2 Juan 1 - Ya Baru nga Tulag

¹ Iyaken ya panglakayen. Agsurat tac ikew, manang nga pinili ne̍ Apu Diyus, se̍ kadiya an-anac mu. Sipupudnu wac nga agayat dakayu, ket bekken nas nga iiyaken ya agayat dakayu, no di pe̍ diya amin nga makaemmu iya pudnu maipanggep iya pammati tida.

² Ay-ayaten dakayu nga tutu maikanatad iya kinapudnu maipanggep e̍ Apu Diyus, ket silalagip tida nga pe̍yeng idi nga kinapudnu ita, se̍ ka agnanayun pe̍.

³ Sapay kuma ta uwed dactida ya siaayat nga asi, tulung, se̍ talna nga gayat e̍ Apu Diyus nga Ama, se̍ e̍ Je̍su Kristu nga Anac mettas niya Ama. Ket kinapudnu se̍ kinamanagayat kuma ya panggun-ud tida kadidi.

Ya panagiinnayat diya mamati

⁴ Naragsakan nac nga unay, ta naemmuwac nga uwed da anac mu nga sumursurut iya pudnu nga pammati, sigun ito nibilin niya Ama dactida.

⁵ Ket itan, manang, ipalagip ku ikew to bilin nga agiinnayat tida kuma. Bekken met nga kabarbaru yani nga bilin nga isurat ku dakayu, ta itu to naibilin dactida manipud ito damu niya pammati tida.

⁶ Ket agten idi ya panangipasingen tida iya panagayat tida: Maipasingen ya panagayat tida no agbiyag tida maikanatad kadiya bilbilin ne̍ Apu Diyus. Ket ya bilin nga naisuru dakayu manipud ito damu kayu nga mamati, ket agten idi: Silalagip kayu kuma iya bilin nga agiinnayat kayu.

Diya mangisursuru ka sabali nga sursuru

⁷ Ipalagip ku dakayu diyan, ta adu diya mangallilaw nga agpaspasyar kadiya nadumaduma nga il-ili iya lubung. Madi da umannamung iya panursuru nga e̍ Je̍su Kristu ya naipatoley nga nibon ne̍ Apu Diyus. Diya agten iyan nga toley, igida diya mangallilaw kadiya toltoley, se̍ igida pe̍ diya kumuntra e̍ Kristu.

⁸ Dikad pe̍ agannad kayu ngarud, tasun madi mapirdi ya pagbanagan niya panagbannug mi para dakayu, nga madi ngarud macsayan ya igun-guna nad ne̍ Apu Diyus dakayu.

⁹ Orey nagan na nga uwed sabali nga panursuru na, se̍ madi na laglagipen ya panursuru ne̍ Kristu win, awan pannakitipun na e̍ Apu Diyus. Ngem ya toley nga silalagip iya panursuru ne̍ Kristu, uwed met pannakitipun na iya Ama, ket bekken nas nga iya Ama no di pe̍ iya Anac.

¹⁰ Ket iya agten iyan, no uwed umbe̍t iya edyan nu nga sabali ya panursuru na maipanggep e̍ Kristu, madi kayu met pauneggen iya baley nu. Madi kayu pe̍ orey kablaawan ya agten iyan nga toley.

¹¹ Ta ya mangkablaaw igina, maitipun mettin kadiya dake̍c nga wangwangel na.

Paggibusan

¹² Adu kuma pekkem diya ibagac dakayu, ngem madic gabay no isurat ku was ka pape̍l. Nabarbaru met no ibagac nad dakayu no makalbe̍t tac iyan, ta sacwaran nakayu nad kuma. Ket nad no makapagsisingen tidan, awan ngarud pagkurangan niya panaganggem tidan.

¹³ Pakumustaan daka diya anac niya kabsat mu nga pinili ne̍ Apu Diyus.