1 Kurintu 9 - Ya Baru nga Tulag

Diya kalinteggan diya apustule̍s

¹ Ket no iyaken, siwayawaya ngac ngarud nga mangwangel kadiya gabay ku nga wanglen. Isa ngac met nga apustul. Ngarud, iyaken met pe̍ ya isa kadito nakasingen e̍ Je̍sus nga Apu tida. Ket dakayu mettas ya pagbanagan niya panagbannug ku nga maigapu iya Apu.

² Ket no diya duduma, mabalin nga di dac ibilang nga isa nga apustul. Ngem no dakayu, ibilang dac ngarud nga apustul latta. Ta no maigapu iya Apu, dakayu nga mamati yin ya pakasingnan iya pammanecnec na nga apustul lac nga tutu.

³ Ket no uwed da mangdellaw iyaken maipanggep iya kinaapustul ku, agten idi ya isungbat ku igida:

⁴ Ape̍? Awan kad kalinteggan mi nga mae̍cdan ka kanen mi se̍ inumen mi?

⁵ Se̍ orey no uwed kuma itarey mi nga asawa nga pada mi nga mamati, di ngarud kalinteggan mi pe̍? Ta agten met iyan ya wangwanglen dito duduma nga apustule̍s, agten pe̍ kadito kakabsat niya Apu, se̍ agten pe̍ e̍ Pe̍dru.

⁶ Winno maiduma kami aya nge̍ Be̍rnabe̍, tasun dakami ngas nga duwa ya masapul nga mangged ka pagbiyag mi?

⁷ Kaspagarigan no ya suldadu, bekken met nga igina ya aggastu kadiya kasapulan na. Ket agten pe̍ ya agmula ka ubas iya lapug na, di ngarud kalinteggan na pe̍ ya mangan iya apit na? Agten met pe̍ ya toley nga tumaraken ka karne̍ru, ta di kad kalinteggan na met ya uminum iya gatas diya karne̍ru nga ay-aywanan na?

⁸ Ket didi nga kagiyec idi maipanggep iya kalinteggac, bekken met nga kapanunutan nas toley, ta itu pe̍ ya kunen na iya Bibliya.

⁹ Ta naisurat iya Linteg ne̍ Muyse̍s nga kunen na, “Madi ka busalan ya baka nga madama nga pagwangwangel mu nga pagrunrunas mu ka emmey, tasun nawaya kuma nga mangan,” kunen na. Ket pangngarig pe̍ yani, ta bekken met nga baka ngas ya kayat ne̍ Apu Diyus nga kagiyen idi.

¹⁰ Ta toley ngarud met pe̍ ya kayat na nga kagiyen iyan nga pangngarig. Ngarud, niturung na yan nga pangngarig dakami, ta maiyarig kami pe̍ iya isa nga agar-aradu. Ta ya agar-aradu, sinanama kuma iya bingay na nad iya apiten na, agten pe̍ iya toley nga agrunas. Ta sinanama kuma pe̍ iya bingay na iya pagbanagan niya panagbannug na.

¹¹ Ket dakami nga apustule̍s, arig kami nga nangimula dakayu iya sursuru maipanggep e̍ Apu Diyus. Ket iya agten iyan, di ngarud aya kalinteggan mi met pe̍ ya arig nga mangapit dakayu kadiya maipanggep iya pagbiyag mi?

¹² Ta uwed da met duduma nga agkunen nga kalinteggan da kanu ya agpatulung dakayu. Di aya dacdackel pekkem ya kalinteggan mi? Ngem orey kalinteggan mi nga tutu ya agadeng dakayu ka kasapulan mi, madi kami latta nagad-adeng. Inanusan mi ngas ya orey nagan na, tasun awan wanglen mi nga makatiped iya pannakaiwaragawag niya Makaparagsac nga Damag maipanggep e̍ Kristu.

¹³ Ngem lagipen nu diya agsirsirbi iya Te̍mplu, ta emmu tida ngarud nga agtaud mettas iya Te̍mplu ya pagbiyag da. Ket agten met kadiya agsirsirbi nga agidatdatun iya pagdatunan enna Te̍mplu, maibingayan da met kadiya maidatun iyan.

¹⁴ Ket agten iyan ngarud met pe̍ ya bilin niya Apu kadiya mangipakaemmu iya Makaparagsac nga Damag, ta kalinteggan mi met ya maiyistimaran kadiya toley nga pangikasabaan mi.

¹⁵ Ngem orey kalinteggac ya mae̍cdan kuma kadiya kasapulac, bekken nga itu diyan ya linaglagip ku itun. Se̍ madi yac met nagsurat idi ita tasun mae̍cde̍ kuma iyaken diyan nga kalinteggac. Ta nabarbaru ngas no matey yac kuma ya kunec, ngem iya uwed mangipac idi nga ugalic nga pagpasindayaw ku.

¹⁶ Ngem no maipanggep iya panangikasabac iya Makaparagsac nga Damag, awan lugud pagpasindayaw ku. Ta panangtungpal ku ngas yani iya rebbeng niya pannakaibon ku, ket itu ya mangpilit iyaken. Ngarud, kackaasi met ya kasasaad ku no di yac tungpalen ya rebbeng ku nga mangikasaba iya Makaparagsac nga Damag.

¹⁷ Ket tutu met nga no agtungpal lac iya panangasabac gapu ngas iya kabucbukudac nga nakem, matangdanan nac ngarud. Ngem bekken nga agten iyan ya gapu niya panagtungpal ku, no di lugud gapu ta pagrebngac met yani nga wangel nga naitalec iyaken.

¹⁸ Ket ya ibilang ku nga tangdan ku idi nga wangel ku, ket itu ya pannakapalubus ku nga manglikud iya kalinteggan nga kuwac gapu iya panangikasabac iya Makaparagsac nga Damag. Ta ikaskasabac ya Makaparagsac nga Damag nga awan ipasubalit ku kadiya toley nga pangikasabaac.

¹⁹ Agten iyan ngarud, ta ya kinapudnu na, orey no siwayawaya ngac nga toley, ibilang ku latta ya beggic nga arig nga tagabu diya amin nga toley, tasun adu kuma diya maawis nga mamati e̍ Kristu gapu iyaken.

²⁰ Itu nga ito uwed dac iya edyan diya Hudyu, nagbiyag gac nga maipada iya ugali da, tasun adu kuma igida ya maawis ku nga mamati. Ket orey madi yac paiturayan ito Linteg ne̍ Muyse̍sin, ket ito nakibulubulun nac kadiya pasurut pekkem nito Linteg, nibagbagay ku met ya ugalic iya ugali da, tasun maawis ku da kuma nga mamati e̍ Kristu.

²¹ Ket ito uwed dac iya edyan diya bekken nga Hudyu, nibagbagay ku manin ya ugalic iya ugali da, nga madi yac nakibiyang iya Linteg diya Hudyu win, tasun diya bekken nga Hudyu kuma pe̍ yin ya maawis ku nga mamati e̍ Kristu. Ngem madic ngarud kayat nga kagiyen nga baybay-ac ya linteg ne̍ Apu Diyus ito nakibulubulun nac kadiya bekken nga Hudyu, ta tungtungpalec ngarud ya linteg ne̍ Kristu.

²² Ket ito nakibulun nac kadiya kurang pekkem ya pannakaawat da maipanggep iya pammati tida, nagbalin nac met nga agten pe̍ igida, tasun maawis ku da kuma pe̍. Ngarud, nibagbagay ku ya kasasaad ku kadiya kasasaad diya orey nagan na nga toley nga pakaibulunac, tasun siguradu nga uwed da maawis ku igida nga mamati.

²³ Ket agten iyan ngarud ya wanglec kadiya amin nga pangawis ku, gapu ta tarigagayac nga maiwarwaragawag kuma ya Makaparagsac nga Damag, tasun maibulun nac kuma kadiya duduma nga toltoley nga aglak-am iya makaparagsac nga pagbanagan niyan nga damag.

²⁴ Kaspagarigan no diya makilumba ka tagtag, ket orey adu diya makilumba, is-isa ngas met ya mangabac, ket itu ya pakae̍cde̍yan niya gun-guna. Ket agten kuma pe̍ iyan ya kinapasnec nu, tasun magun-ud nu nad pe̍ ya pannakagun-guna nu.

²⁵ Ket no diya makikonte̍s, timbengngen ngarud nga nalaing niya tunggal isa igida ya beggi na, tasun magun-ud da kuma ya balangat nga maigun-guna. Ket ya agten iyan nga gun-guna da, madi met agpaut ka mabayag, no di ngas mapukaw. Ngem ya magun-ud tida nga gennung, itu ya gun-guna nga madi mapukaw.

²⁶ Itu nga no iyaken, agpasnekkac nga arig nga agtarus nga managtag agingga ka makadateng ngac iya pagpatinggaan niya lumba. Se̍ arig gac pe̍ nga isa nga dumadanug nga itama na met ya danug na, nga bekken nac nga arig nga dumanug ngas ka belluut.

²⁷ Ta no iyaken, iruwam ku nga nalaing ya beggic ka rigat nga arig nga danugec ya beggic agingga ka matngel kun diya ricricnac. Ket arig nga tagabuwec ya beggic, ta bekken nga diya gabay niya beggic ya tungtungpalec kun. Ta no madi yac emmu ya mangituray iya beggic, kaynun no agbalin nac nga agten iya makikonte̍s nga madi maikari nga magun-gunaan, orey no iyaken mettas ya arig nga mangisuru kadiya duduma nga makikonte̍s.