1 Kurintu 15 - Ya Baru nga Tulag

Maipanggep ito panagungar ne̍ Kristu

¹ Ket ita, kakabsat, gabay ku nga ipalagip dakayu to inawat nu nga nisuruc dakayu, nga itu ya Makaparagsac nga Damag maipanggep e̍ Je̍su Kristu. Ket idi nga Makaparagsac nga Damag, itu pe̍ ya nakabangunan niya pammati nu,

² se̍ itu pe̍ ya pakaisalakanan nu, no tutu nga salimetmettan nu to nisuruc dakayu, malacsid no awan banag nito panamati nu.

³ Ta nipakaemmuc dakayu itun ya kangrunaan nga naipakaawat iyaken, nga natey nge̍ Kristu nga maipaay kadiya basbasul tida, nga maikanatad ito naisurat iya Bibliya,

⁴ se̍ naitamen itun. Ket ito maikatlu nga algew, napagungar mettas manin, nga maikanatad manin iya naisurat iya Bibliya.

⁵ Ket ito name̍nsan nga algew itun, nagpasingen e̍ Pe̍dru. Se̍ ito name̍nsan manin, nagpasingen manin ito bungguy nito sangapulu ket duwa nga apustule̍s.

⁶ Kalpasan niyan, name̍nsan nga nagpasingen pe̍ kadiya nasuruc nga lima nga gasut nga kakabsat tida ka pammati, ket diya kaaduwan kadiyan nga lima nga gasut nga nakasingen igina, sibibiyag da pekkem ita no pe̍ natey diya duduma ngin.

⁷ Ket se̍ nagpasingen pe̍ e̍ Santiyagu, se̍ nagpasingen pe̍ yin kadito amin nga naibilang nga apustule̍s na.

⁸ Ket ya kaodiyan, iyaken pe̍ yin ya nagpasingnan na, nga iyaken nga arig nga isa nga naiyanac kin orey bekken na pekkem nga reppat.

⁹ Ta iyaken ya kanunumuwanin kadiya amin nga apustule̍s. Bekken kuma pe̍ nga rumbeng nga maawagan nac nga apustul, ta nirurumen ku itun diya toley ne̍ Apu Diyus.

¹⁰ Ngem gapu mettas iya siaayat nga panangaasi ne̍ Apu Diyus iyaken, nagbalin nac met latta nga apustul, ta nabaru met ya nagbanagan nito siaayat nga panangaasi na iyaken. Itu nga nagbanbannug gac met ka ad-adu ngem kadito duduma nga padac nga apustul. Ngem bekken met nga iyaken ya tutu nga akin-wangel, no di lugud pinagwangel nac nge̍ Apu Diyus gapu iya pannakabalin nga nikaasi na nga siaayat iyaken.

¹¹ Dikad pe̍ orey nagan na dakami nga apustule̍s ya mangasaba, agpapada met ya ikasaba mi. Ket ito nagicna nu ya banag niya ikasaba mi, pinati nu met.

Maipanggep iya pannakapagungar tida

¹² Ket ikasaba mi ngarud ya pannakapagungar ne̍ Kristu, ngem ape̍ kadi nga uwed met duduma dakayu nga agkunen nga madi kanu agungar diya natey?

¹³ Ket no tutu ya kunen da nga madi mapagungar diya natey, ket madi met pe̍ napagungar nge̍ Kristu win.

¹⁴ Ket no madi napagungar nge̍ Kristu, awan ngarud mamaay niya panangikasaba mi, se̍ awan met pe̍ mamaay niya panamati nu.

¹⁵ Ket no tutu manin nga madi nagungar nge̍ Kristu, busid kami mettin nga mangikasaba iya nitalec ne̍ Apu Diyus dakami, ta nisuru mi met ngarud nga pinagungar ne̍ Apu Diyus nge̍ Kristu. Ngem no tutu nga madi mapagungar diya natey, ket tutu met pe̍ nga madi pinagungar ne̍ Apu Diyus nge̍ Kristu.

¹⁶ Ta no tutu nga madi mapaungar diya natey, madi ngarud pe̍ mabalin nga napagungar nge̍ Kristu.

¹⁷ Ket no tutu nga madi napagungar nge̍ Kristu, awan ngarud mamaay niya panamati nu igina, se̍ madi kayu pekkem mawayawayaan iya pagbanagan diya basbasul nu.

¹⁸ Se̍ no tutu nga agten iyan, napukaw ngas mettin dito natey yin nga namati e̍ Kristu.

¹⁹ Ngarud, no agpaay ngas idi nga biyag ya panagnamnama tida e̍ Kristu, ket dactida nga mamati igina ya kangrunaan nga kackaasi kadiya amin nga toley.

²⁰ Ngem ya kinapudnu na, napagungar nga tutu nge̍ Kristu win. Ket to pannakapagungar na, maiyarig iya kaonaan nga nagani, ta igina ya pakaemmuwan tidan nga mapagungar ngarud met pe̍ diya duduma nga natey yin.

²¹ Ta gapu iya isa nga toley, uwed pannakatey tida. Ket agten pe̍ iyan, gapu iya isa nga toley manin, uwed met pannakapagungar diya natey.

²² Ta gapu iya pannakaitipun tida iya kasasaad nito Adan, uwed pannakatey tida nga amin. Ngem gapu iya pannakaitipun tida iya kasasaad ne̍ Kristu, uwed nad pannakapagungar tida nga amin.

²³ Ngem diya mapagungar, agungar da sigun iya timpu da. Ta e̍ Kristu met ya kaonaan nga nagungar, se̍ nad mapagungar pe̍ diya toley na no umbe̍t manin nge̍ Kristu idi nga lubung.

²⁴ Ket kalpasan nad niya panagungar tida, itu win ya panagpatingga nidi nga timpu. Ta pukawen nad ne̍ Kristu win diya amin nga maikuntra igina, nga agten kadiya uwed turay da, se̍ diya amin nga uwed pannakabalin da, se̍ ya bileg diya di mas-asingen. Ket ya panangituray na mettas, iyawat na nad e̍ Apu Diyus nga Ama.

²⁵ Agten iyan ngarud, ta masapul nga e̍ Kristu ya agari agingga na nga ipaabac ne̍ Apu Diyus igina diya amin nga gumurgura igina, se̍ na da ipaituray e̍ Kristu win.

²⁶ Ket ya kaodiyan nga abaken na, ket itu ya pannakabalin niya patey.

²⁷ Ta kunen na iya Bibliya, “Nipaituray ne̍ Apu Diyus igina ya amin,” kunen na. Tutu met yan, ngem no kunen na nga naipaituray e̍ Kristu ya amin, nalawag met nga di na ngarud kayat nga kagiyen nga mairaman nge̍ Apu Diyus kadiya iturayan ne̍ Kristu. Ta e̍ Apu Diyus met ya mangipaituray e̍ Kristu kadiya amin.

²⁸ Ket nad no naipaiturayin ya amin e̍ Kristu nga Anac ne̍ Apu Diyus, e̍ Kristu mettas pe̍ yin ya mangpaituray iya mismu nga beggi na e̍ Apu Diyus, nga igina met to nangipaituray e̍ Kristu kadiya amin. Ket agten iyan ya wanglen nad ne̍ Kristu, tasun e̍ Apu Diyus ya kangrunaan se̍ katurayan ka aminin.

²⁹ Ket no tutu ya kunen da nga madi kanu agungar diya natey, ape̍ ngarud nga agbautisar dito duduma nga maigapu kadiya natey? Nagan ngarud ya pagnamnamaan da no bekken nga ya pannakapagungar diya natey?

³⁰ Ket agten kami pe̍, ta no pudnu nga awan pannakapagungar diya natey, awan ngarud sirsirbi niya pe̍yeng nga panangipusta mi iya biyag mi.

³¹ Pudnu ngarud met yani kakabsat, ta inalgew, ibilang ku ngas nga natey yin ya beggic. Ket itured ku met yani gapu mettas dakayu nga pagragsakac gapu iya pannakaitipun tida e̍ Kristu Je̍sus nga Apu tida.

³² Ket no awan namnamac nga mapagungar tida, awan met sirsirbi nito panagitured ku kadidi nga iE̍pe̍su, nga arig da nga nauyung nga animal. Ket no tutu pe̍ nga madi agungar diya natey, nabarbaru ngarud no kunen tida nga, “Agragragsac tida ngas nga mangan se̍ agiinumin, ta no damlag, matey tida mettin.”

³³ Ngem madi kayu kuma maallilaw kadiya agten iyan nga panpanunut, ta tutu met ya kunen na ito pagkakagi nga, “Ya nanacman nga toley nga makibulubulun kadiya managdacdake̍c, maalisan nad met pe̍ ka kinadake̍c,” kunen na.

³⁴ Ket babawiyen nu lugudin diya bekken nga kustu nga panpanunut nu, tasun agpaay kayu kadiya nalinteg gin, se̍ ipac nun ya panagbasbasul nu. Ta uwed da met dakayu diya di pekkem makaawat maipanggep e̍ Apu Diyus, ket pakaiyal-alyewwan nu met yan.

Ya langa niya mapagungar nga beggi tida

³⁵ Ket mabalin nga uwed dakayu ya agsaludsud no kumaan niya pannakapagungar diya natey, winno kumaan ngata ya langa niya beggi diya mapagungar.

³⁶ Ahah! Nakapsut ngas met ya madi pekkem makaawat idi. Ta nalawag met nga agten idi: Ya beggi niya mapagungar, arig met nga isa nga bukel nga imula nu iya ginet. Ta madi makabisic, no madi pekkem naitugnu, nga arig nga pannakatey na.

³⁷ Ket ya bukel nga imula nu iya ginet, nga mabalin nga bukel trigu winno sabali nga kita bukel, ket bekken met pekkem nga natubu nga mula, no di lugud bukel pekkem.

³⁸ Ket e̍ Apu Diyus mettas ya mangpabalin kadiya bucbukel nga mangpauwed ka mulmula, maikanatad kadiya gabay na nga langlanga da, nga sigun iya tunggal kita da nga bukel.

³⁹ Ket agten pe̍ iyan diya uwed nabukel nga beggi na, ta bekken da nga agpapada ka langa. Agten iya beggi niya toley, sabali met iya beggi diya animal. Ket sabali manin ya beggi diya agkaykayab, se̍ sabali pe̍ ya beggi diya lames.

⁴⁰ Ket agten pe̍ iyan nga uwed diya nabukel nga naisaad iya ngudu, se̍ diya naisaad idi nga lubung. Ngem ya kinapateg diya uwed iya ngudu, sabali iya kinapateg diya uwed idi nga lubung.

⁴¹ Kaspagarigan iya sinag, sabali met ya kinapateg na iya kinapateg niya bulan. Se̍ sabali manin ya kinapateg diya bitbituwen. Ket orey diya bitbituwen, nagsasabali da pe̍ ka kinapateg.

⁴² Ket agten pe̍ iyan ya pannakapagungar diya natey nga toley. Ta ya beggi nga maitamen iya ginet, maropsa ngas met. Ngem nad no mapagungar, uwed beggi na nga madi maropsa ngin.

⁴³ Ya beggi toley nga naitamen nin, awan met kinapateg nan. Ngem no mapagungar, ket napateg gin. Awan met bileg na no maitamen. Ngem nabileg no agungarin.

⁴⁴ Ya beggi nga naitamen, itu ya agpaay kadiya masingen nga banbanag. Ngem no mapagungarin, ket isa nga agpaay kadiya madi masingen nga banbanag. Ngarud, no uwed beggi nga agpaay kadiya masingen nga banbanag, uwed met pe̍ beggi nga agpaay kadiya madi masingen nga banbanag.

⁴⁵ Ket ya agten iyan, maikanatad ito naisurat iya Bibliya nga kunen na, “E̍ Adan nga kaonaan nga toley, naparsuwa nga nae̍cdan ka biyag nga kinatoley,” kunen na. Ngem ya maawagan ka nodi nga Adan, igina ya Ispiritu nga mange̍cde̍ ka biyag nga agnanayun.

⁴⁶ Ngem bekken met nga tumutup kadiya madi masingen nga banbanag ka langit ya non-ona nga beggi nga nae̍cde̍, no di lugud para kadiya masingen nga banbanag. Ket maisarunu met ya pannakae̍cde̍ niya beggi nga tumutup kadiya madi masingen nga banbanag.

⁴⁷ To nona nga toley, ket idi nga lubung ya nagtaudan na, ta nabukel ka ginet. Ket ya maawagan ka maikadduwa nga toley, langit met nga gennung ya nagtaudan na.

⁴⁸ Ket diya beggi tida nga tumutup iya panagbiyag idi nga lubung, maiparis da mettas iya gangey nito nona nga toley nga nagtaud iya ginet. Ket dactida nga tumutup iya uwed ka langit, maiparis tida met iya gangey nito nagtaud ka langit.

⁴⁹ Ket ya gangey tida ita, agten mettas ito nona nga toley nga nagtaud iya ginet. Ngem masukatan nad mettas, tasun agten mettas ito toley nga nagtaud ka langit ya gangey tida.

⁵⁰ Itu yani ya gabay ku nga ibaga dakayu, kakabsat: Bayat niya kauwed pekkem didi nga beggi tida nga uwed sebbit se̍ daga na, madi tida mabalin ya makipagtawid iya pannakairaman tida kadiya iturayan ne̍ Apu Diyus. Ta diya agbanag ngas ka pannakaropsa, madi met mabalin nga maitipun kadiya awan pannakaropsa na.

Maipanggep iya pannakabaliw niya beggi tida

⁵¹ Kakabsat, panunuten nu kuma nga nalaing yani, ta uwed ibagac dakayun nga madi pekkem naipacpakaemmu itun: Dactida nga mamati, madi tida matey nga amin. Ket amin tida, mabalbaliwan tida nad met.

⁵² Ta nad no madatnganin ya kaodiyan nga pannakapauni niya tangguyub ne̍ Apu Diyus, ket maclatan tida nga mabaliwan, nga naal-alistu pe̍ ngem iya panagkigmat. Ta no aguni nad ya tangguyubin, mapagungar diya natey yin, nga nae̍cdan da ka beggi nga awan pannakatey nan. Ket dactida nga amin, mabaliwan nad ya beggi tidan.

⁵³ Ta ya beggi tida nga uwed pannakaropsa na, masapul nga masukatan ka beggi nga madi maropsa ngin. Se̍ ya kinatoley tida nga uwed pannakatey na, masapul nga masukatan ka madi pulus nga mat-atey yin.

⁵⁴ Ket nad no nasukatan ya uwed pannakaropsa na ka awan pannakaropsa nan, se̍ no nasukatan ya uwed pannakatey na ka awan pannakatey nan, itu win ya pakatungpalan nito kunen na iya Bibliya nga, “Napirdi ya pannakatey, nga awan pulus pannakabalin nan, gapu iya sibaballaigi nga pannakaabac nan,” kunen na.

⁵⁵ Ket kunen na pe̍, “Awan kabaellan niya patey nga mangabac nga sibaballaigi. Awan met pannakabalin na nga mangpirdi yin,” kunen na.

⁵⁶ Ket ita, uwed pekkem pannakabalin niya patey nga mangpirdi, gapu ta uwed basul. Ket uwed met turay niya basul, gapu ta uwed ya Linteg nga mangipakaemmu ka basul.

⁵⁷ Ngem agyaman tida lugud e̍ Apu Diyus, ta pangabaken nactida iya pannakabalin niya patey, tasun agballaigi tida gapu mettas iya Apu tida nga Je̍su Kristu.

⁵⁸ Dikad pe̍ patpatgec nga kakabsat, nabileg kuma nga pe̍yeng ya panamati nu, se̍ madi kayu kuma maawis ka sabali. Ket napasnec kuma nga pe̍yeng ya panagsirbi nu iya Apu, ta emmu nu nga uwed paglaingan niya panagbannug nu iya panagsirbi nu iya Apu.