1 Pe̍dru 1 - Ya Baru nga Tulag

¹ Iyaken nge̍ Pe̍dru, nga isa nga apustul nga agpaay e̍ Je̍su Kristu. Surat ku yani dakayu nga pinili ne̍ Apu Diyus nga toley na, nga dakayu nga arig nga gan-gannaet nga naiwaraswaras kadiya il-ili kadiya prubinsiya nga Puntu, Galasiya, Kapadusiya, Asiya, se̍ Be̍tanya.

² Suratan nakayu nga napili na maikanatad iya sigud nga panggep ne̍ Apu Diyus nga Ama. Ket ya Ispiritu na, pinagbalin nakayu nga agpaay ngas igina, tasun sumurut kayu kuma e̍ Je̍su Kristu, se̍ tasun madalusan kayu gapu ito daga na, nga arig nga nawarsiyan kayu. Sapay kuma ta nawadwad ya siaayat nga asi, se̍ talna, nga gayat e̍ Apu Diyus nga naipaay dakayu.

Ya namnama tida

³ Madaydayaw kuma ngarud nge̍ Apu Diyus, nga Diyus se̍ Ama niya Apu tida nga Je̍su Kristu! Ta gapu iya dackel nga asi na dactida, ne̍cdan nactida ka nabalbaliwanin nga pannakaiyanac. Itu ya nakabiyagan tida nga pagnamnamaan tidan, nga nae̍cde̍ dactida gapu iya panagungar ne̍ Je̍su Kristu.

⁴ Ket idi nga nabalbaliwan nga pannakaiyanac tida, itu pe̍ ya gapu na nga namnamaen tida ya maipaay nad dactida nga tawiden tida. Ket awan pulus pakapukawan winno pakamansaan niyan nga naisagana para dactida enna langit, ket agnanayun met ya pateg na.

⁵ Ket gapu iya panamati nu, aywanan nakayu nge̍ Apu Diyus gapu iya pannakabalin na patingga iya pakatungpalan niya naisagana nga pakaisalakanan tida nga maipakaemmu nad no kaodiyan nga algew.

⁶ Ket gapu idi nga panangaywan ne̍ Apu Diyus dakayu, agragsac kayu ngarud, orey no uwed maar-ariman pe̍ dakayu ita nga timpu nga e̍teng nga panagsagaba nu gapu kadiya nadumaduma nga pakaparparigatan nu.

⁷ Ket iya agten iyan, maiyarig ka balituc ya panamati nu. Ta ya balituc, mailunag ka apuy tasun maipac diya dake̍c na. Ket iya agten iyan, maemmuwan nga bicbiig nga balituc kin. Ngem ya balituc, uwed pannakapirdi na nga bekken nga agten iya panamati nu nga madi agpatingga. Napatpateg ngarud ya panamati nu ngem iya balituc, ket mapanecnekkan ya kinapudnu na gapu kadiya an-anus nu kadiya pakaparparigatan nu. Ket iya agten iyan, agbanag ya panamati nu ka pakaraemman, pakaidayawan se̍ pakapatgan nu nad iya panagparang ne̍ Je̍su Kristu.

⁸ Ket ipatpateg nu ngarud nge̍ Je̍su Kristu win, orey madi kayu nasingen itun. Se̍ orey ita nga di kayu masingen, mamati kayu met latta iginan. Ket gapu igina, agragsac kayun ka panagragsac nga madi maikagi ya kinakaskasdaaw na.

⁹ Ket ya pagbanagan niya panamati nu, maisalakan kayu met.

¹⁰ Ket dito mammadtu itun, nipadtu da met maipanggep ito inumbe̍t nga siaayat nga panangaasi ne̍ Apu Diyus dakayu. Ket idi nga pannakaisalakan nu, itu mettas to sinapsapul dito mammadtu iya laglagip da, se̍ lemlemtan da nga nalaing itun.

¹¹ Ginabay da ngarud nga emmuwen itun no nagan na se̍ no nungey nga mapasamac ya nipakaemmu niya Ispiritu ne̍ Kristu nga uwed igida, ito nipaipadtu na igida maipanggep iya pannakaparparigat ne̍ Kristu se̍ maipanggep iya pakaidayawan na kalpasan niya panagrigat na.

¹² Ket nipakaemmu ne̍ Apu Diyus kadito mammadtu itun nga bekken nga maipanggep igida itun ya kaipapennan nito panagsirsirbi da, no di lugud maipanggep dakayu ita nga timpu. Ket ita, itu yani ya Makaparagsac nga Damag nga nipakaemmu diya mangaskasaba dakayu, gapu iya Ispiritu Santu nga naibon nga gayat ka langit. Ket orey pe̍ diya anghe̍le̍s ne̍ Apu Diyus, kinalikaguman da met pe̍ nga maemmuwan kuma ya banag nidi nga damag.

Palinteggen tida kuma ya panagbiyag tida

¹³ Itu nga pabilgen nu ngarud ya panpanunut nu, se̍ tanangen nu met pe̍ ya panagpanpanunut nu. Ket isnup nu kuma ngas ya panangnamnama nu iya siaayat nga pakaasiyan nu nad no madatngan ya panagparang ne̍ Je̍su Kristu.

¹⁴ Ket ita, gapu ta anac nakayu nge̍ Apu Diyusin, agtudyu kayu ngarud igina. Ket madi kayu ngarud ipalubusin nga maturayan diya beggi nu kadiya dake̍c nga tarigagay nga tinungtungpal nu ito madi kayu pekkem makaawat itun.

¹⁵ Ket ya gangey nu nga gennung ita kadiya amin nga wangwanglen nun, ket nalinteg kuma met, nga maiparis kuma ngarud iya kinalinteg ne̍ Apu Diyus nga nangawis dakayu.

¹⁶ Agten iyan kuma, ta uwed naisurat iya Bibliya nga kunen na, “Madi kayu agbasul, ta awan basul ku,” kunen na.

¹⁷ Ket emmu tida nga e̍ Apu Diyus, awan idumduma na iya panangeddeng na, no di lugud mangikeddeng iya pagbanagan niya tunggal isa nga toley sigun nas iya wangel da. Ket igina met ya aw-awagan nu nga Ama nu, itu nga bayat niya pannakaibilang nu nga gan-gannaet idi nga lubung, masapul ngarud nga pe̍yeng nga timbengngen nu ya panagbiyag nu nga siaannad.

¹⁸ Ta emmu nu mettin nga nawayawayaan kayun kadiya awan sirsirbi na nga ugali nga natawid nu kadito am-ama nu. Se̍ emmu nu met nga bekken nga ya kuwarta winno balituc nga uwed pannakapirdi na ya nanubbut dakayu,

¹⁹ no di lugud ya napateg nga daga ne̍ Kristu nga naiyayus. Ket yan nga daga, arig nga daga niya isa nga naidatun nga urbun karne̍ru. Ket idi nga arig nga urbun karne̍ru, awan pulus pagkurangan winno pakapilawan na.

²⁰ Ket orey ito di pekkem naparsuwa yani nga lubung, e̍ Kristu ya napili yin nga maibon maikanatad iya sigud nga panggep ne̍ Apu Diyus. Ket iya ita nga kaodiyan nga timpu, naipakaemmu nge̍ Kristu win tasun agpaay dakayun.

²¹ Ket gapu igina, mamati kayu e̍ Apu Diyusin. Igina ya nangpaungar se̍ nangpadayaw e̍ Kristu, itu nga e̍ Apu Diyus ya patpatiyen se̍ namnamaen nun.

Ya agnanayun nga kagi ne̍ Apu Diyus

²² Ket itan, nadalusan kayu mettin gapu iya panagtungpal nu iya kinapudnu. Dikad pe̍ uwed din dakayu ya napudnu nga panagayat kadiya kakabsat nu ka pammati yin. Itu nga ipasnec nu kuma ngin ya napudnu nga panagiinnayat nu.

²³ Agten iyan kuma ngarud, ata naibilang kayu nga nabalbaliwan nga naiyanac kin. Ket idi nga nangputut dakayun, bekken nga isa nga uwed pannakatey na, no di lugud pulus nga awan panagpatingga na. Ket idi nga nabalbaliwan nga pannakaiyanac nu, gapu mettas iya kagi ne̍ Apu Diyus nga mange̍cde̍ ka biyag se̍ agpaut ka agnanayun.

²⁴ Ta agten iya naisurat iya Bibliya nga kunen na, “Amin nga maiyanac ka kinatoley, mabalin nga maiyarig ngas kadiya rucruut. Ket amin nga dayaw toley, maiyarig ngas kadiya bellad rucruut. Ta macrit ngas diya rucruut, ket agterkag ngasin diya bellad da.

²⁵ Ngem ya kagi niya Apu, agnanayun nga gennung,” kunen na. Ket ya kagi nga kunen na iyan, itu met ya Makaparagsac nga Damag nga naikaskasaba dakayun.