1 Timutyu 5 - Ya Baru nga Tulag

Maipanggep iya panagpatigmaan

¹ Maipanggep iya panagpatigmaan, ket no ya isa nga lakay, madi ka kuma nga ungtan, no di katbar mu lugud nga arig nga ibilang mu nga amam. Ket no lalaki nga kapatadam ya patigmaanam, ibilang mu da nga kakabsat mu.

² Ket no diya bacbaket, ibilang mu da nga inam. Ket diya kapatadam nga babey, ibilang mu da nga kakabsat, nga siaannad ka ngarud tasun awan dake̍c nga panpanunut mu maipanggep igida.

Maipanggep kadiya balu nga mamati

³ Ket maipanggep kadiya babey nga balu, no tutu da nga kackaasi, sidadayaw ka nga tumulung igida.

⁴ Ngem no uwed balu nga uwed anac na winno inapu na, rebbeng met diyan nga istimaren yan nga balu. Ket itu pe̍ ya kustu nga panagsirbi da e̍ Apu Diyus, maigapu kadiya mamanakem da. Rumbeng no itu kuma ya wanglen da nga agsubalit kadiya naganac igida, ta itu ya makaay-ayu e̍ Apu Diyus.

⁵ Ket ya tutu nga kackaasi nga balu nga awan nga pulus kabagiyan na nga makaistimar igina, e̍ Apu Diyus ngarud met ya pangnamnamaan na. Ket gabi-algew, sikakararag nga pe̍yeng, nga agpacpakaasi e̍ Apu Diyus.

⁶ Ngem ya balu nga ya pagragsakan niya beggi na ngas nga gennung ya biyangan na, maiyarig ngas iya natey yin. Ta orey sibibiyag pekkem, awan sirbi niya biyag nan.

⁷ Itu nga ibagam didi nga bilin igida, tasun awan kuma pakadellawan da.

⁸ Ket no uwed madi makibiyang iya kasapulan diya kabagiyan na, nangruna diya kakobung na, naglikudan nan ya ugali niya pammati tida. Ket dacdake̍c met yan nga ugali nan ngem iya ugali diya di pekkem mamati.

⁹ Ket diya babey nga balu nga ilista nu nga tulungan nu, mabalin nga diyan nas agdagun ka ennem nga pulu winno nasuruc, se̍ diya nam-ame̍nsan nas nga nakiasawa.

¹⁰ Ket masapul pe̍ nga uwed maemmuwan diya toltoley nga wangwanglen da nga nabaru, agten iya panangpadackel kadiya anac da ka nabaru nga sursuru, se̍ ya managsangaili, se̍ ya managistimar kadiya pada da nga mamati, se̍ ya managkaasi kadiya kackaasi. Ngarud, diya balu nga ilista nu, yan nas agisnup kadiya amin nga nabaru nga kabaellan da nga wanglen.

¹¹ Ngem diya balu nga di pekkem unay nga bacbaket, madi kayu ibilang iya listaan nu, ta kaynun no babawiyen da nad ya kari da e̍ Kristu no agtarigagay da nga makiasawa manin.

¹² Ket no agten iyan, makabasul da mettin, ta madi da nga tungpalen to nona nga kari da nga agsirbi e̍ Kristu.

¹³ Se̍ bekken nas nga iyan, ta gangey da pekkem mas ya agsadut, nga mamaleybaley da ngas nga makiam-amlang. Ket agbalin nga panaguy-uyaw ya pannakiamlang da, ket makibibiyang da pe̍ kadiya bekken da nga rebbeng nga biyangan, se̍ madi da met annadan ya panagsapsaput da.

¹⁴ Itu nga kunec nga makiasawa kuma ngas manin diya balu nga bekken pekkem nga bacbaket. Ta nabarbaru met no aganac da kuma pekkem, se̍ no uwed kuma kakobung da nga biyangan da, tasun awan pulus pangdellawan niya mangkuntra dactida.

¹⁵ Ta orey ita, uwed da ngarud duduma nga balu nga binay-an dan ya panamati da, ket ya tarigagay ne̍ Satanas met ya sursuruten dan.

¹⁶ Ket no uwed babey nga mamati nga uwed kabagiyan na nga balu nga babey, igina ngas kuma ya mangistimar iyan nga balu. Ta madi kuma maparigatan ya bungguy mamati iyan nga banag, tasun uwed pekkem maikaasi da kadiya tutu nga kackaasi nga balbalu.

Maipanggep kadiya panglakayen

¹⁷ Ket maipanggep kadiya panglakayen manin, tumutup no madubli kuma ya liwliwa da no nalaing ya panangipangulu da, nangruna diya napasnec nga mangasaba se̍ mangisursuru dakayu.

¹⁸ Ta kunen na iya Bibliya nga, “Madi ka busalan ya baka nga madama nga pagwangwangel mu nga pagrunrunas mu ka emmey, tasun nawaya kuma nga mangan.” Se̍ kunen na pe̍, “Maikari nga matangdanan ya agwangel,” kunen na.

¹⁹ Ket no madamag mu nga uwed basul kanu niya isa nga panglakayen, madi ka kuma ikaskasu, malacsid no uwed duwa winno tellu nga mangsistigu.

²⁰ Ket no uwed basul na nga tutu, ipalinteg mu ngarud iya imatang niya kaaduwan, tasun mapaansing kuma diya duduma nga madi da tuladen.

²¹ Ket ikew, bilinen nakan nga sipapasnec iya imatang mettas ne̍ Apu Diyus se̍ e̍ Kristu Je̍sus se̍ diya napili na nga anghe̍le̍s na, nga tungpalem didi nga pamagbagac. Ket awan kuma ngarud idumdumam nga toley iya panangtungpal mu kadidi, orey nagan na nga toley.

²² Madi ka kuma nga agganat nga mangannamung ka toley nga agsirbi iya bungguy mamati, tasun madi ka kuma nga maibilang nga makipagbasbasul igida. Agannad ka ngarud tasun madi ka mamansaan ka basul.

²³ Ket no maipanggep iya nasakit nga bessug mu se̍ ya panagkakapsut mu nga pe̍yeng, ket idi ya kunec: Bekken kuma nga danum ngas ya inumem mun, no di pasaray ka kuma pe̍ uminum ka e̍teng nga naingel, tasun maagasan ka kuma.

²⁴ Uwed da toley nga nalaka nga mailasin diya basul da. Dikad pe̍ nawada ngin ya gapu niya pannakaukum nad diya agten iyan nga toley. Ngem diya duduma, nalimed pekkem diya basul da, ngem maipakaemmu da nad met pe̍.

²⁵ Agten iyan pe̍ diya nabaru nga wanglen niya toley, ta nalaka nga masingen diya duduma. Ket orey diya nalimed ita, maipakaemmu da nad pe̍.