1 Te̍salunika 5 - Ya Baru nga Tulag

Ya panagpadaan tida iya umbe̍t ne̍ Apu Je̍sus

¹ Ket kakabsat, no maipanggep iya algew se̍ timpu nga pakapasamakan diyan, orey no awan isurat ku dakayun.

² Ta emmu nu met nga nalaingin nga no dumateng nad ya Timpu niya Apu, ket agten met iya umbe̍t niya isa nga mannanakew iya gabi.

³ Ta nad no pagarupen diya toley nga natalna ya timpu win, se̍ awan idanag da kanun, ket pagamwan, iyan nad mettin ya kellat nga pakapukawan da. Ket maiyarig da nad iya isa nga babey nga agpakiskisin, ta madi da nad pe̍ nga makalisi iya pakapukawan dan.

⁴ Ngem dakayu nga gennung, kakabsat, bekken kayu nga agten kadito toley nga arig nga uwed iya gicbet. Itu nga madi kayu nga makigtut nad no madatngan yan nga algew nga arig nga pannakakigtut diya toley no matulisan da.

⁵ Ta dakayu, naibilang kayu nga aminin nga anac niya wada se̍ ya algew. Bekken nactida nga anac ya gabi winno gicbet.

⁶ Itu nga madi tida kuma nga agsadsadut nga agten kadito duduma nga maiyarig iya agtudtudug, no di tida lugud sipupuut kuma se̍ sitatanang.

⁷ Gabi met ya panagtutudug se̍ panage̍e̍nglew pe̍ diya toley.

⁸ Ngem dactida, paiturayan tidan iya wada. Itu nga agtanang tida kuma ngarud. Ya panamati tida se̍ ya panagayat tida, itu diyan diya iyusar tida nga arig nga kalasag tida. Ket ya namnama tida iya pannakaisalakan tida, itu ya pannakahe̍lme̍t tida.

⁹ Ta pinili nactida nge̍ Apu Diyus tasun agbalin tida nga maisalakan gapu iya Apu tida nga Je̍su Kristu, bekken met nga tasun agbalin tida nga maukum gapu iya unget na.

¹⁰ Ta e̍ Apu Je̍sus, natey para dactida, tasun mairaman tida nad iya biyag nga uwed igina, orey no natey tida man, winno sibibiyag tida pekkem nad no umbe̍t manin.

¹¹ Dikad pe̍ itultuluy nu ngarud ya agiinnalayu nu se̍ agpipinnabileg nu kadiya panpanunut nu, agten mettas iya sigud nga wangwanglen nu.

To nodi nga pamagbaga de̍ Pablu kadito iTe̍salunika

¹² Uwed pekkem ibaga mi kuma dakayu, kakabsat. Raemmen nu kuma diya agbannug para dakayu, nga igida met diya pinili niya Apu nga mangipangulu dakayu se̍ diya mangibagbaga dakayu maipanggep iya panamati tida.

¹³ Itu nga patgen se̍ ayaten nu da kuma nga unay gapu iya wangel da. Ket dakayu nga bungguy mamati ennan, agbiyag kayu kuma ngarud nga situtunus.

¹⁴ Ket idi ya ibagbaga mi nga sipapasnec dakayu, kakabsat: Bagbagaan nu diya nasadut. Pabilgen nu diya makumsa. Tulungan nu diya nakapsut pekkem ya panamati da. Ket an-anusan nu ngas pe̍ diya amin nga toley.

¹⁵ Laglagipen nu nga madi kayu balsen ka dake̍c diya agariman ka dake̍c dakayu. Ngem ya wanglen nu kuma nga gennung, ikarigatan nu lugud nga pe̍yeng ya agariman ka nabaru iya tunggal isa dakayu, se̍ orey kadiya amin nga toley.

¹⁶ Aganggem kayu nga pe̍yeng.

¹⁷ Se̍ sikakararag kayu pe̍ nga pe̍yeng.

¹⁸ Ket iya orey nagan na nga kasasaad nu, agiiyaman kayu latta, ta itu ya gabay ne̍ Apu Diyus dactida nga agpaay e̍ Kristu Je̍sus.

¹⁹ Madi kayu lapdan ya Ispiritu Santu iya panagwangel na dakayu.

²⁰ Madi kayu ngarud agmadi kadiya panursuru nga ipaisuru ne̍ Apu Diyus dakayu.

²¹ Ngem awan pe̍ lugud panursuru toley nga di nu nga paliiwen nga nalaing. Ket diya kustu nga banbanag, ipateg nu.

²² Ket diya amin nga dake̍c nga banbanag, adeyyuwan nu da met.

²³ Sapay kuma ta palinteggen nakayu nge̍ Apu Diyus nga mange̍cde̍ ka talna na, tasun awan nga pulus maipabasul dakayu. Ket aywanan na kuma pe̍ diya nakem nu, diya biyag nu, se̍ diya beggi nu, tasun mailisi kuma didi iya amin nga pagbasulan. Agten iyan kuma agingga mettas iya umbe̍t niya Apu tida nga Je̍su Kristu.

²⁴ Ket e̍ Apu Diyus nga nangpili dakayu, tungpalen na ngarud ya agten iyan, ta tungpalen ngarud ne̍ Apu Diyus diya kari na.

²⁵ Kakabsat, ikarkararagan dakami kuma pe̍.

²⁶ Ket iyagec nu kay ya sipupudnu nga pakumustac kadiya amin nga kakabsat tida ennan.

²⁷ Ket gapu iya turay nga ne̍cde̍ niya Apu iyaken, ibilin ku nga sipapasnec dakayu nga ibasa nu yani nga surat mi kadiya amin nga kakabsat tida ka pammati iyan.

²⁸ Ket uwed kuma dakayu ya siaayat nga asi niya Apu tida nga Je̍su Kristu.