1 Timutyu 6 - Ya Baru nga Tulag

Maipanggep kadiya tagabu nga mamati

¹ Maipanggep kadiya uwed pakarigatan na nga kinatagabu, ket masapul nga dayawen da diya amu da, nga awan kuma ngarud kurang niya panagdayaw da igida, tasun awan dake̍c nga makagi diya duduma maipanggep e̍ Apu Diyus winno iya sursuru tida.

² Ket diya tagabu nga mamati pe̍ ya amu na, madi da kuma kessayan ya panagdayaw da kadiya amu da gapu iya panagkabsat dan ka pammati, no di lugud napaspasnec da kuma pekkem iya panagsirbi da. Ta diya agten iyan nga pagsirbiyan da nga amu, mamati da ngarud met pe̍, ket napateg da nga kakabsat. Diyan nga nipakaemmuc ikew, ipakaemmum kuma pe̍ kadiya mamati ennan nga masapul nga suruten da.

Ya busid nga panursuru se̍ ya pudnu nga kinabacnang

³ Ngem no uwed mangisuru ka sabali kadito napateg nga nisuru niya Apu tida nga Je̍su Kristu se̍ ya panursuru maipanggep iya pammati e̍ Apu Diyus, ket busid met!

⁴ Ta ya kinapudnu na, natangsit ngas ya agten iyan nga mangisuru, ket awan met emmu na iya kinapudnu. Dake̍c ngas ya tarigagay na, ta pannakidiskutir ngas ya gabay na, se̍ pannakisupyat. Ket diyan met diya pagtaudan niya panagimun, panagupir, panagumsi, se̍ panagsadap.

⁵ Sabali ya panpanunut niyan nga toley nga di makaawat iya kinapudnu. Itu nga pe̍yeng nga agdidinniskutir diya agten iyan. Ket pagarupen da met pe̍ nga pagteggeddan met ya pammati e̍ Apu Diyus!

⁶ Tutu met nga uwed dackel nga magun-ud tida nga mamati, no mapnec tida iya orey nagan na nga kasasaad tida.

⁷ Ta awan met kukuwa nga ne̍lbe̍t tida idi nga lubung ito naiyanac tida, ket awan met pe̍ maitarey tida no matey tida.

⁸ Itu nga no uwed kanen se̍ pagluput tidan, ket kuntintu tida kuma ngin.

⁹ Ngem diya toley nga panpanunuten da ngas ya bumacnang, nalaka da nga masulisug, nga arig nga macna da iya isa nga ilug. Ket iya agten iyan, paiturayan dan kadiya tarigagay nga kinaluku. Ket diyan nga tarigagay, pangpasakit da ngas kadiya toley, ta iturung da da ka pakaukuman se̍ pakapukawan dan.

¹⁰ Ta ya panangipateg ka kuwarta, ket itu met ya isa nga pagtaudan diya amin nga kita dake̍c. Tutu ngarud, ta uwed da toley nga imadeyyu win iya pammati tida, gapu was iya panagagum da ka kuwarta. Ket iya agten iyan, pinasakit da met ya beggi da, nga aglak-am da ka adu nga leddaangin.

To balakad ne̍ Pablu e̍ Timutyu

¹¹ Ngem ikew Timutyu, ikew nga isa nga naipaay e̍ Apu Diyus, adeyyuwam ngarud amin diyan nga dake̍c nga ugali nga nibagac kun. Ket agintec ka lugud iya panagbiyag nga nalinteg se̍ makaay-ayu e̍ Apu Diyus, se̍ kadiya mangpabileg iya panamati e̍ Apu Diyus, se̍ iya panagayat. Ket natanang ka kuma ngas iya panangituluy mu iya wangel mu. Ket anusam ngas diya pakarigatam.

¹² Madi ka kuma ngarud paabac kadito mangkuntra iya panangtungpal mu iya pammati tida. Ket laglagipem ngarud nga pe̍yeng ya biyag nga agnanayun nga maisagut ikew. Itu met ya nakapiliyam nga nipakaemmu ne̍ Apu Diyus ito nipakaemmum ya kinapasnec mu iya sangu diya adu nga toley.

¹³ Ket itan, uwed ibilin ku ikew. Ket bilinen naka iya imatang mettas ne̍ Apu Diyus, nga igina met ya pagtaudan niya biyag diya amin nga agbibiyag, se̍ iya imatang ne̍ Kristu Je̍sus, nga igina met ya situtured nga nangipakaemmu iya kinapudnu iya sangu ne̍ Punsiyu Pilatu itun.

¹⁴ Bilinen naka nga tungpalem kuma ngarud dito naibilin ikew. Ket madi ka agdardarusudus kadiyan, tasun awan pakamansaam winno pakaumsiyam. Agten iyan kuma ngarud ya panangtungpal mu orey agingga iya algew nga panagparang manin niya Apu tida nga Je̍su Kristu.

¹⁵ Ket iparang ne̍ Apu Diyus nad no madatngan ya kustu nga timpu nan. Ket e̍ Apu Diyus, igina met ya madaydayaw nga kangatuwan nga agturay. Igina ya Ari diya amin nga ar-ari, se̍ ya Apu diya amin nga ap-apu.

¹⁶ Igina ngas ya awan pannakatey na. Ket igina, aged-edyan met ka wada nga madi maadenniyan niya toley. Pulus nga awan pekkem toley nga nakasingen igina, ket awan pe̍ makasingen igina ita, ta awan makabael. Igina kuma ya madaydayaw nga mannakabalin ka agnanayun. Agten iyan kuma.

¹⁷ Ket no maipanggep kadiya babacnang, ibagam igida nga di da kuma tumangsit gapu iya kinabacnang da. Ta napateg ngas idi nga lubung yan nga kinabacnang da, ket nalaka pe̍ nga mapukaw nad mettas. Bekken kuma nga itu ya namnamaen da, no di lugud e̍ Apu Diyus. Igina ya paggayatan diya amin nga pakaragsakan tida, nga igina met ya manage̍cde̍ kadiya amin nga kasapulan tida.

¹⁸ Itu nga ibagam igida nga wanglen da kuma nga pe̍yeng ya nabaru para kadiya makasapul, nga ibilang da kuma nga kinabacnang dan ya panangtulung da ka toley. Ngarud, managkaasi da kuma nga bekken nga nakirmet.

¹⁹ Ket no agten iyan ya wangwanglen diya babacnang, ket arig nga uwed ka langitin ya pagpunduwan da ka kinabacnang da nga erwaten da nad iya maadpangan. Ta madi pulus nga mapukaw antuni. Ket bekken nas nga iyan, ta itu pe̍ ya napaw-is nga panagbiyag nga maitutup iya biyag nga awan pagkurangan na.

²⁰ Timutyu, madi ka ngarud liwayan to naitalec ikew. Liclikam ya panagkagkagi nga awan mamaay na, ta bekken nga pangdayaw e̍ Apu Diyus. Ket se̍ liclikam kuma pe̍ diya awan mamaay da nga panagdidinniskutir, ta itu ya ugali ngas diya uwed kanu sirib na, ngem pilusupu was met.

²¹ Uwed da mairradu win iya maipanggep iya pammati tida, gapu ta gabay da ya agten iyan nga sinan-sirib. Ket uwed kuma dakayu ya siaayat nga asi ne̍ Apu Diyus.