1 Kurintu 6 - Ya Baru nga Tulag

Maipanggep iya panangidarum iya kapada tida

¹ Ket no uwed riri niya isa dakayu iya kabsat na ka pammati, nakal-alyew met no idarum na iya imatang diya bekken nga mamati. Basta diya toley ne̍ Apu Diyus kuma diya manglinteg kadiya pada da nga mamati.

² Arig nga madi nu pekkem emmu nga dactida nga toley ne̍ Apu Diyus met diya manglinteg nad kadiya toltoley iya lubung. Ket no tutu met nga dakayu diya manglinteg nad kadiya toltoley idi nga lubung, ape̍ ngarud nga madi kayu pe̍ mabalin ya manglinteg kadiyan nga riri nu nga tekkut ngas nga banbanag ita?

³ Madi nu kad emmu nga dactida met pe̍ diya manglinteg nad kadiya anghe̍le̍s mettas? Dikad pe̍ di lugud nalaclaka ya pananglinteg nu ita kadiya kadawyan nas nga banbanag idi nga timpu?

⁴ Ngem no uwed riri nu, ape̍ nga ipausig nu met latta kadiya toley nga awan biyang da dakayu nga toley ne̍ Apu Diyus?

⁵ Agten iyan ya kunec dakayu, ta pakaiyal-alyewwan nu met yan nga wangwanglen nu. Ape̍? Di aya uwed da iya bungguy nu diya uwed sirib da nga makarisut kadiya riri diya kakabsat nu ka pammati?

⁶ Se̍pe̍ no uwed riri nu iya kabsat nu ka pammati, idarum nu met. Ket bekken nas nga iyan, ta ipausig nu met kadiya bekken nga mamati!

⁷ Ket orey ngas ya panagdidinnarum nu, itu mettin ya mangipasingen nga uwed nakaabakan nu iya panamati nun. Di nabarbaru no itured nu kuma ngas diya dake̍c nga maariman dakayu, se̍ no masuwitic kayu, ngem iya panangidarum nu iya kabsat nu?

⁸ Ngem ya wangwanglen nu nga gennung, dakayu mettas ya mangipaay ka dake̍c kadiya pada nu, se̍ gabay nu pe̍ ya mangsuwitic kadiya mismu nga kakabsat nu mettas ka pammati.

⁹ Arig nga madi nu pekkem patiyen nga diya bekken nga nalinteg, madi da met makipagtawid iya panangiraman ne̍ Apu Diyus igida kadiya iturayan na. Masapul nga madi kayu ngarud maallilaw maipanggep idi. Ta ya kinapudnu na, diya toley nga makikamalala, se̍ diya agtungpal kadiya didiyusen, se̍ diya makitipun ka bekken da nga asawa, se̍ diya agtungpal kadiya ricricna niya kinalalaki winno kinababey da, agten pe̍ kadiya bacyen,

¹⁰ se̍ diya agaagaw, naagum, age̍ng-e̍nglew, mamadpadake̍c, winno diya agtakew, ket awan ngarud kadidi diya makipagtawid iya panangiraman ne̍ Apu Diyus igida kadiya iturayan na.

¹¹ Ket agten kadiyan ngarud diya duduma dakayu itun. Ngem ita, nagpadalus kayun kadiya basbasul nu, ket naipaay kayun e̍ Apu Diyus, se̍ napalinteg kayu pe̍ yin iya imatang na, gapu mettas iya kinaturay ne̍ Apu Je̍su Kristu se̍ ya Ispiritu niya Diyus tida.

Agpaay e̍ Apu Diyus diya beggi tida

¹² Pudnu met ya kunen da nga awan maiparit dactidan, ta nawayawayaan tida ngarudin kadiya linlinteg. Ngem pudnu met pe̍ nga bekken tida nga paglaingan diya amin nga mawangel tida. Ngarud, awan nga tutu maiparit dactida, ngem madi tida kuma ngarud ipalubus nga paiturayan tida iya orey nagan na nga mawangel tida.

¹³ Tutu met pe̍ ya kunen diya duduma nga diya macmakan, agpaay kanu iya bessug. Se̍ ya bessug, ket para kanu kadiya macmakan. Bo a, ngem pudnu met pe̍ nga pukawen nad mettas ne̍ Apu Diyus diya macmakan se̍ orey diya bessug tida met pe̍. Ket no diya beggi tida, bekken nga nisangrat ne̍ Apu Diyus nga maipaay ka pannakikamalala, no di lugud tasun agpaay kuma iya Apu. Ket ya Apu, agsirbi met pe̍ kadiya beggi tida.

¹⁴ Ket ya Apu, pinagungar met ne̍ Apu Diyus. Ket iya agten iyan, pagungaren nactida nad met pe̍ nge̍ Apu Diyus gapu iya pannakabalin na.

¹⁵ Arig met nga di kayu pekkem emmu nga kuwa ne̍ Kristu diya beggi nu, nga arig nga naitipun da iya beggi nan. Itu nga dake̍c met no itipun ku ya maipaay e̍ Kristu iya isa nga huste̍s. Madi yac ngarud, a!

¹⁶ Di kayu kad emmu nga no uwed lalaki nga makitipun iya isa nga huste̍s, agbalin da nga is-isa ngin iya imatang ne̍ Apu Diyus, nga arig nga is-isa ya beggi dan? Ta agten iyan ngarud ya kayat na nga kagiyen to naisurat iya Bibliya maipanggep kadiya duwa nga toley nga agasawa, nga kunen na, “Agbalin da nga arig nga is-isa ngin,” kunen na.

¹⁷ Agten iyan ngarud ya kasasaad niya lalaki nga makitipun iya babey. Ngem ya toley nga maitipun iya Apu nga gennung, agbalin nga is-isa ya panpanunut na se̍ ya panpanunut niya Apu.

¹⁸ Ngarud, adeyyuwan nu kuma ya pannakikamalala, ta maape̍ktaran met ya beggi iya agten iyan nga basul. Diya duduma nga pagbasulan, madi da umape̍ktar iya beggi. Ngem ya toley nga makikamalala, ket ya beggi na mettas ya pagbasulan na.

¹⁹ Madi nu kad nga emmu nga ya beggi nu, ket itu ya te̍mplu mettas nga paged-edyanan niya Ispiritu Santu nga nibon ne̍ Apu Diyus dakayu? Itu nga bekken nu nga kuwa ya beggi nun, no di lugud kuwa ne̍ Apu Diyusin.

²⁰ Ta napateg nga unay to nangsaka ne̍ Apu Diyus dakayu. Dikad pe̍ usaren nu kuma ngarudin ya beggi nu iya pakaidayawan ne̍ Apu Diyus.