1 Timutyu 2 - Ya Baru nga Tulag

Ya rebbeng diya aggigimung

¹ Ya mona nga ibagbagac ket ikararagan tida kuma diya amin nga toley e̍ Apu Diyus, nga ikararag tida diya kasapulan da. Adngen tida ngarud e̍ Apu Diyus ya panangngaasi na igida, nga siiiyaman tida kuma maipanggep igida.

² Ikararagan tida ngarud diya ari se̍ amin diya agtuturay, tasun mabalin tida kuma ya agbiyag nga natalna se̍ napaw-is, se̍ tasun makatungpal tida iya panamati tida se̍ ya natacneng nga panagbiyag.

³ Nabaru ngarud no agten iyan, ket makaay-ayu pe̍ yan e̍ Apu Diyus nga Mangisalakan dactida.

⁴ Ta e̍ Apu Diyus, tarigagayan na met nga maisalakan diya amin nga toley, nga maemmuwan da kuma no nagan ya pudnu maipanggep igina.

⁵ Ta uwed das is-isa nga Diyus, ket is-isa met pe̍ ya mangiyadenni e̍ Apu Diyus se̍ iya toley, nga itu nge̍ Kristu Je̍sus nga nagpaitoley.

⁶ Ta e̍ Kristu Je̍sus, nipalubus na ya biyag na nga pangsubbut para amin nga toley. Ket agten iyan ya pammanecnec nga naipasingen ito nadatngan ya kustu nga timpu nan, tasun maemmuwan tida kuma nga gabay na no maisalakan diya amin nga toley.

⁷ Ket itu pe̍ ya nakaibonac nga agapustul se̍ mangasaba nga mangisursuru kadiya bekken nga Hudyu iya pudnu maipanggep e̍ Kristu Je̍sus se̍ ya panamati igina. Tutu met yan nga kunec, ket bekken ku nga busbusid diyan!

⁸ Itu nga no mabalin, gabay ku no tunggal bungguy diya mamati, agkararag diya lalaki. Ngem diya lalaki nga agkararag, masapul nga awan nalimed nga dake̍c iya lemlemmet da, agten iya gura winno lucsew ka pada da nga toley.

⁹ Ket diya babey, gabay ku no nae̍mma se̍ nanakem da kuma iya panagkawkawwes da, tasun maitutup iya nanakem nga toley. Madi da pe̍ kuma ipasindayaw ya naarte̍ nga ebbuc, winno ya alahas nga agten iya naariman ka balituc winno pe̍rlas, winno ya nangina nga kawkawwes.

¹⁰ Ta no tutu nga agdaydayaw da e̍ Apu Diyus, ket diya maitutup nga wangel da nga nabaru kuma ya ipaspasingen da.

¹¹ Ket no uwed agisursuru, masapul nga natalna diya babey, nga aggigicna da kuma ngas nga siaannugut.

¹² Ket no iyaken, madi yac ipalubus nga agisuru diya babey winno iturayan da diya lalaki. Agtalna da ngas kuma.

¹³ Ta e̍ Adan to non-ona nga naparsuwa. Ket kalpasan na, e̍ E̍ba ngin.

¹⁴ Ket se̍ bekken met nga to Adan to nasikapan itun, no di lugud to babey. Ket nagbasul met pe̍.

¹⁵ Ngem gapu iya panaganac niya babey, maisalakan da, no itultuluy da ya panagbiyag da nga nanakem iya panamati se̍ panagayat da, se̍ ya panagbiyag da nga maitutup iya gabay ne̍ Apu Diyus.