1 Kurintu 5 - Ya Baru nga Tulag

To naalas nga toley ito bungguy dito iKurintu

¹ Nadamag ku nga uwed kanu met makikamkamalala iya bungguy nu. Dake̍c nga tutu ya pannakikamalala na, ta orey diya toley nga awan pammati da, madi da met agariman iya agten iyan nga kinadake̍c. Ta nadamag ku nga uwed kanu isa nga lalaki nga ad-adugen na kanu ya agsiyuman igina nga babey.

² Ape̍ nga napasindayaw kayu latta? Ta maymayat met no ladingit kuma ya uwed dakayu gapu iyan nga mapaspasamac iya bungguy nu. Ket masapul nga pagtalawen nu ngarud yan nga toley iya bungguy nun.

³ Ta no iyaken, orey awan nac iyan nga edyan nu, dakayu met ya laglagipec. Itu nga arig nga uwed dac nga tutu iya edyan nu. Ket kinedngac kun yan nga toley, ta gapu iya kinaturay nga ne̍cde̍ ne̍ Apu Je̍sus iyaken, inukum kun iya panpanunut ku yan nga lalaki nga nagwangel iyan nga dake̍c.

⁴ Dikad pe̍ nad no aguurnung kayu, se̍ maemmuwan nun ya panpanunut ku maipanggep iyan, ket gapu iya pannakabalin niya Apu tida nga Je̍sus,

⁵ iyawat nu kuma yan nga lalaki e̍ Satanas, tasun mapirdi kuma ngin ya dake̍c nga wangel niya kinatoley na. Ket iya agten iyan, maisalakan nad ya kararuwa na no madatngan ya Timpu niya Apu.

⁶ Bekken met nga maibagay ka nabaru ya panagpasindayaw nu! Emmu nu mettin to pagkakagi nga, “Ya orey e̍teng ngas nga pangpablad, ket pabladen na ya amin nga nakailaukan na nga are̍na,” kunen na.

⁷ Ket iya agten iyan, ipac nu ngarudin yan nga basul nga uwed dakayu nga maiyarig ka pangpablad dakayu, tasun arig kayu kuma ngin nga nabukel nga are̍na nga awan lauc na nga pangpablad. Ta ya kinapudnu na, naibilang kayun nga isa nga nabukel nga are̍na nga awan pangpablad na. Ta e̍ Kristu, igina ya naibilang nga karne̍ru tida nga naidaga nga naidatun iya Padaya Nitatalib, tasun nangipac ka basul.

⁸ Ket ita, agbiyag tida kuma nga arig nga makipadpadaya tidan iya mismu nga padaya tida nga Padaya Nitatalib. Itu nga ya wangwanglen tida kuma ita, bekken kuma nga ya kinadake̍c winno basulin, ta maiyarig didi iya pangpablad nga mailauc ka tinapay. Ngarud, ya napudnu se̍ nalinteg kuma ya wangwanglen tidan, ta itu ya maiyarig iya tinapay nga awan pangpablad na.

⁹ Ket uwed to nisurat ku dakayu ito surat ku itun nga madi kayu kuma makibulubulun kadiya makikamkamalala, kunec itun.

¹⁰ Ngem madic met kayat nga kagiyen nga adeyyuwan nu diya amin nga awan panamati da, nga agten kadiya agbasbasul ka pannakikamalala, winno diya agagum, diya agtakew, winno diya agtungpal ka didiyusen. Ta no adeyyuwan nu diya agten iyan, ket masapul nga pumanaw kayu pe̍ yin idi nga lubung.

¹¹ Ya kayat ku nga kagiyen nga gennung, ket ya orey nagan na nga ibilang na ya beggi na nga kabsat nu ka pammati, itu ya di kayu kuma ibulubulun, no isa nga agbasbasul ka pannakikamalala, winno agagum, winno isa nga agtungpal ka didiyusen, winno mamadpadake̍c, winno age̍ng-e̍nglew, winno agtakew. Ngarud, no diya agten iyan nga toley, madi kayu makisangu igida orey no mangan.

¹² Agten iyan kuma ngarud, ata tutu met nga awan karbengngac nga manglinteg kadiya bekken tida nga kabulun ka pammati. Ngem no diya pada tida nga mamati nga gennung, rebbeng nu ngarud ya manglinteg igida!

¹³ E̍ Apu Diyus ngas met ya makin-rebbeng nga mangukum kadiya bekken tida nga kabulun ka pammati. Ngem dakayu met ya akin-rebbeng ito naisurat iya Bibliya nga kunen na, “Patalawen nun ya dake̍c nga toley nga makitiptipun dakayu,” kunen na.