1 Kurintu 2 - Ya Baru nga Tulag

Maipanggep ito panangikasaba ne̍ Pablu e̍ Kristu

¹ Kakabsat, malagip nu kuma to ugalic ito nawe̍ yac iyan itun nga nangipakaemmu dakayu iya maipanggep e̍ Apu Diyus. Ta bekken nga ya nauneg nga panangasaba winno panpanunut ya nangawis ku dakayu.

² Ta bayat nito kauwed ku iyan nga edyan nu, nirantac nga awan sabali nga ikasabac dakayu malacsid iya maipanggep e̍ Je̍su Kristu, ket kangrunaan na ya maipanggep ito pannakatey na ito krus.

³ Tutu nga ito uwed dac iyan nga edyan nu, nakapsut tac ngas, ket sidadayaw wac se̍ siaannad dac met pe̍ nga unay gapu iya gagarac.

⁴ Ket ito panangisuruc se̍ panangilawlawag ku dakayu itun, madi yac nagusar ka napaw-is nga balikas nga makapasurut dakayu, no di lugud nagkagi yac nga nangawis dakayu gapu iya panangpanecnec niya pannakabalin niya Ispiritu ne̍ Apu Diyus.

⁵ Ket agten iyan ngarud to panangisuruc, tasun ya panamati nu, awan pakainaigan na iya kinasirib niya kinatoley, no di ngas iya pannakabalin ne̍ Apu Diyus.

Ya kinasirib nga tumaud e̍ Apu Diyus

⁶ Ngem no kadiya nataengnganin ka panamati, agkagi kami ngarud ka nauneg nga panursuru igida. Ngem ya agten iyan nga kinasirib, bekken nga agten iya sirib diya toley winno diya agtuturay idi nga lubung. Ket didi nga agtuturay, mapukapukaw da ngas met.

⁷ Ngem ya kagiyen mi nga gennung, itu ya kinasirib ne̍ Apu Diyus mettas nga madi pekkem naipacpakaemmu itun kadiya toley, ta nalimed igida itun. Ket ito madi pekkem naparsuwa ya lubung, nikeddeng ne̍ Apu Diyus nga maariman yani nga panggep na maipanggep iya kinasirib na. Ket maipaay met yani iya pakaidayawan tida.

⁸ Ket diya agtuturay idi nga lubung, pulus nga madi da nakaawat itun idi nga kinasirib. Ta no naemmuwan da kuma, di da kuma nipailansa ya kadayawan nga Apu ito krus.

⁹ Ngem agten mettas iya naisurat iya Bibliya nga kunen na, “Ya nakaskasdaaw nga madi pekkem nga nas-asingen diya toley se̍ ya madi da pekkem nga nagicgicna, se̍ ya madi da pekkem ipagarup nga mapasamac, ket itu mettas ya panggep ne̍ Apu Diyusin para kadiya agayat igina,” kunen na.

¹⁰ Ket tutu met yan, ta gapu iya Ispiritu na, nipakaemmu ne̍ Apu Diyus dactida yani nga panggep na. Ta awan madi emmu niya Ispiritu ne̍ Apu Diyus, ket orey diya amin nga uwed iya lemlemmet ne̍ Apu Diyus, emmuwen na met pe̍.

¹¹ Kaspagarigan no ya toley: Awan ngarud sabali nga makaemmu iya uwed iya lemlemmet niya isa nga toley no di ngas iyan mettas nga toley. Ket agten pe̍, nga ya Ispiritu ne̍ Apu Diyus ngas met ya makaemmu iya uwed iya lemlemmet ne̍ Apu Diyus.

¹² Ket no dactida, bekken nga ya panpanunut nga tumaud kadiya uwed idi nga lubung ya naipaay dactida, no di lugud ya Ispiritu ne̍ Apu Diyus, tasun maawatan tida diya amin nga banbanag nga nikaasi ne̍ Apu Diyus dactida.

¹³ Ket iya agten iyan, bekken nga ya kinasirib toley ya pagtaudan diya isuru mi, no di lugud ya Ispiritu ne̍ Apu Diyus. Ket idi nga ipakaemmu niya Ispiritu ne̍ Apu Diyus dakami, ket itu pe̍ yin ya ipakaemmu mi dakayu nga nae̍cdan pe̍ iya Ispiritu na.

¹⁴ Ngem diya toley nga awan igida ya Ispiritu ne̍ Apu Diyus, madi da met ikaskasu diya ipakaemmu na, ta ipagarup da nga awan kaipapennan didi igida. Ket di da met pe̍ makaawat maipanggep kadiyan, ta diyan nas paiturayan iya Ispiritu ne̍ Apu Diyus diya makalasin kadiyan.

¹⁵ Ket diya toley nga paiturayan iya Ispiritu ne̍ Apu Diyus, ket malasin da ngarud ya kinapateg niya amin didi. Ket ya kinapateg diya agten kadiyan nga toley iya imatang ne̍ Apu Diyus, madi met malasin diya bekken nga mamati.

¹⁶ Ta agten mettas iya naisurat iya Bibliya nga kunen na, “Awan toley nga makaemmu iya uwed iya lemlemmet niya Apu, ket awan met pe̍ makabalin nga mangisuru igina,” kunen na. Ngem no dactida, uwed met dactida ya panpanunut ne̍ Kristu win.