1 Pe̍dru 2 - Ya Baru nga Tulag

¹ Dikad pe̍ gapu ta naibilang kayu nga nabalbaliwan nga naiyanac kin, masapul nga ipac nun diya amin nga dake̍c nga ganggangey nu, agten kadiya amin nga panagsikap se̍ panaginsisingpet, panagimun, se̍ amin nga panagumsi ka kapadpada nu.

² Arig kayu kuma nga kaiyanac nga ke̍bit nga napalaus ya ayat na nga sumusu. Agten kuma ngarud iyan ya ayat nu nga mangemmu iya kagi ne̍ Apu Diyus nga maiyarig ka nailangitan nga gatas nga awan kinadake̍c na. Itu ya tarigagayan nu kuma, tasun bumilbileg ya panamati nu patingga nga madatngan nu ya pakatungpalan niya pannakaisalakan nu,

³ ta naemmuwan nun nga managkaasi met ya Apu.

Ya sibibiyag nga batu

⁴ Umadenni kayu kuma ngarudin iya Apu nga maiyarig ka sibibiyag nga batu. Ket idi nga batu, nitemsit ngas diya toley. Ngem iya panangibilang ne̍ Apu Diyus nga gennung, itu ya pinili na se̍ napateg igina.

⁵ Ket dakayu, arig kayu pe̍ nga batbatu nga sibibiyag. Ket maurnus kayu ka isa nga bungguy, nga itu ya te̍mplu nga maipaay iya Ispiritu ne̍ Apu Diyus. Ket agten iyan ngarud, tasun agbalin kayu nga isa nga bungguy nga agsirsirbi ngas e̍ Apu Diyus. Ket diya di masingen nga banbanag nga ipaay nu igina, itu ya maibilang nga pagdatun nu nga magustuwan ne̍ Apu Diyus gapu e̍ Je̍su Kristu.

⁶ Ta naisurat iya Bibliya, nga kunen ne̍ Apu Diyus, “Singen nu, ta uwed batu nga isimpac iya ili nga Siyun, nga itu ya panuli nga batu nga pagsaadan, nga napili se̍ napateg. Ket diya mamati igina, pulus nga madi da mapaay,” kunen na.

⁷ Dikad pe̍ igina, napateg nga tutu win dakayu nga mamati igina. Ngem no diya bekken nga mamati igina, agten met ito naisurat iya Bibliya, nga kunen na, “Iyan mettas nga batu nga nitemsit ngas dito nangpatdec, nagbalin met nga itu ya kangrunaan nga panuli yin,” kunen na.

⁸ Ket kunen na pe̍, “Idi ya batu nga pakaisacdulan diya toltoley, se̍ itu yani ya dackel nga batu nga pakaiduclapan da,” kunen na. Ket maisacdul da ngarud, gapu ta madi da nga agtungpal iya kagi ne̍ Apu Diyus. Ket itu met yan ya nikeddeng na nga pagbanagan da.

⁹ Ngem dakayu, napili kayu nga toley ne̍ Apu Diyus, se̍ agsirsirbi kayu nga maipaay igina nga Ari tida. Dakayu pe̍ ya naibilang nga nasyun nga maipaay igina. Dakayu ngarud diya toley nga pinagbalin na nga dungdungnguwen na. Agten iyan ya nikeddeng ne̍ Apu Diyus, tasun dakayu kuma ya mangipakaemmu maipanggep iya kinadayaw na, nga igina ya nangisalakan dakayu iya arig nga gicbet, se̍ nisaad nakayun iya wada na nga nakaskasdaaw.

¹⁰ Itun, bekken kayu nga naibilang nga toley ne̍ Apu Diyus. Ngem ita, toley nakayun. Se̍ itun, madi kayu pekkem nae̍cdan iya asi na. Ngem ita, kinaasiyan nakayu mettasin.

Ya rebbeng diya toley ne̍ Apu Diyus

¹¹ Dakayu nga patpatgec, maibilang kayu nga sangsangaili se̍ gan-gannaet ngas met idi nga lubung. Itu nga bilinen nakayu nga sipapasnec, nga bekken kuma nga diya dake̍c nga tarigagay diya beggi nu ya tungtungpalen nu, ta mangkuntra didi kadiya nabaru nga panggep nu.

¹² Pe̍yeng nu kuma nga ipasingen diya nabaru nga ug-ugali nu kadiya toley nga di mamati e̍ Apu Diyus. Tasun iyan, orey kunen da ita nga dake̍c kayu kanu nga toley, malasin da met nga nabaru nga tutu diya wangwanglen nu. Ket iya agten iyan, dayawen da nad met nge̍ Apu Diyusin, no madatngan ya timpu niya pananglinteg na.

Rebbeng tida nga paiturayan kadiya agtuturay

¹³ Ket gapu iya ayat nu iya Apu, masapul nga paiturayan kayu kadiya amin nga agtuturay nga nisaad toley. Paiturayan kayu ngarud iya ari tida nga itu ya katurayan,

¹⁴ se̍ met pe̍ kadiya gugube̍rnadur nga ne̍cdan niya ari ka karbengngan da nga mangdusa kadiya toley nga agwangwangel ka dake̍c se̍ mangpadayaw kadiya agwangwangel ka nabaru.

¹⁵ Ta ya tarigagayan ne̍ Apu Diyus, ket idi: Gapu iya panangtungpal nu kadiya nabaru nga banbanag, awan mettin makunen diya agdarusudus nga toley nga mangpadake̍c maipanggep kadiya di da maawatan nga banbanag.

¹⁶ Tutu met nga uwed pakawayawayaan nu kadiya uwed turay da, itu nga agbiyag kayu kuma ngarud nga siwayawaya iya imatang ne̍ Apu Diyus. Ngem ya wayawaya nu, masapul nga madi kayu usaren nga gundaway nu nga agwangel ka dake̍c, no di lugud agbiyag kayu nga agsirsirbi e̍ Apu Diyus.

¹⁷ Dayawen nu ngarud amin nga toley. Ayaten nu diya kakabsat nu ka pammati. Se̍ ipatpateg nu ngarud nge̍ Apu Diyus, ket dayawen nu kuma pe̍ ya ari.

Rebbeng diya tagabu nga paiturayan kadiya amu da

¹⁸ Dakayu nga tagabu, paiturayan kayu kuma nga sidadayaw nga tutu kadiya amu nu. Bekken kuma ngas nga diya nanacman se̍ naasi nga amu nu ya pagtungpalan nu nga sidadayaw, no di lugud pe̍ diya nauyung.

¹⁹ Ta ipateg ne̍ Apu Diyus diya toley nga makaitured nga agrigat ka madi rumbeng igida, no anusan da ngas nga silalagip igina.

²⁰ Ket no uwed dake̍c nga winangel nu, awan met pakaidayawan nun, orey no itured nu kuma nga siaanus ya dusa nu nga danug. Ngem no nabaru nga gennung ya wangwanglen nu, se̍ maparparigat kayu pekkem, ipateg nakayu nge̍ Apu Diyus, no anusan nu.

Pagtuladan tida nge̍ Kristu

²¹ Rebbeng nu ngarud ya agan-anus kadiya rigrigat nu. Ta orey e̍ Kristu, nipasingen na dakayu ya nabaru nga pagtuladan nu, ta nagrigat pe̍ gapu dakayu. Itu nga tuladen nu kuma ngarudin, nga arig nga gudlan nu diya sugsugut na mettas.

²² Ket igina, awan winangel na nga basul, se̍ awan pe̍ nagicna igina nga nasikap nga kagi.

²³ Ket ito linais da, madi bimalbales nga limais. Ket ito nangparigat da igina, madi met namanpansing igida ka dusa da, no di lugud nitalec na ngas ya kasasaad na iya napudnu ya pananglinteg na, nga itu nge̍ Apu Diyus.

²⁴ E̍ Kristu mettas to nagagtu kadiya basbasul tida nga naibulun iya beggi na ito pannakailansa na ito krus. Agten iyan ngarud ya winangel na, tasun agbalin tida nga arig nga natey yin nga madi agbasbasulin, se̍ tasun agbiyag tida nga agpaay iya kinalinteg gin. Ket gapu ngarud ito pannakatalingu ne̍ Kristu, naagasan kayun.

²⁵ Ta itun, arig kayu nga karne̍ru nga naitewtew. Ngem ita, napasoli kayun iya Agay-aywan dakayu nga Agistimar dakayun.