1 Kurintu 4 - Ya Baru nga Tulag

Ya mangpabasul kadiya agsirsirbi e̍ Apu Diyus

¹ Ket no dakami, ibilang dakami kuma nga agsirsirbi e̍ Kristu, se̍ natalec nga mangipacpakaemmu kadiya pangpanggep ne̍ Apu Diyus nga di na pekkem nipakaemmu itun.

² Ket emmu tida nga ya matalec nga toley, masapul ngarud nga pe̍yeng nga mapagtalkan iya pagrebngan na.

³ Ngem no maipanggep iya panagtungpal ku iya naitalec iyaken, bekken nga ya panangeddeng nu winno ya panangkeddeng niya orey nagan na nga sabali nga toley ya ipateg ku. Ket orey iyaken, madic pe̍ makedngan ya mismu nga beggic.

⁴ Ta no iyaken, awan emmuc nga di yac tinungpal, ngem bekken nga ya kunec ya ibilang niya Apu, no di lugud ya kunen na mettas.

⁵ Ket iya agten iyan, madi kayu kuma nga mangpabasul ka toley yin iya orey nagan na, agingga nga madi pekkem madatngan ya kustu nga timpu na, nga itu ya umbe̍t manin niya Apu. Ta ya Apu, mangipawada nad kadiya nalimed nga winangwangel diya toley, se̍ mangilatac nad pe̍ kadiya pangpanggep diya toley nga di pekkem naemmuwan. Ket no iyan nga timpu, ipasingen nad ne̍ Apu Diyus ya tutu nga dayaw niya tunggal isa dactida, sigun iya panagtungpal tida.

Diya agpasindayaw

⁶ Ket dakami nge̍ Apulus ya nagpangngarigac kun kadidi nga banag nga nisurat ku dakayu, kakabsat, tasun gapu kadidi nga nisalaysay ku maipanggep dakamin, maadalan kayu kuma iya banag nito pagkakagi nga kunen na, “Madi kayu labsan ya naisurat nga sursuru iya Bibliya,” kunen na. Agten iyan kuma ngarud ya tungtungpalen nu tasun awan kuma toley nga ipasindayaw nu nga iduma nu kadiya duduma.

⁷ Tutu met yan, itu nga agten idi ya ibagac no uwed mangipasindayaw nga mangiduma ka toley: Madi ka ngarud nga pagarupen nga nangatngatu ka ngem kadiya duduma. Awan ngarud saad mu nga bekken nga ne̍cde̍ ne̍ Apu Diyus ikew. Ket gapu ta uwed nange̍cde̍ kadiyan ikew, dake̍c ngarud met no pagpasindayaw mu latta diyan, nga arig lugud nga ibilang mu nga bekken da nga sagutin.

⁸ Kaynun no pagarupen nu nga awan kasapulan nun iya imatang ne̍ Apu Diyus, winno nagbalin kayu nga awan pagkurangan nan. Kaynun no pagarupen nu met nga nagbalin kayu nga ari yin, nga inabac dakamin. Ket di ngarud nabaru no agar-ari kayu kuma nga tutu win, tasun mabalin kami met kuma nga makipagari dakayu?

⁹ Nabaru ngarud no agten iyan kuma, ata no dakami nga apustule̍s, arig nga kababaan ya saad nga ne̍cde̍ ne̍ Apu Diyus dakami, nga arig nga isa kami nga makedngan nga mapatey iya imatang diya toltoley. Ta iya amin nga lugar iya lubung se̍ kadiya anghe̍le̍s se̍ kadiya toltoley, ket nagdindinamagin ya kasasaad mi nga kackaasi.

¹⁰ Ket gapu iya panagsirbi mi e̍ Kristu, dakami met ya pangunaan diya toley nga awan kanu kinasirib mi. Ngem dakayu, kunen nu met nga nasirib kayu lugudin maipanggep e̍ Kristu. No dakami, ket nakapsut kami ngas met. Ngem no dakayu, kunen nu met nga naturay kayu nga gennungin. Dakayu ya daydayawen diya toley. Ngem no dakami, ipasegged dakami nga gennung.

¹¹ Manipud itun nga agingga ita, maparigatan kami nga mabisbisin se̍ mew-ewwew. Kurang diya pagkawwes mi, se̍ pasaray kami makabkabil. Ket awan pe̍ emmu mi nga mawe̍ kam pagtudugan.

¹² Agbannug kami nga agwangwangel tasun uwed pagbiyag mi. No ilunud dakami diya toley, ikarkararag mi ngas da. Ket iturtured mi ngas pe̍ ya panangirurumen da dakamin.

¹³ No iyal-alyew dakami, yan nas nabaru nga kagi ya isubad mi igida. Ket agingga ita, maibilang kami nga arig ngas nga itemsit diya toley no awan sirsirbi nan, winno ya maibilang nga kadake̍kan iya amin.

¹⁴ Ket ya nisurat ku nga idi, bekken ngarud nga tasun iyal-alyew nakayu, no di lugud tasun bagbagaan nakayu, ta ibilang nakayu nga patpatgec nga anac.

¹⁵ Ta orey no uwed kuma sangapulu nga ribu nga mangidalan dakayu maipanggep iya panamati nu e̍ Kristu, is-isa ngas met ya naibilang nga ama nu ka pammati. Ta iyaken ya nagbalin nga arig nga akin-putut dakayu iya panamati nu e̍ Kristu Je̍sus, gapu ito panangipalawag ku dakayu iya Makaparagsac nga Damag itun.

¹⁶ Dikad pe̍ bilinen nakayu nga sipapasnec nga iyaken kuma ya pagtuladan nu.

¹⁷ Itu ya gapu na nga ibon ku iyan nge̍ Timutyu nga ibilang ku nga napateg se̍ mapagtalkan nga anac ku ka pammati iya Apu. Ipalagip na nad dakayu ya ugalic nga tumutup iya pannakaitipun tida e̍ Kristu Je̍sus. Ket itu met pe̍ ya ugali nga isursuruc kadiya amin nga bungguy diya mamati iya orey awac nga lugar.

¹⁸ Uwed da duduma dakayu iyan nga agtangsit mettin, ta arig nga pagarupen da nga madi yac makalbe̍t iyan nga sumacwar dakayun.

¹⁹ Ngem no ipalubus niya Apu, umbe̍t tac ngarud iya di mabayagin. Ket no uwed dac nad iya edyan nun, bekken nas nga ya banag diya kagkagi dito natangsit ya emmuwec, no di nad pe̍ ya tumaudan niya pannakabalin da.

²⁰ Ta ya panangituray ne̍ Apu Diyus, bekken nas nga maipanggep ka panagkagi, no di pe̍ maipanggep ka pannakabalin.

²¹ Dikad pe̍ nagan ya gabgabay nu? Gabay nu ya madi agbabawi, tasun umbe̍t tac iya edyan nu nga agilbec dakayu, winno gabay nu ya agbabawi yin, tasun umbe̍t tac nga siaayat se̍ siaalumamay dakayu?