1 Kurintu 12 - Ya Baru nga Tulag

Diya pannakabalin nga e̍cde̍ niya Ispiritu Santu

¹ Ket ita, kakabsat, uwed isurat ku dakayun maipanggep kadiya e̍cde̍ niya Ispiritu Santu, ta gabay ku no maawatan nu kuma nga nalaing maipanggep kadidi.

² Ta emmu nu nga ito bekken kayu pekkem nga mamati, ket naawis kayu nga agtungpal kadito didiyusen nu nga bultu nga madi met orey makatimec. Ket naiyaw-awan kayu ka kumpurmi itun.

³ Itu nga gabay ku no maawatan nu nga ya toley nga idalan niya Ispiritu ne̍ Apu Diyus ya panpanunut na, madi na met mabalin ya agkunen nga, “Mailunud kuma nge̍ Je̍sus.” Ket iya agten iyan pe̍, awan toley nga makabalin nga agkunen nga, “E̍ Je̍sus ya Apu,” malacsid no paidaldalan iya Ispiritu Santu.

⁴ Ket adu diya nadumaduma nga pannakabalin nga mae̍cde̍ kadiya mamati, ngem is-isa ngas met ya Ispiritu nga mange̍cde̍ kadiyan.

⁵ Ket nadumaduma pe̍ diya sacsaad nga panagsirbi, ngem is-isa met nga Apu ya pagsirbiyan da.

⁶ Adu pe̍ diya nadumaduma nga kabaellan toley nga maipaay e̍ Apu Diyus, ngem is-isa met nga Diyus ya mangipaariman ka amin diyan nga kabaellan niya tunggal toley.

⁷ Ket ya tunggal isa nga mamati, e̍cdan niya Ispiritu Santu da iya pakasingnan iya kauwed na, nga itu ya mae̍cde̍ igida nga pagsirbi da para iya paglaingan diya pada da.

⁸ Ta diya duduma, e̍cdan niya Ispiritu Santu da iya pannakabalin nga mangasaba sigun iya kinasirib ne̍ Apu Diyus. Ket uwed duduma nga e̍cdan niyan nga Ispiritu ka pannakabalin nga makaawat se̍ mangipakaemmu kadiya banbanag maipanggep e̍ Apu Diyus.

⁹ Ket uwed duduma nga e̍cdan niyan nga Ispiritu iya nabileg nga panamati da. Se̍ uwed duduma nga e̍cdan niyan nga is-isa nga Ispiritu iya pannakabalin da nga mangpalaing kadiya agsakit.

¹⁰ Ket diya duduma, e̍cdan na da ka pannakabalin da nga agariman kadiya nakaskasdaaw nga mangipasingen iya pannakabalin ne̍ Apu Diyus. Diya duduma pe̍, ket mae̍cdan da ka pannakabalin da nga mangikasaba iya kagi ne̍ Apu Diyus. Ket uwed da pe̍ duduma nga mae̍cdan ka pannakabalin nga mangilasin kadiya gayat iya Ispiritu Santu se̍ diya bekken. Ket uwed da pe̍ duduma nga mae̍cdan ka pannakabalin nga agkagi ka nadumaduma nga pagkakagi nga bekken da nga naadal. Ket diya duduma, mae̍cdan da ka pannakabalin nga mangipatarus kadiya kinagi diya sabali, nga nagkagi ka pagkakagi nga di da naad-adal.

¹¹ Ket amin didi nga pannakabalin, awan sabali nga mange̍cde̍ kadidi, no di yas ya Ispiritu Santu. Ket iwaras na ngarud didi nga pannakabalin, nga sabasabali ya e̍cde̍ na iya tunggal isa nga mamati, sigun iya gabay na mettas nga e̍cde̍.

Maiyarig tida iya is-isa nga beggi

¹² Ta dactida nga toley ne̍ Kristu, maiyarig tida kadiya nadumaduma nga parte̍ niya isa nga beggi niya toley, ta orey adu diya parte̍ na, ket is-isa met nga beggi. Ket iya agten iyan pe̍, nakaiyarigan met ne̍ Kristu ya isa nga beggi.

¹³ Ta amin tida, Hudyu man winno bekken nga Hudyu, tagabu man winno bekken, ket agpapada tida nga nabautisaran nga nakikamkameng e̍ Kristu, gapu mettas iya is-isa nga Ispiritu Santu. Se̍ is-isa yani nga Ispiritu nga nae̍cde̍ dactida, nga arig nga is-isa ya naipainum dactida.

¹⁴ Kaspagarigan no ya beggi niya toley manin, adu met diya parte̍ na, bekken nas nga is-isa.

¹⁵ Ket kaspagarigan no makakagi ya saka nga kunen na kuma, “Bekken nac nga maibilang nga isa nga parte̍ niya beggi, ta bekken nac met nga ima,” kunen na kuma. Ngem orey no agten iyan ya panangipagarup na, naibilang latta nga parte̍ niya beggi.

¹⁶ Ket kaspagarigan no ya tinga ya makakagi, nga kunen na kuma, “Bekken nac nga maibilang nga parte̍ niya beggi, ta bekken nac met nga mata,” kunen na kuma. Ngem orey agten iyan ya panangipagarup na, ket naibilang latta nga parte̍ niya beggi.

¹⁷ Ta no paspasig kuma nga mata ya beggi, kumaan na ngarudin ya pannakagicna niya toley? Se̍ no paspasig kuma nga tinga ya beggi, kumaan niya panagellab niya toley?

¹⁸ Ngem nalaing lugud ta inurnus ne̍ Apu Diyus diya tunggal parte̍ niya beggi sigun iya tinarigagayan na.

¹⁹ Ket no is-isa kuma ngas ya parte̍ nga mangbukel iya beggi, kumaan na ngarudin? Awan ngarud mamaay na!

²⁰ Ngem ya kinapudnu na, naariman ya beggi nga adu ya parte̍ na, ngem is-isa nga beggi.

²¹ Ket kaspagarigan manin, no makakagi kuma ya mata, nairradu met no kunen na kuma iya ima, “Madi naka met nga masapul.” Se̍ nairradu pe̍ yin ya ulu no kunen na kuma kadiya saka, “Madi nakayu met nga masapul.”

²² Bekken ngarud nga agten iyan a, ta ya kinapudnu na, masapul niya beggi diya parte̍ na nga ipagarup tida nga e̍teng ngas ya sirbi nga ipaay da.

²³ Ket diya parte̍ niya beggi tida nga di tida laglagipen ya pateg da, didi mettas diya ipangruna tida, ket ipateg tida da nga unay. Ket diya parte̍ nga iyalyew tida nga lingdan tida kuma, itu mettas diya ipangruna tida, ket kawwessan tida da nga nalaing.

²⁴ Ngem diya bekken nga nakal-alyew nga maipasingen nga parte̍ niya beggi tida, awan met kasapulan da nga agten iyan. Ket agten iyan met to panangurnus ne̍ Apu Diyus kadiya parte̍ niya beggi tida, tasun diya parte̍ nga bekken nga maipateg, itu mettas diya nipangruna na, ket ne̍cdan na da iya adu nga pammateg dan.

²⁵ Ket agten iyan ngarud ya inariman ne̍ Apu Diyus nga gangey niya beggi, tasun agsusurut kuma ngas diya parte̍ na, nga madi da agkikinnuntra, no di da lugud agtitinnulung.

²⁶ Ket no maparigatan ya isa nga parte̍, mairaman pe̍ diya duduma iya panagrigat na. Ket no maibilang nga nadayaw ya isa nga parte̍, mairaman pe̍ diya duduma iya pakaanggemman na.

²⁷ Ket agten pe̍ iyan ya kasasaad nu, ta dakayu nga mamati, maiyarig kayu iya beggi ne̍ Kristu. Ket ya tunggal isa dakayu, maiyarig iya isa nga parte̍ niya beggi na.

²⁸ Ket iya agten iyan, uwed dito nipaisaad ne̍ Apu Diyus iya bungguy mamati. Ket ya mona, itu diya apustule̍s. Ket ya maikadduwa, itu diya mangaskasaba. Ket ya maikatlu, itu diya manursuru. Ket uwed da pe̍ diya makaariman ka nakaskasdaaw, se̍ diya uwed pannakabalin da nga mangpalaing kadiya agsakit. Ket uwed da pe̍ diya nalaing nga agistimar kadiya kapada da, se̍ diya nalaing nga mangipangulu, se̍ uwed da pe̍ diya makakagi ka nadumaduma nga pagkakagi nga bekken da nga naadal.

²⁹ Ket emmu tida ngarud nga bekken nga amin tida ya naisaad ka apustul, winno mangasaba, winno manursuru. Bekken nga amin tida ya nae̍cdan ka pannakabalin nga agariman ka nakaskasdaaw.

³⁰ Se̍ bekken nga amin tida ya nae̍cdan ka pannakabalin nga makapalaing kadiya agsakit, winno ya pannakabalin nga makakagi ka nadumaduma nga pagkakagi nga bekken tida nga naadal, winno ya pannakabalin nga mangipatarus kadiya pagkakagi.

³¹ Ngarud, bekken met nga amin dito pannakabalin ya nae̍cde̍ iya tunggal isa dactida, ngem tarigagayan nu kuma met diya napatpateg kadiyan. Ket itan, isuruc dakayu ya kangrunaan nga ugali nga tarigagayan tida kuma: