1 Pe̍dru 3 - Ya Baru nga Tulag

Ya rebbeng diya siaasawaan

¹ Ket dakayu nga siaasawaan nga babey, rebbeng nu ya paiturayan kadiya asawa nu. Ta orey no uwed asawa nu nga madi da gabay ya mamati iya kagi ne̍ Apu Diyus, bareng no mamati da nad mettas, no masingen da diya nabaru nga ug-ugali nu nga as-asawa da, orey no awan ikagi nu igida.

² Ta maawis da ngarud nga mamati no masingen da ya kinaannad se̍ kinadalus niya panagbiyag nu.

³ Ket ya tutu nga kinapaw-is nu, masapul nga bekken nga ya maipasingen nga panangistimar nu kadiya beggi nu, agten met iya pangpapaw-is iya ebbuc nu, winno panagisimpa nu ka balituc nga alahas se̍ napaw-is nga kawkawwes nu.

⁴ Ya tutu nga kinapaw-is nu nga gennung, itu ngarud ya ipasingen nu gapu iya nabaru nga gangey nu nga tumaud iya nasingpet se̍ natalna nga nakem. Ta idi ya makapapaw-is dakayu nga madi agkupas, ket napateg met nga unay e̍ Apu Diyus.

⁵ Ta diya babey itun nga nangipaay iya panagbiyag da nga sinanama e̍ Apu Diyus, agten iyan pe̍ to namaay da. Ta nagpaituray da met kadiya as-asawa da, ket itu ya nangpapaw-is igida itun.

⁶ Agten iyan to Sara itun, ta nagtungpal ito Abraham nga asawa na, nga nibilang na nga apu na. Dikad pe̍ dakayu nga babey, maibilang kayu nga an-anac nito Sara no tungpalen nu diya nalinteg nga ug-ugali, nga pulus nga madi kayu nga agan-ansing.

⁷ Ket dakayu nga lalaki, nanakem kayu kuma kadiya asawa nu iya panagtipun nu, nga ibilang nu nga nakapkapsut ngem dakayu ya babey nga asawa nu. Ket idayaw nu da ngarud, ata gapu iya siaayat nga asi ne̍ Apu Diyus dactida, agpapada kayu nga mapatawidan ka biyag nga agnanayun. Agten iyan kuma ya wanglen nu tasun awan kuma makatiped iya panagkararag nu.

Ya panagsagaba diya mangtungpal iya nalinteg

⁸ Ket ita, idi ya mod-odi nga ibagac: Dakayu nga amin, ket agkaykaysa kayu kuma kadiya panpanunut nu. Agsisinnakit kayu kuma, se̍ agiinnayat kayu nga arig nga diya agkakabsat. Ket mangaasi kayu kuma, se̍ agpakumbaba kayu pe̍.

⁹ No dake̍c ya mawangel dakayu, madi kayu kuma bumalbales ka dake̍c. Se̍ orey no pagkagiyan dakayu ka dake̍c, madi kayu sungbatan ka dake̍c, no di lugud ikararagan nu da ngas kuma. Rebbeng nu ngarud ya agten iyan, ta maibagay met iya nakapiliyan nu tasun maipaayan kayu ka tulung ne̍ Apu Diyus.

¹⁰ Ta uwed naisurat iya Bibliya nga kunen na, “Ya mangipateg ka biyag se̍ iya ragsac nga e̍cde̍ niya biyag, masapul nga bay-an na ya agkagkagi ka dake̍c se̍ ya nasikap nga kagi.

¹¹ Masapul nga adeyyuwan na ya dake̍c, nga tungpalen na nga gennung ya nabaru win. Ket ya panagkikinnaawatan niya toley kuma ya ipatpateg na, ket se̍ igina kuma ya isa nga mangpatalna.

¹² Ta aywanan ne̍ Apu Diyus diya toley nga agariman iya nalinteg, se̍ denggen na ngarud diya kararag da. Ngem diya agariman ka dake̍c nga gennung, kuntraen na da met,” kunen na.

¹³ Ket no nabaru nga pe̍yeng ya tungtungpalen nu nga sipapasnec, nagan ngarud ya makaitured nga mangan-anu dakayu?

¹⁴ Ngem orey no maparigat kayu gapu iya panagariman nu ka nalinteg, paragsaken nakayu latta nge̍ Apu Diyus. Itu nga madi kayu kuma mansing kadiya toley nga mangparigat dakayu, se̍ madi kayu kuma pe̍ mariribukan gapu igida.

¹⁵ Ngem ya wangwanglen nu kuma nga gennung, lemlemtan nu nge̍ Kristu nga ipatpateg nu nga Apu. Se̍ pe̍yeng kayu kuma nga nakasagana nga mangipalawag no uwed agsaludsud maipanggep iya namnamaen nu gapu iya panamati nu. Ngem no agsungbat kayu igida, annadan nu kuma ya panagkagkagi nu, se̍ siraraem kayu kuma iya panagsungbat nu.

¹⁶ Ket agannad kayu pe̍ iya panagbiyag nu. Ta yan nas nadalus nga nakem ya uwed kuma dakayu, tasun diya manguyaw iya nabaru nga ugali nu gapu iya pannakitipun nu e̍ Kristu, nakal-alyew da ngas met no agkagi da ka mangpasakit iya nakem nu.

¹⁷ Ta no maparigat kayu gapu iya panagariman nu ka nabaru, nabarbaru met ngem iya maparigat kayu gapu ka panagariman nu ka dake̍c. Nabarbaru ngarud met, no itu ya ipalubus ne̍ Apu Diyus dakayu sigun iya tarigagay na.

¹⁸ Ket agten pe̍ iyan nge̍ Kristu. Ta igina, natey met nga nam-ame̍nsan itun nga naipaay kadiya basbasul, ket kustu win para iya amin nga timpu. Orey awan basul na, natey met para dactida nga toley nga sibabasul, tasun iyadenni nactida e̍ Apu Diyus. Ket tutu met, ata gapu iya beggi na, ket natey. Ngem gapu iya Ispiritu, napabiyag.

¹⁹ Ket iya agten mettas iyan, nawe̍ nangasaba itun kadito naibalud nga kararuwa.

²⁰ Itu dito kararuwa dito toley nga madi nagtungpal e̍ Apu Diyus ito timpu nito Nue̍. Nit-iton ne̍ Apu Diyus nga siaanus ya panagbabawi da itun, ito ar-arimanen pekkem nito Nue̍ to daung. Ket walwalu ngas met dito toley nga naglugan ito daung, nga itu to nakaisalakanan da gapu ito danum.

²¹ Ket ya pannakabautisar nu ita, maiyarig ito danum itun, ta itu pe̍ ya pakaisalakanan nu ita. Ngem bekken nga pakadalusan diya beggi nu ka rugit, no di itu ya panangipasingen nu e̍ Apu Diyus nga natalna ya nakem nun, gapu ito panagungar ne̍ Je̍su Kristu.

²² Ket e̍ Je̍su Kristu, nawe̍ ka langitin, nga uwed itan iya kadayawan nga edyan, nga itu ya madiwanan ne̍ Apu Diyus. Ket naipaituray iginan diya anghe̍le̍s se̍ diya amin nga duduma nga nailangitan nga uwed turay winno pannakabalin da.