1 Timutyu 3 - Ya Baru nga Tulag

Maipanggep kadiya agay-aywan iya bungguy mamati

¹ Pudnu ngarud ya kunen da nga no uwed agtarigagay kanu nga agbalin nga agay-aywan iya bungguy mamati, nabaru met, ata napateg yan nga rebbeng nga gabay na.

² Ta ya isa nga agay-aywan iya bungguy mamati, masapul ngarud nga awan pakaumsiyan na, se̍ masapul nga isa ngas ya asawa na. Masapul nga agtimbeng se̍ nanakem nga toley, se̍ masapul nga isa nga raemmen diya kapada na. Masapul pe̍ nga isa nga nalaing nga mangsangaili, se̍ masapul nga nalaing nga mangisuru.

³ Ya agay-aywan iya bungguy, madi pe̍ mabalin ya age̍ng-e̍nglew winno ya nauyung, no di lugud masapul nga nabaru ya ugali na. Madi pe̍ mabalin no mannakisuway winno naagum ka kuwarta.

⁴ Masapul pe̍ nga isa nga nalaing nga mangituray iya kakobung na, tasun bekken nga nasukir diya anac na no di nanakem da.

⁵ Ta no madi na emmu ya mangituray iya kakobung na, madi na ngarud met emmu ya mangaywan kadiya toley ne̍ Apu Diyus.

⁶ Ya agay-aywan iya bungguy, madi pe̍ mabalin no kabarbaru pekkem nga mamati, ta kaynun no tumangsit, se̍ madusa nga agten met iya diyablu itun.

⁷ Ket masapul pe̍ nga naraem kadiya madi mamati, tasun awan pakaiyal-alyewwan na, nga itu ya maiyarig iya isa nga ilug niya diyablu nga mangsilu igina.

Maipanggep kadiya katulungan niya bungguy mamati

⁸ Agten iyan met pe̍ diya lalaki nga katulungan niya bungguy mamati, ta masapul nga naraem da gapu iya kinatacneng da. Ket masapul da pe̍ nga napudnu iya kagi da, se̍ madi mabalin no age̍ng-e̍nglew winno agagum ka kuwarta.

⁹ Ta salimetmettan da kuma lugud diya napateg nga banbanag niya pammati tida, ket masapul nga nadalus ya nakem da kadiyan.

¹⁰ Ket singem nga mona no maikari da nga agsirbi. Ket no awan maemmuwam nga pagkurangan da, alakem da nga katulunganin.

¹¹ Ket diya asawa da met pe̍, masapul nga naraem gapu iya kinatacneng da. Ta madi da kuma managsadap, no di agtimbeng da. Ket se̍ masapul da pe̍ nga mapagtalkan ka orey nagan na.

¹² Masapul nga isa ngas ya asawa niya tunggal isa nga agbalin nga katulungan niya bungguy mamati. Ket se̍ masapul nga emmu da pe̍ ya nabaru nga panangiturung kadiya anac da se̍ kakobung da.

¹³ Ket no nabaru ya panagsirbi diya katulungan, maipateg da iya saad da. Ket iya agten iyan, agtalged da nga mangipakaemmu maipanggep iya panamati tida e̍ Kristu Je̍sus.

Ya napateg nga banag nga naipakaemmu win

¹⁴ Gabay ku no makalbe̍t tac kuma iya edyan mu iya di mabayag. Ngem isurat ku yani ikew,

¹⁵ ta kaynun no uwed pakatactakac pekkem, ket gabay ku no maemmuwam kuma no kumaan niya ugali diya toley ne̍ Apu Diyus. Ta dactida, arig tida nga pamilya ne̍ Apu Diyus, nga bungguy niya sibibiyag nga Diyus. Ket ya bungguy na, itu ya pungut niya pannakaisuru niya panamati e̍ Kristu Je̍sus, ket maiyarig iya adigi se̍ gessar niya pudnu maipanggep igina.

¹⁶ Ket napateg ngarud nga unay ya banag niya pammati tida nga nipakaemmu win ne̍ Apu Diyus. Agten idi ya banag na: Igina, nagparang nga naipatoley. Ket gapu iya Ispiritu ne̍ Apu Diyus, napanecnekkan ya kinalinteg na, se̍ nasingen pe̍ diya anghe̍le̍s. Ket naipadpadamag ya maipanggep igina kadiya pagpagiliyan, ket adu da nga namati iginan idi nga lubung. Ket naiyune̍c kin nga madaydayaw enna langit.