1 Pe̍dru 5 - Ya Baru nga Tulag

Pamagbaga kadiya bungguy diya mamati

¹ Dikad pe̍, gapu kadiyan nga banbanag, uwed ibagbagac dakayu nga panglakayen diya bungguy diya mamati. Ta iyaken ya isa nga pada nu nga panglakayen, se̍ isa ngac pe̍ nga nakasingen kadito pannakaparparigat ne̍ Kristu. Se̍ iyaken pe̍ ya isa nga maibulun nad igina iya pakaidayawan na nga dandani maipasingen nin.

² Ket idi ya ibagac dakayu nga panglakayen: Aywanan nu kuma ngarud diya bungguy ne̍ Apu Diyus nga naitalec dakayu, ngem bekken kuma nga gapu ta mapilit kayu iya panangaywan nu, no di lugud disnudu nu kuma ngin, nga maikanatad iya gabay ne̍ Apu Diyus. Se̍ ya panangaywan nu igida, bekken kuma nga siaagum kayu tasun matangdanan kayu kuma, no di lugud gapu iya pudnu nga tarigagay nu nga agsirbi.

³ Madi kayu pe̍ piliten diya naitalec dakayu, nga arig nga dakayu ya apu da, no di kuma lugud agbalin kayu kuma met nga pagulidanan da.

⁴ Ket nad no agparangin ya Kangatuwan nga Agay-aywan, mae̍cdan kayu ka pangpadayaw dakayu nga arig nga balangat nga madi agkupas.

⁵ Ket dakayu nga naeb-ebbing nga lalaki, paiturayan kayu kuma kadiya lallakay. Se̍ dakayu nga amin, masapul nga napakumbaba kayu iya imatang niya tunggal isa dakayu. Ta laglagipen nu kuma ya kunen na iya Bibliya nga, “Kagura ne̍ Apu Diyus diya natangsit, ngem kaasiyan na diya napakumbaba,” kunen na.

⁶ Itu nga agpakumbaba kayu ngarudin, nga paiturayan kayu iya nabileg nga kinaturay ne̍ Apu Diyus, tasun padayawen nakayu no madatngan nad ya timpu nga iyan.

⁷ Ket italec nu kuma ngasin igina diya amin nga dandanag nu, ta e̍ Apu Diyus met ya makaemmu dakayu.

⁸ Agtanang kayu se̍ agsalsalukag kayu kuma pe̍. Ta ya kakuntra nu nga diyablu, arig nga di makatalna nga liyun nga ngumerngernger nga agsapsapul ka kanen na.

⁹ Ngem kuntraen nu lugudin, nga sinanama kayu ngas iya pammati nu e̍ Apu Diyus. Ket silalagip kayu nga agten met pe̍ iyan ya panagrigat nga laklak-amen diya kakabsat nu ka pammati iya amin nga lubung ngi.

¹⁰ Ket e̍ Apu Diyus mettas nga pagtaudan niya amin nga siaayat nga asi, se̍ ya nangpili dakayu nga mairaman iya agnanayun nga pannakaidayaw na gapu e̍ Kristu. Ket igina mettas ya mangan-anay nad dakayu, no malpas yan nga e̍teng nga panagrigat nu. Ket patalgedden nakayu se̍ pabilgen nakayu nad pe̍.

¹¹ Sapay kuma ta igina ya agituray ka agnanayun nga awan kuma panagpatingga na. Agten iyan kuma ngin.

To pakumusta ne̍ Pe̍dru

¹² E̍ Silbanu nga ibilang ku nga mapagtalkan nga kabsat, igina ya pinagsurat ku idi nga e̍teng nga surat ku dakayu. Ket nisurat ku yani dakayu tasun bagbagaan nakayu, se̍ tasun ipanecnec ku dakayu nga ya pudnu nga siaayat nga panangaasi ne̍ Apu Diyus, ket agten mettas idi nga nisurat ku. Dikad pe̍ pagnamnamaan nu kuma ngarud yani nga panangaasi na dakayu.

¹³ Ket ya bungguy mamati idi Babilunya nga pada nu nga pinili ne̍ Apu Diyus, pakumustaan dakayu kanu. Se̍ e̍ Markus pe̍ nga ibilang ku nga anac, agpakumusta kanu pe̍ dakayu.

¹⁴ Ket dakayu, agkikinnablaaw kayu kuma ka siaayat nga agec nga pangkumusta nu. Ket sapay kuma ta talna ngas ya uwed dakayu nga naitipun e̍ Kristu win.