1 Kurintu 13 - Ya Baru nga Tulag

Kangrunaan ya panagayat

¹ Ket orey no uwed kuma iyaken ya kabaellan nga agkagi kadiya nadumaduma nga pagkakagi diya toltoley se̍ orey ya pagkakagi kuma pe̍ diya anghe̍le̍s, ket no awan latta ayat ku, arig gac ngas met nga mapatpate̍ngte̍ng nga gensa, winno napagas nga mapat-e̍l nga landuc.

² Agten pe̍ no nalaing ngac kuma nga mangasaba, se̍ no uwed kuma pe̍ iyaken ya pannakabalin nga makaawat kadiya amin nga banbanag nga di pekkem naipacpakaemmu ka toley, se̍ orey no uwed kuma iyaken ya pannakaawat kadiya amin nga banbanag, se̍ no awan kuma nga pulus pagkurangac iya panamatic, tasun makaiyalis sac kuma ka tageytey gapu mettas iya nabileg nga panamatic, ket awan met latta sirsirbic, no bekken nga maidanggay didi ka ayat ku.

³ Ket orey no ikaasic kuma diya amin nga sanicwac kadiya napanglaw, se̍ orey no iyawat ku kuma ya beggic nga pooran da gapu iya pammatic, ket no awan latta ayat ku, awan met pe̍ mamaay na yan nga paglaingac.

⁴ Ket ya toley nga napudnu ya panagayat na kadiya kapada na, naanus se̍ naasi. Ya uwed napudnu nga ayat na, bekken pe̍ nga naimun, winno napangas, winno natangsit.

⁵ Bekken pe̍ nga naalas ya ugali na, se̍ bekken nga pe̍yeng nga ya beggi na ngas ya laglagipen na ya toley nga napudnu ya panagayat na, se̍ bekken nga nalaka nga makaunget, se̍ awan ipaspasukib na nga makapasakit ka nakem.

⁶ Bekken na nga pagragsakan ya dake̍c, no di lugud pagragsakan na met diya nalinteg.

⁷ Nalaka nga mangpasinsiya pe̍ ya toley nga uwed igina ya napudnu nga panagayat. Sitatalec nga pe̍yeng kadiya pada na nga toley, ket sinanama nga pe̍yeng, se̍ narigat pe̍ nga makumsa iya orey nagan na.

⁸ Madi agpatingga ya sirbi niya panagayat. Ngem no ya panangasaba, malabes nad mettas. Agten pe̍ ya panagkagi ka nadumaduma nga pagkakagi, uwed nad pe̍ panagsardeng na. Ket orey ya pannakaemmu niya toley, malabes ngas nad pe̍ ya sirbi na.

⁹ Ta uwed met pagkurangan niya pannakaemmu tida, se̍ uwed pe̍ pagkurangan niya panangasaba tida.

¹⁰ Ngem no madatngan nad yan nga awan pagkurangan nan, malabes ngasin ya sirbi niya uwed pagkurangan na.

¹¹ Kaspagarigan ito kaebbing ku, tumutup mettas iya kinaebbing ku ya panagkagkagic, agten pe̍ ito panagpanpanunut ku se̍ to pannakaawat ku. Ngem ito manacman nac kun, pinalabes ku ngarud dito gangey niya kinaebbing kun.

¹² Ket agten pe̍ iyan ya kasasaad tida ita, ta ita nga timpu, arig nga sumingsingen tida kadiya nasarmingan nas nga banbanag nga bekken pekkem nga nabatad. Ngem natarus nad mettas ya pannakaawat tida. Ngarud, ita nga timpu, kurang pekkem ya pannakaawat ku maipanggep e̍ Apu Diyus. Ngem maawatac nad met ya aminin, agten mettas iya pannakaawat ne̍ Apu Diyus iya amin maipanggep iyaken nin.

¹³ Ket uwed ngarud tellu nga awan panagpatingga da, nga itu ya panamati, se̍ ya sinanama nga panpanunut, se̍ ya panagayat. Ngem kangrunaan kadidi ya panagayat.