1 Kurintu 14 - Ya Baru nga Tulag

Diya sabali nga pagkakagi se̍ ya panangasaba

¹ Ket ya panagayat, itu kuma ngarud ya ipangpangruna nu. Ket masapul nu met pe̍ nga tarigagayan nga sipapasnec diya pannakabalin nga e̍cde̍ niya Ispiritu Santu, ket nangruna ya pannakabalin nga mangikasaba iya kagi ne̍ Apu Diyus.

² Ta no ya agkagi ka sabali nga pagkakagi nga bekken na nga naadal, bekken nga diya toltoley ya katbar na, no di ngas e̍ Apu Diyus. Ta awan toley nga makaawat iya ipakagi niya Ispiritu igina, ket nalinged ya kaipapennan na.

³ Ngem no ya mangikasaba iya kagi ne̍ Apu Diyus, ket diya toltoley nga gennung ya katbar na. Ket pabilgen na da, se̍ bagbagaan na da, se̍ liwliwaen na da pe̍.

⁴ Tutu met nga ya toley nga agkagi ka sabali nga pagkakagi nga bekken na nga naadal, yan nas mismu nga beggi na ya pabilgen na. Ngem ya toley nga mangikasaba iya kagi ne̍ Apu Diyus, pabilgen na ya amin nga bungguy mamati.

⁵ Ket no iyaken, gabay ku met a, no makakagi kayu kuma nga amin ka nadumaduma nga pagkakagi nga di kayu naadal. Ngem gabgabay ku lugud no uwed kuma dakayu ya pannakabalin nga mangikasaba iya kagi ne̍ Apu Diyus. Ta napatpateg met ya mangikasaba iya kagi ne̍ Apu Diyus ngem iya agkagi ka kagi nga madi maawatan diya toltoley, malacsid ngas no uwed toley nga makaipatarus iya kaipapennan niya kagiyen na, tasun mapabileg kuma ya bungguy.

⁶ Ket agten idi kakabsat: Kaspagarigan no umbe̍t tac kuma iyan nga edyan nu, ngem yan nas sabasabali nga pagkakagi nga madi nu maawatan ya ikagic dakayu, bekken nu ngarud nga paglaingan ya kagkagiyec. Madi nakayu ngarud matulungan no awan ipalawag ku winno ipakaemmuc dakayu, winno awan ikasabac winno isuruc dakayu.

⁷ Ket mabalin met pe̍ no iyarig ku diya awan biyag da, kaspagarigan no diya matukar, agten kadiya masupan winno ya uwed kuwe̍rdas na. Ta no bekken nga nabatad ya uni da, madi tida met malasin no nagan ya tuctukaren da.

⁸ Agten pe̍ ya tangguyub, ta madi met makasagana nga makigubat diya suldadu no madi da mailasin ya sinyal nga uni nito tangguyub.

⁹ Ket agten kayu pe̍ iyan, ta no agkagkagi kayu ka balikas nga bekken nga nalawag ya kaipapennan na, awan met makaawat iya kagi nu. Ta arig nga belluut ngas met ya katkatbar nun.

¹⁰ Adu ngarud diya sabasabali nga pagkakagi diya toley idi nga lubung. Ket iya tunggal isa kadidi, uwed da ngarud pe̍ makaawat iya kaipapennan na.

¹¹ Ngem no madi yac maawatan ya kagi niya isa nga agkagkagi, madi kami ngarud agkinkinnaawatan, ket arig nga gan-gannaet tac ngas iya makin-kagi, se̍ igina, arig nga gan-gannaet met iyaken.

¹² Dikad pe̍ no dakayu, gapu ta tarigagayan nu nga sipapasnec ya mae̍cdan kadiya pannakabalin nga e̍cde̍ niya Ispiritu Santu, ket agpasnec kayu kuma ngarud iya panangipangruna nu nga mangpabileg iya bungguy mamati kadidi nga pannakabalin.

¹³ Dikad pe̍ ya makakagi ka sabali nga pagkakagi, agkararag kuma ngarud nga agadeng ka pannakabalin pe̍ nga mangipatarus iya kaipapennan niya kagkagiyen na.

¹⁴ Ta no agkararag gac ka sabali nga pagkakagi, ket mabalin ku nga ibalikas ya ipakaemmu niya Ispiritu Santu iyaken iya panpanunut ku, ngem awan met mamaay na iya pannakaawat ku.

¹⁵ Dikad pe̍ agten idi ya wanglec kuma: No agkararag gac, ikararag ku ngarud ya ipakaemmu niya Ispiritu Santu iya panpanunut ku, ngem masapul met pe̍ nga maawatac kuma ya ibalikas ku iya kararag ku. Ket agten pe̍ no agkanta ngac sigun iya ipakaemmu niya Ispiritu Santu iyaken iya panpanunut ku, ket masapul nga maawatac kuma pe̍ ya banag niya kantaec.

¹⁶ Ta no ibalikas mu kuma ya panagyaman mu e̍ Apu Diyus sigun nas iya uwed iya panpanunut mu, ket no magicna niya isa nga toley nga madi pekkem makaawat iya panggep mu, madi na met mabalin ya agkunen nga siaannamung nga, “Agten iyan kuma ngarudin,” ta di na met maawatan diya kagkagiyem nga pagdayaw mu.

¹⁷ Ket mabalin nga nabaru nga tutu diya kagkagiyem iya agten iyan nga panagyaman mu, ngem madi met agsirbi nga mangpabileg kadiya aggicgicna.

¹⁸ Ket no iyaken, agyaman nac e̍ Apu Diyus, ta ad-adda pekkem nga iyaken ya agkagkagi ka nadumaduma nga pagkakagi ngem dakayu.

¹⁹ Ngem kadiya gimung tida nga mamati, gabgabay ku ya agkagi yac ka pagkakagi nga maawatac ya kaipapennan na, tasun maawatan kuma pe̍ diya aggicgicna ya isursuruc igida. Ta nabarbaru ngarud iyaken ya orey limlima ngas nga balikas ku nga maawatan da, ngem iya rinibribu nga balikasec ka sabali nga pagkakagi nga madi da met maawatan.

²⁰ Kakabsat, bekken kuma ngin nga arig nga panunut ebbing ya panagpanpanunut nu maipanggep kadidi. Ngem no maipanggep iya dake̍c, mayat met lugud no arig kayu nga ke̍bit, a. Ngem no iya panagpanunut nu, basta nanakem kayu kuma.

²¹ Ta kunen na iya Bibliya, “Uwed da nad ibon ku nga sabali diya pagkakagi da se̍ bekken da nga Israe̍lita, ket igida nad ya pagkagiyec kadidi nga toltoley yin. Ngem orey agten iyan, madi dac nad met latta suruten, kunen niya Apu,” kunen na.

²² Itu nga emmu tida nga ya panangusar ka nadumaduma nga pagkakagi, bekken nga pagilasinan nga agpaay kadiya mamati, no di lugud agpaay kadiya bekken nga mamati. Ngem no ya pannakabalin nga mangikasaba iya kagi ne̍ Apu Diyus, bekken nga maipaay kadiya madi mamati, no di lugud kadiya mamati yin.

²³ Kaspagarigan no aguurnung kayu nga amin nga mamati, se̍ no sabali nga pagkakagi kuma ya kagkagiyen niya tunggal isa dakayu, ket no uwed umbe̍t makigimung dakayu nga isa nga toley nga madi pekkem makaawat iya panggep nu, winno ya isa nga di pekkem mamati, ipagarup na no agel-ellut kayun.

²⁴ Ngem no mangikaskasaba kuma ya tunggal isa dakayu iya kagi ne̍ Apu Diyus, ket no uwed umbe̍t makigimung dakayu nga bekken nga mamati, winno ya madi pekkem makaawat iya panggep nu, mabalin nga mapanecnekkan na ya pagkurangan na se̍ malasin na ya kasapulan na pekkem, gapu kadiya amin nga magicna na.

²⁵ Ket mailawlawag pe̍ igina diya ilimlimed niya lemlemmet na. Ket iya agten iyan, itu yanin ya panagbabawi nan. Ket aglakeb ngarud nga sidadayaw e̍ Apu Diyusin, ket kunen na nga tutu met nga uwed dakayu ya kinauwed ne̍ Apu Diyus.

Maipanggep iya urnus diya gimung diya mamati

²⁶ Dikad pe̍ agten idi kuma ngin, kakabsat: No aggigimung kayu, tunggal isa dakayu, uwed met kabaellan na. Uwed da mangiyayug iya panagdayaw da e̍ Apu Diyus, se̍ uwed da mangisuru, se̍ uwed da mangipalawag iya kagi ne̍ Apu Diyus, se̍ uwed da pe̍ agkagi ka sabali nga pagkakagi, se̍ uwed da pe̍ mangipatarus kadiyan nga kagi. Ket amin didi, masapul nga agsirbi da nga mangpabileg iya panamati diya aggicgicna.

²⁷ Itu nga no uwed da agkagi kuma ka sabali nga pagkakagi, bekken kuma nga nasursuruc ngem duwa winno tellu diya agkagi, ket agsisinnublat da kuma. Se̍ masapul nga uwed pe̍ isa nga mangipatarus kadiya kagkagiyen da.

²⁸ Ngem no awan makaipatarus iya kagkagiyen da nga sabali nga pagkakagi, agulimec da kuma ngasin iya gimung, ket kagiyen da kuma ngas iya panpanunut da ya panagdayaw da e̍ Apu Diyus.

²⁹ Ket no diya mangikasaba iya kagi ne̍ Apu Diyus, uwed kuma duwa winno tellu ngas nga mangasaba. Ket denggen kuma diya duduma, se̍ da utuben no pudnu diya kagkagiyen da winno bekken.

³⁰ Ket no uwed isa nga agtugtugew nga uwed ipakaemmu ne̍ Apu Diyus igina, masapul nga sumardeng nga mona ya agkagkagi, se̍ sumublat ya isa ngin.

³¹ Ta amin nu, mabalin nga agsasarunu kayu nga mangasaba, tasun masursuruwan kayu kuma nga amin se̍ mapabileg kuma pe̍ ya panpanunut nu nga amin.

³² Ket diya mangikasaba iya kagi ne̍ Apu Diyus, masapul nga emmu da ya mangtengngel iya tarigagay da nga mangasaba.

³³ Ta bekken nga panagkusu ya tumaud e̍ Apu Diyus, no di lugud urnus. Ket no maipanggep kadiya babey nga makigimung, tungpalen nu kuma ya agten mettas nga ugali diya amin nga duduma nga bungguy diya mamati,

³⁴ nga naulimec kuma ngas diya babey iya panaggigimung diya mamati, ta madi da mapalubusan nga agkagi. Ket tungpalen da kuma ngarud to naisuru ito Linteg nito Muyse̍s, nga paiturayan da ngas kuma, kunen na.

³⁵ Ket no uwed gabay da nga emmuwen, saludsuden da nad kuma kadiya asawa da no uwed da iya baley dan. Ta nakal-alyew met no agkagi ya babey iya paggigimungan.

³⁶ Ape̍ kadi nga sabali iyan ya ugali nu iya panaggigimung nu? Dakayu nga iKurintu aya ya naggayatan niya kagi ne̍ Apu Diyus? Winno dakayu ngas kad diya nangipakaemmuwan na?

³⁷ Ket no uwed dakayu diya nae̍cdan kanu ka pannakabalin nga mangikasaba iya kagi ne̍ Apu Diyus, winno diya uwed kanu sabali nga pannakabalin nga ne̍cde̍ niya Ispiritu Santu, ket mailasin da ngarud nga tutu met nga bilin niya Apu didi nga ibagac idi nga surat ku.

³⁸ Ket no uwed da madi mangipangag idi nga ibagbagac, madi kayu pe̍ ipangag diyan nga toley.

³⁹ Dikad pe̍ kakabsat, tarigagayan nu kuma nga sipapasnec ya pannakabalin nga mangikasaba iya kagi ne̍ Apu Diyus. Ket no ya panagkagi ka nadumaduma nga pagkakagi, madi nu pe̍ iparit.

⁴⁰ Ngem basta natacneng se̍ naurnus kuma diya amin nga wangwanglen nu.