1 Kurintu 3 - Ya Baru nga Tulag

Ya panagsusupyat dito mamati nga iKurintu

¹ Ket no dakayu itun, kakabsat, madic mabalin nga nipada ya panagkagic dakayu iya panagkagic kadiya paiturayan iya Ispiritu ne̍ Apu Diyus. Ta nagpaituray kayu pekkem itun iya kinatoley nu, nga arig nga ebbing kayu pekkem iya panamati nu e̍ Kristu.

² Itu nga to panangisuruc dakayu itun, ket arig nga pinaggatas nakayu, ta arig kayu pekkem nga ebbing nga madi pekkem makakan ka nasgat nga makan. Ket orey ita, di nu pekkem kabaellan diya sursuru nga maiyarig iya nasgat nga makan.

³ Kunec yani ta tungtungpalen nu pekkem ya tarigagay ngas niya kinatoley nu. Ta ya panagiinnapal nu se̍ ya panagsusupyat nu, ket itu yan ya mangipanecnec nga tungtungpalen nu pekkem ya tarigagay niya kinatoley nu. Ket ya panagbiyag nu, agten mettas iya ugali diya madi mamati.

⁴ Ta kunen kanu diya duduma dakayu, “E̍ Pablu ya surutec,” ket kunen kanu diya duduma, “E̍ Apulus nga gennung ya surutec,” kunen da kanu. Ket ya agten iyan nga panpanunut, di ngarud agten nas iya gangey diya bekken nga mamati?

Maipanggep kadiya agsirsirbi e̍ Apu Diyus

⁵ Ape̍? Nagan kad aya nge̍ Apulus se̍ iyaken nga Pablu, no di agpada kami met nga agsirsirbi iya Apu nga agpaay dakayu? Ket gapu ito panangisuru mi nge̍ Apulus dakayu, mamati kayu e̍ Je̍su Kristu win. Ta dakami nge̍ Apulus, tunggal isa dakami, ne̍cdan nakami ya Apu ka bukud mi nga wangel.

⁶ Ta iyaken ya maiyarig iya nagmula, ket e̍ Apulus ya maiyarig iya nangbuyat iya mula. Ngem e̍ Apu Diyus mettas ya nangpadackel kadiya mula.

⁷ Dikad pe̍ bekken kuma nga ya arig nga agmula winno ya arig nga agbuyat ya dayawen tida, no di lugud e̍ Apu Diyus, ta igina met ya mangpadackel.

⁸ Ket awan pe̍ pagdumaan niya agmula se̍ ya agbuyat, ta agpada da nga gun-gunaan ne̍ Apu Diyus sigun mettas iya panangtungpal da iya wangel da.

⁹ Ta agpada kami met nga pagwangwanglen ne̍ Apu Diyus para dakayu. Ket dakayu, maiyarig kayu met iya mumulaan na. Ket maiyarig kayu pe̍ ka baley nga bangunen ne̍ Apu Diyus.

Ya maiyarig ka baley ne̍ Apu Diyus

¹⁰ Ta gapu iya pannakabalin nga nikaasi ne̍ Apu Diyus iyaken, nagbalin nac nga arig nga nalaing nga allawagi. Ket iya agten iyan, iyaken ya nangisagana iya pagisaadan na iya arig nga baley. Ket uwed sabali nga mangituluy nga mangallawagi yin idi nga baley. Ngem agannad kuma ngas ya tunggal isa nga agallawagi nga mangituluy iyan nga pagisaadan.

¹¹ Ta awan met sabali nga mabalin tida nga pagisaadan, no di ngas met e̍ Je̍su Kristu.

¹² Ket diya arig nga agallawagi nga mangituluy idi nga arig nga baley ne̍ Apu Diyus, usaren da met diya maiyarig ka balituc, winno kuwarta, winno nangina nga batu. Ket diya duduma nga usaren da, ket maiyarig ngas ka kayu, winno kugun, winno dasidat.

¹³ Ket maiparangarang nad met ya winangel niya tunggal isa no madatngan nad ya Timpu niya Apu. Ta arig nga uwed apuy nad nga mangsagat kadiya winangel niya tunggal isa nga toley. Ket iya agten iyan, maemmuwan nad ngarudin ya pudnu nga pateg diya winangwangel da.

¹⁴ Ket magun-gunaan nad ngarud ya toley no makalasat iya apuy diya arig nga inallawagi na iya sap-ew nito nagsaadan nito baley.

¹⁵ Ngem no paabuwen niya apuy ya winangel niya isa nga toley, mapukaw ngarud mettin ya pakagun-gunaan na. Ngem igina, maisalakan nad mettas, ngem arig ngas nga isa nga nakalasat ka apuy.

¹⁶ Arig nga madi kayu pekkem maawatan nga dakayu mettin ya te̍mplu nga paged-edyanan ne̍ Apu Diyus, ket agedyan met dakayun ya Ispiritu na.

¹⁷ Ngarud, no uwed mangpirdi iya te̍mplu nga paged-edyanan ne̍ Apu Diyus, pirdiyen nad met ne̍ Apu Diyus yan nga toley. Ta ya te̍mplu ne̍ Apu Diyus, ket maipaay ngas igina. Ket dakayu mettas nga mismu ya paged-edyanan na.

Ya tutu nga sirib iya imatang ne̍ Apu Diyus

¹⁸ Awan kuma dakayu ya mangallilaw iya beggi na mettas. Ta orey nagan na nga mangipagarup nga igina ya isa nga nasirib sigun iya kinasirib niya toley, masapul nga paglikudan na kuma yan nga kinasirib na, ket agbalin kuma nga arig nga awan kinasirib na iya imatang toley, tasun agbalin nga tutu nga nasirib iya imatang ne̍ Apu Diyusin.

¹⁹ Ta awan kaipapennan na iya imatang ne̍ Apu Diyus diya ibilang diya toley nga kinasirib da. Ta agten iya naisurat iya Bibliya nga kunen na, “Ya kinasikap diya mamasirib kanu nga toley, itu mettas ya pangpaabac ne̍ Apu Diyus igida.”

²⁰ Ket kunen na pe̍, “Emmu niya Apu nga awan mamaay niya panpanunut diya mamasirib nga toley,” kunen na.

²¹ Dikad pe̍ madi tida kuma nga agpasindayawin maipanggep iya kabaellan tida nga toley. Ket agten met idi ya kinapudnu na: Awan met madi maipaay para dakayu.

²² Ta iyaken nga Pablu, se̍ orey de̍ Apulus nge̍ Pe̍dru, agpaay kami ngarud dakayu. Ket dakayu met pe̍ ya pagpaayan niya lubung ngi, se̍ ya biyag, se̍ ya pannakatey, se̍ diya uwed iya agdama nga timpu, se̍ orey pe̍ diya uwed iya maadpangan nga timpu. Ngarud, agpaay amin didi dakayu.

²³ Ket dakayu, agpaay kayu e̍ Kristu, ket e̍ Kristu, agpaay met e̍ Apu Diyus.