1 Te̍salunika 3 - Ya Baru nga Tulag

¹ Dikad pe̍ ito napalausin to essut mi dakayu, nabaru, kunen mi, no mabati kami ngas nge̍ Silas ka Ate̍nas.

² Ket ya nibon mi, e̍ Timutyu nga kabsat tida nga kabulun mi nga agpaay e̍ Apu Diyus iya pannakaisursuru niya Makaparagsac nga Damag maipanggep e̍ Kristu. Nibon mi nga mawe̍ mangpagaget se̍ mangpabileg dakayu iya panamati nu.

³ Nibon mi ngarud nge̍ Timutyu iya edyan nu tasun awan kuma mariribukan dakayu gapu kadiya pakaparparigatan nu. Ta sigud nu met nga emmu nga dactida nga mamati, mairaman tida ngarud ka pannakaparparigat.

⁴ Ta ito uwed kami pekkem iya edyan nu, nipacpakona mi nga nipalawag dakayu nga maparigatan tida nad met. Ket emmu nu ngarud nga tutu mettin, ta nadatnganin dakayu to agten ito kunen mi itun.

⁵ Ket itu ya gapu na nga nibon ku nge̍ Timutyu, ta maalinasag gac kun iya danag ku. Nibon ku ngarud tasun emmuwen mi no nabileg pekkem ya panamati nu. Ta madanagan nac ngamin, kaynun no sinulisug nakayun nge̍ Satanas, tasun awan sirsirbi yin nito bannug mi ito kauwed mi dakayu itun.

To nipadamag ne̍ Timutyu

⁶ Ngem ita, simoli idi nin nge̍ Timutyu. Ket nipadamag na ya makaparagsac nga sasaaden niya panamati se̍ ayat nu. Nakagi na pe̍ nga pe̍yeng dakami kanu nga laglagipen nga siaanggem, se̍ masut kayu kanu nga makasingen dakami nga agten met iya essut mi nga makasingen kuma dakayun.

⁷ Ket gapu iyan nga damag, kakabsat, maliwliwa kamin maipanggep dakayu. Ket orey adu ya pakasicsikuran se̍ pakarigatan mi ennid, naragsakan kami pekkem gapu ito damag maipanggep iya nabileg nga panamati nu.

⁸ Ket ita, nakarinawa kamin, ta naemmuwan mi nga sipapati kayu iya Apu.

⁹ Ket se̍ napalaus ya panagyaman mi e̍ Apu Diyus gapu dakayu, ta dakayu met ya paganggemman mi iya imatang niya Diyus tida.

¹⁰ Ket orey algew-gabi, sipapasnec kami nga agad-adeng e̍ Apu Diyus nga no mabalin, agsisingen tida kuma manin, tasun an-anayan mi kuma ya orey nagan na nga pagkurangan pekkem iya panamati nu.

¹¹ Ket itan, no dakami, ya Diyus tida mettas nga Ama tida se̍ ya Apu tida nga Je̍sus, igida kuma ya mangiturung iya ipeppen mi iya edyan nu.

¹² Ket no dakayu, pagbalinen kuma niya Apu nga nabileg se̍ napalaus nga unay ya panagayat nu iya tunggal isa dakayu iyan, se̍ kadiya amin nga toley. Ta nabileg kuma met nga agten mettas iya panagayat mi dakayu.

¹³ Ket no agten iyan, pabilgen nad niya Apu diya panpanunut nu, tasun ig-igina ngas ya pangipaayan nu iya panagbiyag nu, nga awan nad pakapilawan nu iya imatang ne̍ Apu Diyus nga Diyus se̍ Ama tida, no umbe̍t nad manin ya Apu tida nga Je̍sus agraman kadiya amin nga toley na.