1 Pe̍dru 4 - Ya Baru nga Tulag

Ya kabarbaru nga panagbiyag tida

¹ Ket iya agten iyan, gapu ta nagsagaba ya beggi ne̍ Kristu itun, sisasagana kayu kuma pe̍ nga agsagaba nga agten igina. Ta emmu tida nga ya toley nga nagsagaba ya beggi na, nagsardeng pe̍ yin iya panagbasul na.

² Ket no agten iyan, bekken nin nga diya dake̍c nga tarigagay niya kinatoley na ya tungtungpalen nan iya panagbibiyag na pekkem idi nga lubung, no di diyan nas gabay ne̍ Apu Diyus ya pe̍yeng na nga tungtungpalen nin.

³ Ta itun, adu ya pinirdi nu nga timpu nun, nga agwangwangel kadiya agten mettas nga wangwanglen diya madi mamati e̍ Apu Diyus. Ta nabayag kayu itun nga nagbibiyag ka biyag nga awan panagtimbeng kadiya dake̍c nga tarigagay diya beggi nu se̍ ya panangtungpal nu kadiya ricricna diya beggi nu. Nagwangwangel kayu ka naalas itun, se̍ naglablabes ya panagragragsac nu, se̍ nage̍e̍nglew kayu pe̍. Se̍ inariman nu pe̍ ya niparit ne̍ Apu Diyus, ta nagdaydayaw kayu kadiya didiyusen.

⁴ Ket diya kabulun nu itun, nasdaaw da itan, ta madi da maawatan no ape̍ nga madi kayu gabay ya makitipun igidan iya nalaka da nga panangtungpal kadito napalaus nga panagluku. Ket itu nga mamadpadake̍c da ngas dakayun.

⁵ Ngem sungbatan da nad nga mismu e̍ Apu Diyus maipanggep kadiya wangwanglen da. Ket igina, nakasagana met nga mangikeddeng iya pagbanagan diya toley nga sibibiyag se̍ orey diya nat-atey yin.

⁶ Ta orey diya nat-atey yin, naikasaba pe̍ igida itun ya Makaparagsac nga Damag. Ket agten iyan ngarud, tasun orey naukum da gapu iya panangeddeng diya toley igida ito sibebeggi da pekkem, agbiyag da met latta gapu iya kararuwa da, sigun mettas iya gangey ne̍ Apu Diyus.

Ya pannakabalin nga naitalec dactidan

⁷ Dandani met aggibus ya aminin, dikad pe̍ nanakem se̍ natanang kayu kuma nga managkararag.

⁸ Ket ya kangrunaan na, ituluy nu kuma nga pe̍yeng ya panagiinnayat nu nga sipapasnec. Ta ya panagayat, itu ya pakalingdan diya adu nga basbasul.

⁹ Ugaliyen nu ya agsisinnangaili kadiya kapada nu, nga awan kuma lucsew nu kadiya sangaili nu.

¹⁰ Ket sigun iya kabucbukudan nu nga pannakabalin nga nae̍cde̍ iya tunggal isa dakayu, usaren nu kuma iya panagsirbi nu kadiya kapada nu, tasun mayat ya panangusar nu kadiya nadumaduma nga ne̍cde̍ ne̍ Apu Diyus.

¹¹ Kaspagarigan no ya pannakabalin nga mangaskasaba kuma ya naitalec ikew, mangasaba ka ngarud, ngem silalagip ka kuma nga ya kagi ne̍ Apu Diyus met ya ikaskasaba mun. Ket no ya pannakabalin nga tumulung ya naitalec ikew, ket tumulung ka ngarud, ngem sitatalec ka iya kabaellan nga e̍cde̍ ne̍ Apu Diyus. Agten iyan kuma ya wanglen nu, tasun e̍ Apu Diyus ya maidaydayaw iya amin nga wangwanglen nu, gapu e̍ Je̍su Kristu, ta igina met ya maikari nga madayaw se̍ agturay ka agnanayun. Agten iyan kuma.

Ya panagsagaba gapu iya panamati tida

¹² Dakayu nga patpatgec, madi kayu kuma nga masdaaw kadiya pakapadasan nu nga agten ito pangngarig nga pannakapadas iya apuy, ta kadawyan nas met didi.

¹³ Aganggem kayu lugud no uwed pagrigatan nu, ta naibilang kayu nga makipagrigat e̍ Kristu win. Ket iya agten iyan, maragsakan kayu nad pe̍ nga unayin iya pannakaidaydayaw na.

¹⁴ Ket no mauyaw kayu gapu iya panamati nu e̍ Kristu, maragsakan kayu latta. Ta aged-edyan met dakayun ya Ispiritu nga pagtaudan niya dayaw, nga itu ya Ispiritu ne̍ Apu Diyus.

¹⁵ Ngem sapay kuma, ta bekken nga gapu ka winangel nu nga dake̍c ya pagrigatan nu, nga agten iya pumatey winno agtakew winno managdacdake̍c winno ya mangriribuc ka toley gapu kadiya bekken nu nga biyang.

¹⁶ Ngem no maparparigat kayu gapu iya panamati nu e̍ Kristu, madi kayu kuma iyalyew a, no di lugud idaydayaw nu kuma nge̍ Apu Diyus gapu mettas iya pannakairaman nu e̍ Kristu.

¹⁷ Ta timpu mettin niya panangukum ita, ket maariman nga mon-ona kadiya toltoley iya pamilya ne̍ Apu Diyus. Ket no dactida met ya mon-ona, di lugud nakarkaru nad pekkem ya pagbanagan diya madi mamati iya Makaparagsac nga Damag ne̍ Apu Diyus?

¹⁸ Agten ngarud ito naisurat iya Bibliya nga kunen na, “No narigat nga unay ya pannakaisalakan diya nanacman nga toley, di nakarkaru met ya dusa diya madi agdayaw e̍ Apu Diyus se̍ diya managbasul?” kunen na.

¹⁹ Dikad pe̍ dakayu nga maparparigat sigun iya panangipalubus ne̍ Apu Diyus, ituluy nu kuma ya panagariman nu kadiya nabaru. Italec nu kuma ngas e̍ Apu Diyus diya biyag nu, ta igina met ya Namarsuwa, ket siguradu nga managtungpal kadiya kari na.