2 Kurintu 10 - Ya Baru nga Tulag

To panangipanecnec ne̍ Pablu iya turay na

¹ Ket uwed da met agkunen nga kapdog gac kanu no uwed dac iya imatang nu, ngem no awan nac dakayun, agbalin nac kanu nga nauyung manin. Ket iyaken mettas nga Pablu, iyaken ya mangibilin nga sipapasnec dakayu itan, ket sigun met iya kinaalumamay se̍ kinapakumbaba ne̍ Kristu yani nga panangibilin ku dakayu.

² Ngarud, ibilin ku nga sipapasnec nga ipalinteg nu kuma diya bekken pekkem nga rumbeng dakayu, tasun madic kuma mapilit nga umuyung nga situtured kadiya kagic dakayu no uwed dac nad manin iya edyan nu. Ta bekken kuma nga dakayu ya paguyungac, no di lugud dito duduma nga agkunen nga ugali ngas diya nailubungan kanu ya tungtungpalen mi.

³ Ngem bekken nga pudnu ya kunen da. Ta ya kinapudnu na, orey taga-lubung kami nga tutu, bekken met nga ya ugali ngas diya nailubungan ya arig nga panggubat mi iya pannakigubat mi.

⁴ Ta bekken nga diya kadawyan nga armas nga panggubat diya taga-idi nga lubung ya us-usaren mi iya pannakidangadang mi. Ta ya us-usaren mi nga pannakaarmas mi, ket itu met ya pannakabalin ne̍ Apu Diyus nga pangpirdi iya bileg diya mangkuntra igina.

⁵ Itu met ya pangpirdi mi iya sirib diya mangpilusupu. Itu pe̍ ya pangipac mi kadiya amin nga kinatangsit nga makasirra iya pannakaemmu diya toley iya kinapudnu maipanggep e̍ Apu Diyus. Se̍ itu pe̍ ya pangiturung mi pe̍ yin kadiya amin nga pangpanggep toley iya tarigagay ne̍ Kristu.

⁶ Ket sisasagana kami met pe̍ nga mangipalinteg kadiya amin nga agsukir e̍ Apu Diyus. Ngem ipangruna mi nga mona ya pannakaipalinteg niya kasasaad nu iyan, tasun naan-anay kuma ya panagtungpal nun.

⁷ Bekken kuma a, nga narabaw ngas ya panangpanunut nu maipanggep dakami. Dikad pe̍ dakayu nga agsiguradu iya pannakaikameng nu e̍ Kristu, laglagipen nu kuma met nga kamkameng nakami met pe̍ nge̍ Kristu.

⁸ Ta ne̍cdan nakami ya Apu ka turay mi tasun mapabileg mi kuma ya panamati nu, nga bekken nga tasun pirdiyen mi. Ket orey no napalaus kuma ka e̍teng ya panangipakaemmuc iya panagragsac ku maipanggep idi nga turay mi, ket madi yac met latta malyew, ta pudnu met.

⁹ Ket madic met gabay nga panpansingen nakayu kadiya surat ku.

¹⁰ Ta bekken kuma nga agten iya kunen diya duduma, nga siuuyaw da nga agkunen kanu nga, “Nainget se̍ naturay diya surat ne̍ Pablu, ngem no uwed iya imatang tida, kapdog ngas met, se̍ awan turaturay niya panagkagkagi na,” kunen da kanu.

¹¹ Ngem maemmuwan kuma diyan nga toley nga agpada mettas ya kagiyen mi kadiya surat mi no uwed kami ka deyyu, se̍ ya wangwanglen mi no uwed kami iya imatang nu.

¹² Ta no dakami, madi kami met gabay nga idilig winno ipada ya begbeggi mi kadiya mangipaspasindayaw iya begbeggi da mettas. Ta no igida, ya mismu ngas nga ugali da ya ibilang da nga nalinteg nga pagtuladan toley. Ket itu ngas met pe̍ yin ya pakaemmuwan da no nalinteg kanu ya beggi da, winno bekken. Ngem diya agten iyan nga toley, awan pekkem pannakaawat da.

¹³ Ngem no dakami, madi kami met gabay nga ipasindayaw ya bekken mi nga turay, no di yas gabay mi nga tungtungpalen ya rebbeng nga nitalec ne̍ Apu Diyus dakami. Ket mairaman kayu ngarud met idi nga nitalec na dakami.

¹⁴ Bekken ngarud nga labes niya turay mi yani nga panangipasindayaw mi, ta dakami met ya non-ona nga nakaidateng dakayu iya Makaparagsac nga Damag maipanggep e̍ Kristu.

¹⁵ Madi kami gabay nga ibilang nga dayaw mi ya pagbanagan niya panagsirbi diya duduma nga toley, no uwed nabaru nga pagbanagan niya panagsirbi da. Ngem ya gabay mi nga gennung, itu ya bumilbileg kuma pekkem ya panamati nu, tasun umad-adu kuma pekkem ya pagbalinan niya bannug mi dakayu.

¹⁶ Ta gabay mi pe̍ nga ikasaba ya Makaparagsac nga Damag maipanggep e̍ Kristu kadiya madi pekkem nakasabaan iya Makaparagsac nga Damag nga uwed iya deydeyyu pekkem ngem iya ili nu. Ket iya agten iyan, madi mi ngarud agawen ya dayaw diya duduma nga toley nga uwed bukud da nga pagbalinan gapu iya panangasaba da.

¹⁷ Ket ya wanglen mi nga gennung, agten met ito naisurat iya Bibliya nga kunen na, “No uwed mayat nga agpasindayaw kuma, ket ipasindayaw na kuma ngas diya maipanggep iya Apu,” kunen na.

¹⁸ Tutu met yan, ta bekken met nga ya toley nga mangipasindayaw iya beggi na ya annamungan niya Apu, no di lugud ya toley nga ipadayaw mettas niya Apu.