1 Timutyu 1 - Ya Baru nga Tulag

¹ Iyaken nge̍ Pablu nga isa nga apustul nga agpaay e̍ Kristu Je̍sus. Agten iyan ngarud ya saad ku, gapu mettas iya bilin ne̍ Apu Diyus nga Mangisalakan dactida se̍ e̍ Kristu Je̍sus nga pagnamnamaan tida.

² Isurat ku yani nga surat ikew, Timutyu nga ibilang ku nga pudnu nga anac ku ka pammati. Sapay kuma ta uwed ikew ya siaayat nga asi, tulung, se̍ talna, nga gayat e̍ Apu Diyus nga Ama se̍ e̍ Kristu Je̍sus nga Apu tida.

Maipanggep iya panursuru nga busid

³ Ipalagip ku manin to nibilin ku ikew ito agpa-Mase̍dunya ngac itun, nga gabay ku no mabati ka iyan E̍pe̍su tasun bilinem dito toley nga mangisursuru ka sabali nga panursuru, ta isardeng da kuma ngarud ya panangisuru da ka sabali.

⁴ Ket ibagam pe̍ igida nga madi da biyangan dito sarsarita maipanggep kadito nagkaona nga toley, se̍ dito lislistaan nga nakailistaan diya nagnagan da nga awan patingga na. Isardeng da kuma ngarud ya pannakibiyang da kadiya agten iyan, ta pakaringguran nas diyan. Ket madi da mangiturung iya panangtungpal tida iya panggep ne̍ Apu Diyus nga maemmuwan tida gapu iya panamati tida.

⁵ Ket ya panggep nidi nga bilin nga ibagbagac, ket tasun maipalagip kuma kadiya toley ennan ya maipanggep iya panagayat nga tumaud iya lemlemmet nga awan dake̍c nga panggep na, se̍ maipanggep iya natalna nga nakem, se̍ maipanggep iya napudnu nga panamati.

⁶ Ngem uwed da toley nga mangadeyyu kadiyan nga banbanagin. Ket ya panagdidinniskutir nga awan banbanag na, itu ya napatpateg igidan.

⁷ Gabay da met ya agbalin nga manursuru iya Linteg Hudyu, ngem madi da met maawatan orey ya kagkagiyen da se̍ diya banbanag nga pungut kanu diya ipapilit da nga isursuru.

⁸ Ket emmu tida met nga ya Linteg Hudyu, nabaru met no kustu ya panangusar niya isa nga toley.

⁹ Ta laglagipen tida kuma nga bekken nga diya nalinteg nga toley ya gapu niya linteg, no di lugud diya toley nga madi mangitaltalec kadiya linlinteg se̍ diya nasukir, agten pe̍ kadiya madi agdayaw e̍ Apu Diyus se̍ diya managbasul, agten kadiya madi makaemmu iya panagdayaw e̍ Apu Diyus, se̍ diya awan pammati na, agten pe̍ diya pumapatey se̍ diya mayat nga pumatey kadiya ama winno ina da.

¹⁰ Ket diya makikamalala, se̍ diya bacyen, se̍ diya mangtekkem ka toley nga ipasaka da ka kuwarta, se̍ diya managbusid se̍ diya agsacsi ka busid, se̍ diya agwangel iya orey nagan na nga maikuntra iya kustu nga panursuru, ket didi met diya pakaipaayan niya linteg.

¹¹ Ket ya kustu nga panursuru nga kunec, itu diya maiyannatup iya Makaparagsac nga Damag nga naitalec iyaken nga isuruc. Ket itu ya nadayaw nga sursuru nga maigapu iya madaydayaw nga Diyus.

To panagyaman ne̍ Pablu iya asi ne̍ Apu Diyus

¹² Agyaman nac e̍ Kristu Je̍sus nga Apu tida nga nangpabileg iyaken iya wangel ku wi. Agyaman nac ngarud igina ta nibilang nac nga matalec ito dinutukan nac nga agsirbi igina.

¹³ Ito nona, nagkagkagi yac ka maikuntra igina. Ket igina met ya nakaipaayan nito panangirurumen se̍ pananguy-uyaw ku. No pe̍ agten iyan, kinaasiyan nac pekkem nge̍ Apu Diyus, ta madi yac naawatan dito winangwangel ku itun, gapu ta madi yac pekkem mamati itun.

¹⁴ Ngem napalaus met to siaayat nga asi niya Apu tida iyaken itun. Ket niturung nac iya panamati se̍ panagayat nga uwed dactida nga naitipun e̍ Kristu Je̍sus.

¹⁵ Tandaanam kuma yani nga ibagac, ata pudnu met yani, se̍ gabay ku no awan kuma madi mamati iya amin nidi: Inumbe̍t nge̍ Kristu Je̍sus idi nga lubung tasun isalakan na diya uwed basul da. Ket iyaken met ya kadake̍kan iya amin!

¹⁶ Ngem kinaasiyan nac met nge̍ Apu Diyus, tasun iparangarang ne̍ Je̍su Kristu ya naan-anay nga anus na iyaken nga kadake̍kan. Nipasingen na ngarud ya anus na iyaken tasun iyaken ya pakasingnan diya amin nga mamati nad igina, nga igida diya mae̍cdan ka biyag nga agnanayun.

¹⁷ Sapay kuma ta daydayawen tida nge̍ Apu Diyus nga agnanayun nga Ari tida nga madi matey. Itu ya is-isa nga Diyus ket madi pe̍ masingen toley. Madaydayaw kuma ka agnanayun nga awan patingga na! Agten iyan kuma.

Maipanggep iya kustu nga panagsirbi

¹⁸ Ket ikew Timutyu, nga ibilang ku nga anac, italec ku ngarud ikew diya bilin idi nga surat, sigun kadito nakaibonam. Ket iya agten iyan, laglagipem kuma ngarud dito nakaibonam, tasun bumileg ka iya panagsirbim e̍ Apu Diyus, nga arig nga natured ka nga suldadu na.

¹⁹ Ipatpateg mu ngarud ya panamatim se̍ ya natalna nga nakem mu. Ta uwed da toley nga emmu da itun ya kustu nga wanglen da kuma, ngem dake̍c latta to winangel da. Itu nga napirdi ya panamati dan.

²⁰ Mairaman met kadiya agten iyan de̍ Hime̍nyu nge̍ Ale̍handru. Nipalubus ku da ngasin iya pannakabalin ne̍ Satanas, bareng no masursuruwan da kuma nga madi agkagi ka maikuntra e̍ Apu Diyus.