1 Timutyu 4 - Ya Baru nga Tulag

Maipanggep kadiya mangisursuru ka busid

¹ Nalawag to nipacpakaemmu niya Ispiritu Santu, nga uwed nad kanu duduma nga pumanaw iya pammati tida, nga suruten da ya panursuru diya mangallilaw nga manursuru, se̍ ya panursuru nga tumaud kadiya sacsairu.

² Diyan nga panursuru, gayat da met iya pangallilaw diya agbusbusid nga toley. Ket diyan nga toley, arig nga nacset tin ya kananakem da, ta madi da met mailasin ya kinapudnu win.

³ Ket diya agten iyan nga toley, iyagawa da ya panagasawa. Kanyawen da met pe̍ ya pannangan ka duduma nga makan. Ngem ya kinapudnu na, pinarsuwa met ne̍ Apu Diyus diyan nga makan, tasun dactida nga mamati se̍ makaemmu win iya pudnu, kanen tida kuma nga siiiyaman.

⁴ Ta nabaru ya amin nga pinarsuwa ne̍ Apu Diyus. Itu nga awan kuma kanyawen tida nga kanen, ta awan met dake̍c na no siiiyaman tida nga mangan.

⁵ Ta ya kanen tida, maibilang nga nadalus iya imatang ne̍ Apu Diyus gapu iya panangipalubus na se̍ iya kararag tida.

Ya kustu nga panagsirbi e̍ Je̍su Kristu

⁶ Ita Timutyu, isurum ngarud diyan nga pamagbaga kadiya kakabsat nga mamati iyan. Ta no agten iyan ya wanglem, maibilang nga mayat ya panagsirbim e̍ Kristu Je̍sus. Ta gapu iya panangsalimetmet mu kadiya panursuru maipanggep iya pammati tida, se̍ dito kustu nga panursuru nga sigud mu nga sursuruten, bumileg ngarud ya panamatim.

⁷ Ket no maipanggep kadito sarsarita nga bekken nga gayat e̍ Apu Diyus, madi mu da kuma bibiyangan, ta awan met mamaay da. Nabarbaru lugud no iruwam mu ya beggim iya panagbiyag nga makaay-ayu e̍ Apu Diyus.

⁸ Ta agten idi: Nalaing ngarud no iruwam tida ya beggi tida ka panagwatwat, ngem napatpateg lugud no ya panangay-ayu tida e̍ Apu Diyus ya pabilgen tida. Ta ya panangay-ayu e̍ Apu Diyus, agsirbi kadiya amin nga banbanag, nga uwed met sirbi na idi nga biyag tida ita, se̍ uwed met pe̍ sirbi na iya maikadduwa nga biyag pe̍ iya maadpangan.

⁹ Pudnu yan, ket nabaru no itu ya patiyen diya amin nga toley.

¹⁰ Ta e̍ Apu Diyus nga sibibiyag, igina ngarud ya pagnamnamaan tida, ket itu nga ikarigatan tida kuma ya agpasnec gapu igina. Ket igina met ya mangisalakan ka amin nga toley, nangnangruna dactida nga mamati.

¹¹ Diyan nga nibagac, isurum kuma pe̍ kadiya mamati iyan. Ket bilinem da nga suruten da diyan.

¹² Ket no uwed ya manguyaw ikew gapu iya kinaebbing mu, madi ka latta malyew, no di lugud ipasingem ya kustu nga pagtuladan diya mamati. Ipasingem ngarud yan gapu mettas iya nabaru nga panagkagi se̍ panagbiyag mu, ya panagayat mu, ya panamatim, se̍ diya nadalus nga pangpanggep mu.

¹³ Agingga nga umbe̍t tac iyan, no aggigimung kayu, ituluy mu kuma ya panangibasam iya Bibliya kadiya toltoley, se̍ ya panangaskasabam, se̍ ya panangisurum.

¹⁴ Ket madi ka kuma ngarud liwayan ya pannakabalin nga nitalec ne̍ Apu Diyus ikew. Itu pe̍ ya nipakaemmu dito panglakayen ito nipatey da ikew diya ima da tasun ipasingen da nga mae̍cdan kan ka turay.

¹⁵ Ipasnec mu ngarud ya panangtungpal mu kadiyan nga rebbeng mu. Itu diyan diya pe̍yeng mu nga laglagipen, tasun masingen kuma diya amin nga toley ya pumawpaw-is nga gangey mu.

¹⁶ Tanangem ngarud ya panagbiyag mu se̍ ya panangisurum, tasun kanayun nga kustu. Ituluy mu ngarud diyan nga kustu nga banbanag. Ta gapu kadiyan, maisalakan ya beggim, se̍ diya dumngeg pe̍ ikew.