¹⁵ Itu nga madi tida kuma masikuran no agpammarang pe̍ diya pasurut ne̍ Satanas kadiya agpaay iya mangipawada maipanggep iya panangibilang ne̍ Apu Diyus kadiya toley nga nalinteg. Ngem ya pagtungpalan nad diyan nga toley, ket maitutup ngarud met kadiya dake̍c nga wangwangel da.

Dito rigrigat ne̍ Pablu gapu iya panagsirsirbi na

¹⁶ Ket baliwac manin to kinunec ito deddan nga madi dac kay ibilang nga isa nga agkurang ya panpanunut na. Ngem orey no ibilang dac nga agkurang ya panpanunut ku, ket palubusan dac kay latta idi nga e̍teng nga arig nga panagpasindayaw ku.

¹⁷ Ket maemmuwan nu kuma pe̍ yin nga idi nga ibagbagac, bekken nga maikanatad iya gangey niya Apu, a. Ta arig ngarudin nga panagpasindayaw niya isa nga agkurang.

¹⁸ Ngem ibagac met latta, ata diya kaaduwan nga toley, nairuwam da iya panangipaspasindayaw kadiya mawangel da idi nga lubung.

¹⁹ Tutu met, ta nairuwam kayu nga mangpalubus kadiya toley nga agkurang ka kinasirib, gapu ta dakayu met ya nasirib, ey?

²⁰ Bekken ngarud nga nasirib ya agten iyan, ta palubusan nu met diya mangituray nga arig nga mangtagabu dakayu. Ket orey sikapan dakayu, winno gundawayan dakayu, winno agtangsit da iya imatang nu, se̍ orey no tungpaen dakayu mettas, ket palubusan nu da met latta!

²¹ Ay-ay! Pakaiyal-alyewwac met yani nin! Ta no dakami, tutu met nga madi kami maitured diya agten kadiyan. Ituluy ku met yani nin nga panangibagac, nga arig ngas nga panagkagi niya isa nga agkurang ya panpanunut na! Ket ya kinapudnu na, orey nagan niya makunen da nga pagpasindayaw da kanu, mabalin ku pe̍ nga ipasindayaw.

²² No makunen diyan nga toley nga He̍briyu da, ket He̍briyu wac met pe̍. Ket no makunen da nga Israe̍lita da, ket agten nac met pe̍. Ket no makunen da nga kapututan nito Abraham da, ket agten nac met pe̍.

²³ Emmuc nga arig nga kagi niya isa nga agam-amangew yani nga kagkagiyec, ngem itultuluy ku lattan: No kunen diyan nga toley nga agsirsirbi da kanu e̍ Kristu, ket napatpateg pekkem ya panagsirsirbic. Ta ad-adu nga unay ya nawangel ku maipanggep e̍ Kristu ngem igida, se̍ name̍n-adu wac nga unay nga naibalbalud ngem igida gapu iya pammatic. Ket nabacbaut tac ka name̍n-adu nga unay, se̍ name̍n-adu pe̍ nga pinagarup ku nga matey yac kun.

²⁴ Ket name̍nlima dac nga nipalatiku dito pangulu diya padac nga Hudyu ka saggatlu nga pulu ket siyam.

²⁵ Name̍tlu wac nga nasaplit. Ket ito name̍nsan, nadampag gac ta patayen dac kuma. Name̍tlu nga nadisgrasiya ya nagluganac nga bapur. Ket ito name̍nsan kaditun, nakalasat tac iya baybay nga nagang-angpew wac ka isa nga algew se̍ gabi.

²⁶ Ket adu diya nakan-ansing nga nitured ku kadiya adu nga ipeppen ku, agten kadiya ilalasat ku kadiya dackel nga wangag se̍ kadiya tulisan, se̍ orey pe̍ iya unget diya padac nga Hudyu, se̍ diya bekken nga Hudyu. Adu pe̍ dito nadateng ku nga dake̍c kadiya il-ili se̍ aw-away nga napennac. Nagpeggad dac iya ilalasat ku iya baybay, se̍ nagpeggad dac pe̍ kadito sinan-kabsat tida, nga busid ya pammati da.

²⁷ Nagbannug gac se̍ nagrigrigat tac. Ket pe̍yeng nga nasulsulapan nac. Nabisbisin se̍ new-ewwew wac. Ket name̍n-adu wac nga nagkurang ka kanen, se̍ nal-alminan nac se̍ nagkurang diya pagluput ku.

²⁸ Ket bekken nas nga diyan, ta inalgew nga marigatan nac gapu iya danag ku kadiya kasasaad diya amin nga bungguy diya mamati.

²⁹ Ta no uwed kadiya mamati ya isa nga toley nga nakapsut ya panamati na, madanagan nac pe̍ iya panagkapsut na. Ket no uwed igida ya nasulisug nga nakabasul, lumdaang ngac pe̍.

³⁰ No masapul nga agpasindayaw wac, ipasindayaw ku ngas kuma diya naibilang nga pagkapsutac.

³¹ Ket e̍ Apu Diyus nga Diyus se̍ Ama ne̍ Apu Je̍sus, nga awan patingga niya pannakaidaydayaw na, emmu na met nga bekken nac nga agbusbusid maipanggep kadidi nga banbanag.

³² Ket agten idi pe̍: Enna Damasku, nagpeggad dac met pe̍, ta to gube̍rnadur nga nisaad nito Ari Are̍tas, pinaguwardiyaan na diya amin nga ruwangan niyan nga siyudad, tasun ipatkem nac kuma.

³³ Ngem uwed da antuni diya nangipay iyaken ka sinan-kuribut, se̍ dac nibaluyubuy iya isa nga tawa niya bakud niya siyudad, ket nidsag dac kun iya ruwar. Ket iya agten iyan, nakalibas sac mettin ito gube̍rnadur.