1 Kurintu 8 - Ya Baru nga Tulag

Maipanggep kadiya makan nga naidatun ka didiyusen

¹ Ket no maipanggep kadiya makan nga naidatunin kadiya didiyusen, idi ya makunec: Tutu met to kunen nu nga maawatan tida nga aminin ya kinapudnu maipanggep kadidi nin. Ngem ya kinapudnu na pe̍, ket mangpatangsit iya toley ya pannakaemmu na. Ngem ya panagayat nga gennung, mangpabileg met iya toley.

² Dikad pe̍ ya sitatangsit nga agkunen nga uwed kanu pannakaemmu nan, ket uwed pekkem lugud pagkurangan na iya pannakaawat na.

³ Ngem ya toley nga agayat e̍ Apu Diyus, itu pe̍ yin ya annamungan ne̍ Apu Diyus.

⁴ Itu nga no maipanggep kadiya makan nga naidatunin ka didiyusen, uwed ngarud dactidan ya pannakaemmu nga awan met nga tutu sirsirbi diya didiyusen, se̍ emmu tida pe̍ nga is-isa ngas met ya tutu nga Diyus.

⁵ Ket pudnu met nga uwed da daydayawen diya toley nga diyus da kanu idi nga lubung se̍ iya ngudu pe̍. Ta adu da nga ibilang diya toley nga diyus da, se̍ diya ibilang da nga apu da.

⁶ Ngem no dactida nga mamati, is-isa ngas ya ibilang tida nga Diyus tida, nga itu nge̍ Apu Diyus nga Ama, nga igina ya pagtaudan niya amin, se̍ igina pe̍ ya pagpaayan tida. Ket is-isa pe̍ ya ibilang tida nga Apu tida, nga itu nge̍ Je̍su Kristu, nga igina ya paggayatan niya amin, se̍ igina met pe̍ ya gapu niya kinauwed niya biyag tida.

⁷ Ngem uwed da pekkem toley nga madi pekkem makaemmu kadidi nga maipanggep kadiya didiyusen. Ta uwed duduma nga toley nga naruwam da itun iya panagtungpal kadiya didiyusen. Ket orey ita, no mangan da iya naidatun kadiya didiyusen, ipagarup da pekkem nga tutu nga kuwa diya didiyusen yan nga kanen da. Itu nga mariribuc ya panpanunut da nga arig nga mamansaanin, ta kurang pekkem ya pannakaawat da maipanggep kadidi.

⁸ Ngem emmu tida nga diya macmakan, bekken met nga itu diya agsirbi nga mangiyadenni dactida e̍ Apu Diyus. Ta bekken tida met nga pagkurangan no madi tida kanen, ket no kanen tida, bekken tida met pe̍ nga paglaingan iya imatang ne̍ Apu Diyus.

⁹ Ngem orey maawatan nu yani nga kalinteggan tida maipanggep iya kanen, agannad kayu was, ta kaynun no itu lugud ya arig nga pakaisacdulan diya kurang pekkem ya pannakaawat na.

¹⁰ Kaspagarigan dakayu nga makaemmu nga awan sirsirbi diya didiyusen. No uwed isa dakayu nga mawe̍ iya isa nga pagdaydayawan da kadiya didiyusen, ket makisangu ka kuma nga mangan antuni, se̍ kaspagarigan masingen naka ya isa nga kurang pekkem ya pannakaawat na maipanggep kadidi, kaynun no mapatured nga mangan kadiya makan nga naidatun kadiya didiyusen, orey no ipagarup na nga dake̍c.

¹¹ Ket no agten iyan ya mapasamac, ket ya pannakaemmum mettas maipanggep iya kalinteggan tida, itu lugudin ya agbalin nga pakapirdiyan niya panamati niya kabsat mu nga kurang pekkem ya pannakaawat na. Ngarud, pirdiyem ya kabsat mu nga nakaigapuwan mettas nito pannakatey ne̍ Kristu!

¹² Dikad pe̍ e̍ Kristu ngarud met ya tutu nga pagbasulam mun no agten iyan, ta nakabasul ka iya kabsat mu ka pammati, gapu ta pasakitem ya panpanunut niya isa nga kurang pekkem ya pannakaawat na, nga arig nga bacbautem.

¹³ Dikad pe̍ no ya pannangan ku ka karni nga naidatun kadiya didiyusen ya pakaigapuwan niya pakaisacdulan niya kabsat ku ka pammati, ket pulus nga madi yac ngarud mangan kadiyanin, tasun madic kuma arimanen ya pakaisacdulan niya isa nga kabsat ku.