1 Kurintu 7 - Ya Baru nga Tulag

Maipanggep kadiya siaasawaan

¹ Ket ita, no maipanggep kadito saludsud ito surat nu, ket kunec nga uwed met paglaingan niya isa nga lalaki no awan asawa na.

² Ngem gapu iya kinauwed niya pannakikamalala, nabarbaru lugud no mangasawa kuma ya tunggal lalaki. Agten pe̍ kadiya babey, uwed kuma pe̍ asawa niya tunggal isa igida.

³ Ket no maipanggep kadiya siaasawaanin, tungpalen kuma niya lalaki ya rebbeng na iya asawa na, sigun iya gangey diya siaasawaan. Agten met ya babey, tungtungpalen na kuma pe̍ ya rebbeng na iya asawa na.

⁴ Ta bekken nin nga ya babey ya mangituray iya beggi nan, no di lugud ya asawa na. Ket agten pe̍ iyan ya lalaki, ta bekken nin nga igina ya mangituray iya beggi na, no di ya asawa na.

⁵ Itu nga dakayu nga siaasawaanin, madi kayu kuma agpaidam iya asawa nu, malacsid no pagtulagan nu ya baet na nga agitured kayu kadiya ricna diya beggi nu, tasun maisnup nu ya agkararag. Ngem kalpasan niyan, agadenni kayu mettas manin, ta kaynun no sulisugen nakayu nge̍ Satanas gapu iya madi nu maitured nga ricna niya beggi nu.

⁶ Ket agten iyan ngarud ya ibagac maipanggep iya panagasawa, ngem bekken nga bilin, no di lugud maipalubus ngas dakayu.

⁷ Ta no iyaken, maymayat lugud no diya amin nga toley, agten da kuma iyaken nga awan asawa na. Ngem bekken tida met nga agpapada nga ne̍cdan ne̍ Apu Diyus ka kabaellan maipanggep idi, ta nadumaduma ya kabaellan nga nae̍cde̍ iya tunggal isa dactida.

⁸ Ket no diya awan pekkem asawa na se̍ diya balu, ket kunec nga nabarbaru no madi da mangas-asawa ngin nga agten iyaken.

⁹ Ngem no madi da matimbeng ya beggi da, nabaru no mangasawa dan. Ta nabarbaru ngarud no mangasawa ya isa nga toley ngem iya paiturayan ka arig-apuy nga ricna niya beggi na.

¹⁰ Ket no diya siaasawaanin, uwed ibilin ku igida. Ket bekken ku nga bilin yani, no di bilin niya Apu dakayu: Madi kuma ngarud nga makisina ya babey iya asawa na.

¹¹ Ngem no sumina latta ya babey, basta agis-isa ngasin, winno makitunus manin nga makitipun ito sigud nga asawa na. Ket agten met pe̍ ya lalaki, madi na kuma iyadi ya asawa na.

¹² Ket no dakayu nga duduma, uwed da pe̍ ibilin ku dakayu. Bekken nga bilbilin niya Apu didi, a, no di kapanunutac: No bekken na nga pada nga mamati ya asawa na ya isa nga lalaki, se̍ no gabay niyan nga babey nga ituluy da ya panagasawa da, madi kuma iyadi niya lalaki.

¹³ Ket agten pe̍ ya babey nga mamati. No bekken na nga pada nga mamati ya asawa na, ngem no gabay na nga ituluy ya panagasawa da, madi kuma pe̍ iyadi niya babey.

¹⁴ Ta maannamungan met ya bekken nga mamati nga lalaki, gapu iya pannakitipun na iya asawa na nga mamati. Agten met nga maannamungan ya bekken nga mamati nga babey, gapu iya pannakitipun na iya asawa na nga mamati. Ta no bekken nga agten iyan, maibilang met nga dake̍c diya anac da iya imatang ne̍ Apu Diyus. Ngem ya kinapudnu na, maannamungan met pe̍ diya anac da.

¹⁵ Ngem no tarigagayan niya bekken nga mamati nga iyadi ya asawa na nga mamati, palubusan nu ngasin. Ta no tarigagayan niya madi mamati nga agadi latta, nawayawayaanin ya mamati iya rebbeng na iya panagasawa dan, orey lalaki man winno babey, ta talna ngas ya panggep ne̍ Apu Diyus nga uwed kuma iya panagbiyag tida.

¹⁶ Ta ya kinapudnu na, ket ya mamati nga babey, madi na met emmu no igina nad lugud ya gapu niya pakaisalakanan niya asawa na. Agten met pe̍ ya mamati nga lalaki, ket madi na met pe̍ emmu no igina nad lugud ya gapu niya pakaisalakanan niya asawa na.

Madi tida kuma kalucsew ya sigud nga kasasaad tida

¹⁷ Ket iya agten iyan, ya tunggal isa dactida, no nagan na to ne̍cde̍ niya Apu igina nga kasasaad na ito panangawis ne̍ Apu Diyus igina nga mamati, itu kuma ya ituluy na. Ket itu pe̍ ya ibilbilin ku kadiya amin nga bungguy diya mamati.

¹⁸ Ket ya lalaki nga natungpal iginan ya ugali diya Hudyu nga pannakakugit ito sacbay nga mamati, mayat mettin. Madi na kuma palingdan ya kugit na. Ket ya madi pekkem nga nakugit ito mamati yin, madi kuma agpakugitin.

¹⁹ Ta awan met mamaay nan no makugit ya toley yin winno bekken. Ta ya napatpateg gin, itu ya panagtungpal tida kadiya bilin ne̍ Apu Diyus.

²⁰ Ngarud, no nagan ya kasasaad niya isa nga toley ito sacbay nga naawis nga mamati, ituluy na kuma ngin.

²¹ Ket orey no tagabu kayu ito di kayu pekkem nga mamati, kustu kuma ngasin. Ngem no uwed gundaway nu nga mawayawayaan, kamuwen nu ngarudin.

²² Ta ya toley nga natagabu win ito sacbay nga panangawis niya Apu igina, naibilang nga siwayawaya nga toley niya Apu win. Ket ya bekken nga tagabu ito panangawis niya Apu igina nga mamati, ket naibilang met nga tagabu ne̍ Kristu win.

²³ Ket napateg nga unay to nangsaka ne̍ Apu Diyus dakayu. Itu nga madi kayu kuma ngarud patagabu iya panursuru toley yin.

²⁴ Ket iya agten iyan, kakabsat, no nagan to kasasaad niya tunggal isa dactida ito panangawis ne̍ Apu Diyus dactida, ituluy tida kuma nga sitatalec e̍ Apu Diyusin.

Maipanggep kadiya awan pekkem asawa na se̍ diya balu

²⁵ Ket no maipanggep kadiya babbalasang, uwed pe̍ ibagac. Bekken nga bilin niya Apu yani a, ngem ibagac ya uwed iya kapanunutac maipanggep idi, ta gapu iya panangaasi niya Apu iyaken, nagbalin nac nga mapagtalkan.

²⁶ Ket ya kunec, ket gapu iya pakaparparigatan tida iya agdama ngi, nabarbaru no agtultuluy kayu kuma ngas iya agdama nga kasasaad nun.

²⁷ Dikad pe̍ ya lalaki nga uwed asawa nan, madi na kuma nga iyad-adi ya asawa na. Ngem ya awan pekkem asawa na, ket kunec nga nabarbaru no madi agsapul ka asawa na.

²⁸ Ngem orey no mangasawa kayu kuma, bekken met nga basul. Se̍ diya babbalasang pe̍, no makiasawa da, bekken met pe̍ nga basul yan. Ngem diya siaasawaan, adu met diya pakarigatan da idi nga lubung. Ket ya gabay ku, ket maliclikan nu kuma ngas diyan nga pakarigatan toley.

²⁹ Ket kakabsat, agten idi ya kayat ku nga kagiyen: Bekken met nga mabayag ya gundaway tida idi nga timpu win. Itu nga manipud ita, diya uwed asawa na, kamuwen da kuma lugud ya panagbiyag da nga agten mettas iya panagsirsirbi diya awan asawa da.

³⁰ Agten pe̍ diya uwed pagladingitan na, agbiyag da kuma nga arig nga bekken nga naladingit. Se̍ diya uwed pagragsakan da, agbiyag da kuma nga arig nga bekken da nga naragsac. Se̍ diya agnginngina met pe̍, agbiyag da kuma lugud nga agten mettas iya panagsirbi diya awan sansanicwa na.

³¹ Ket orey idi nga lubung ya pagbibiyagan nu, bekken kuma nga diya tumaud idi diya ipangpangruna nun, ta malabes ngas met diya uwed idi nga lubung.

³² Agten iyan ya ibagbagac dakayu, ta gabay ku no mawayawayaan kayu kuma kadiya pagdanagan idi nga lubung. Agten iyan met ya kasasaad niya awan asawa na, ta isnup na ngas diya agpaay iya Apu, ta ya Apu ngas met ya gabay na nga ay-ayuwen.

³³ Ngem no ya siaasawaan nga lalaki, biyangan na pe̍ diya banbanag nga agsirbi ngas idi nga lubung, ta gabay na pe̍ ya mangay-ayu iya asawa na.

³⁴ Dikad pe̍ duwa ngin ya panpanunuten niya uwed asawa na. Ket agten pe̍ diya babey, ta diya babey nga awan asawa na se̍ diya balasang pekkem, ket isnup da pe̍ diya banbanag nga agpaay iya Apu, ta ipaay da igina ya orey beggi da se̍ ya panpanunut da. Ngem ya siaasawaan nga babey, biyangan na met pe̍ diya banbanag nga agsirbi ngas idi nga lubung, ta gabay na pe̍ ya mangay-ayu iya asawa na.

³⁵ Madic met ibaga didi tasun matngel kayu nga maparigatan, no di tasun paglaingan nu da, tasun diya kustu nga banbanag kuma ya tungtungpalen nu, se̍ tasun isnup nu kuma ya panagsirbi nu iya Apu.

³⁶ Ket no uwed lalaki nga madi kanu makatengngel iya ricna na maipanggep iya nubya na nga balasang, se̍ no nalabes ya kinaebbing niya babey yin, ket maiyasawa kuma ngas ya balasang iginan, no itu ya gabay niya lalaki. Bekken na nga pakabasulan yan.

³⁷ Ngem no uwed lalaki nga tarigagayan na kanu ya madi mangasawa iya balasang nga nubya na, se̍ no bekken nga mapilpilit ya lalaki maipanggep iyan, no di ket agdisnudu nga tutu nga mangtengngel iya ricna na, ket mayat met ya panggep na.

³⁸ Dikad pe̍ mayat met, orey no mangasawa winno madi mangasawa ya lalaki. Ngem maymayat lugud no madi.

³⁹ Ket ya babey nga uwed asawa na, bekken pekkem nga mawayawayaan iya katulagan da, bayat nga sibibiyag pekkem ya asawa na. Ngem no natey yin ya asawa na, siwayawaya manin nga makiasawa iya orey nagan na nga sabali, no isa nga pada na nga mamati iya Apu.

⁴⁰ Ngem no iya kapanunutac, nabarbaru ya kasasaad niya isa nga balu nga babey no madi makiasawa manin. Ket ya panagkunec, ket uwed met pe̍ iyaken ya panangidalan niya Ispiritu ne̍ Apu Diyus idi nga kapanunutac.