1 Kurintu 11 - Ya Baru nga Tulag

¹ Ket no dakayu, tuladen dac kuma nga agten pe̍ iya panangtulad ku e̍ Kristu.

Maipanggep iya panagkararag nga sikakayodung iya gimung

² Naragsakan nac gapu dakayu, gapu ta silalagip kayu nga pe̍yeng iyaken, se̍ gapu ta sursuruten nu pe̍ diya sursuru niya pammati tida, sigun ito nisuruc dakayu.

³ Ngem uwed pe̍ gabay ku nga ipakaemmu dakayu, nga e̍ Kristu, ket igina ya pannakaulu niya tunggal isa nga lalaki. Ket no ya babey, pannakaulu na ya asawa na. Ket no e̍ Kristu, e̍ Apu Diyus met ya pannakaulu na.

⁴ Itu nga dake̍c iya lalaki no agteteddung nga agkararag winno mangasaba maipanggep e̍ Apu Diyus. Ta no nakateddung, ket pagsukiran na mettas ya pannakaulu na.

⁵ Ngem ya babey, no agkararag winno mangasaba maipanggep e̍ Apu Diyus nga bekken nga sikakayodung, ket pagsukiran na mettas pe̍ yin ya pannakaulu na. Ket no agten iyan ya wanglen niya babey, dake̍c met nga agten met iya kinadake̍c niya babey nga nakiros ya ebbuc na.

⁶ Dikad pe̍ no madi gabay diya babey ya agkayodung, rumbeng met pe̍ no agpapukis da kuma lugudin. Ngem gapu ta naalas igida ya agpapukis winno ya makirosan, basta agkayodung da ngasin.

⁷ Tutu met yan, ta agten idi: Ya lalaki, bekken nga rumbeng nga agkayodung nga agten kadiya babey. Ta ya lalaki, igina ya kaas-asping ne̍ Apu Diyus se̍ ya pakasingnan iya dayaw na. Ngem ya babey, igina ya pakasingnan iya dayaw niya lalaki.

⁸ Ta ya nona nga lalaki, bekken met nga napauwed nga gayat iya babey, no di lugud ya babey ya napauwed nga gayat iya lalaki.

⁹ Agten iyan ngarud, ta bekken nga naparsuwa ya lalaki gapu iya babey, no di lugud ya babey ya naparsuwa gapu iya lalaki.

¹⁰ Itu nga masapul nga agkayodung diya babey tasun maipasingen pe̍ kadiya anghe̍le̍s nga paipangulu diya babey kadiya asawa da.

¹¹ Ngem orey paipangulu diya babey kadiya asawa da, ket ya kinapudnu na, sigun iya pannakaitipun tida iya Apu, ket agpada da nga makasapul. Ta masapul ngarud niya babey ya lalaki, ket ya lalaki, masapul na met pe̍ ya babey.

¹² Ta orey naggayat ya nona nga babey iya nona nga lalaki, ket nanipud itun, diya lalaki, naiyanac met kadiya babey. Ket e̍ Apu Diyus met ya naggayatan diya amin.

¹³ Ket dakayu mettas kuma ya mangikeddeng ngin: Tumutup aya winno bekken, ya madi agkayodung ya babey no agkararag e̍ Apu Diyus iya pagaaduwan?

¹⁴ Ket sigun pe̍ iya sigud tida nga gangey, ket emmu nu met nga pakaiyal-alyewwan ngarud niya lalaki no deddu ya ebbuc na.

¹⁵ Ngem no ya babey, pakaidayawan na met no deddu ya ebbuc na. Ta ya ebbuc na nga deddu, itu met ya ne̍cde̍ ne̍ Apu Diyus nga agpaay nga paglidum niya ulu na.

¹⁶ Ket orey no uwed kuma dakayu ya mayat nga makisupyat maipanggep idi, madi mi ngas ikasu. Ta awan sabali nga isursuru mi nga ganggangey tida nga mamati, se̍ agten met pe̍ iyan ya tungtungpalen diya duduma nga bungbungguy diya mamati e̍ Apu Diyus.

Maipanggep iya panangilagip tida ito nodi nga pananggidam niya Apu

¹⁷ Ket no maipanggep iya panaggimung nu, madic met maragsakan, ta madi kanu agbanag ka nabaru diya panaggigimung nu, no di lugud kanu agbanag ka dake̍c. Itu nga uwed ibilin ku dakayu maipanggep iyan.

¹⁸ Ket ya mona nga ibagac, ket nadamag ku nga no aggigimung kayu, mabingabingay kanu ya bungguy nu. Ket emmuc pe̍ nga uwed kinapudnu niyan nga kunen da.

¹⁹ Ta masapul ngata nga napagsisina kayu, tasun mailasin kuma no nagan dakayu diya pudnu nga mangtungtungpal iya nalinteg.

²⁰ Ket iya agten iyan, no aguurnung kayu nga mangilagip ito nodi nga pananggidam niya Apu, bekken mettin nga ya Apu ya tutu nga laglagipen nu iya pannangan nu.

²¹ Ta no mangan kayu, dagdagusen kanu niya tunggal isa dakayu ya manganin, nga madi kayu kanu itonan diya duduma. Dikad pe̍ uwed da met age̍ng-e̍nglew win, ket uwed da met kanu nabisin pekkem.

²² Ape̍? Awan kad baley nu nga panganan se̍ uminuman nu? Ape̍ laisen nu diya toley ne̍ Apu Diyus, se̍ iyal-alyew nu diya napanglaw nga kagimung nu? Nagan ngata ya namnamaen nu nga makagic dakayu gapu iya agten iyan nga wangwanglen nu? Maragsakan nac aya gapu dakayu? Bekken met!

²³ Madic ngarud maragsakan kadiyan, ta nipakaemmuc dakayu itun ya nipakaawat mettas niya Apu iyaken maipanggep kadiyan. Ket itu manin ya ipalagip ku dakayu ita, nga ito pannangan de̍ Apu Je̍sus ito gabi nito pannakaiyawat na, namet ka tinapay.

²⁴ Ket nagkararag nga nagyaman e̍ Apu Diyus. Pinisepisey na to tinapay, ket kinunen na, “Idi ya beggic nga maipaay dakayu. Agten idi nga pannangan ya wanglen nu kuma nga panangilagip nu iyaken,” kunen na.

²⁵ Se̍ manin, kalpasan niya pannangan da, ne̍cde̍ na pe̍ igida ya paginuman, ket kinunen na, “Idi nga binasu nga mainum, itu ya pakaemmuwan nu nga uwed kabarbaru nga tulag ne̍ Apu Diyus dakayu, nga mapalagdaan gapu iya dagac. Ket orey no nungey kayu nga aguurnung nga mangilagip iyaken, arimanen nu ya agten idi nga panaginum nga panangilagip nu iyaken,” kunen na.

²⁶ Dikad pe̍ agingga iya sumoli manin niya Apu idi nga lubung, orey nungey kayu nga aguurnung nga agtungpal iya agten iyan nga pannangan se̍ panaginum, ket itu win ya pakalaglagipan nu ito pannakatey niya Apu.

²⁷ Itu nga ya toley nga darusudusen na ya panangilagip na iya Apu iya pannakisangu na nga mangan iya tinapay se̍ uminum iya binasu nga mainum, makabasul ngarud met, ata ipasegged na ya pateg niya beggi se̍ daga niya Apu.

²⁸ Dikad pe̍ ya makisangu nga mangan idi nga tinapay se̍ uminum idi nga binasu nga mainum, masapul nga mona pekkem nga emmuwen na iya lemlemmet na no kustu ya panggep na idi, se̍ mangan se̍ uminumin.

²⁹ Ta ya toley nga nakaekkaekkan ngas se̍ nakainuinum nga madi na lasinen nin ya banag niya beggi niya Apu, ket pakaukuman na met ya pannangan se̍ pananginum na.

³⁰ Ket itu yan ya gapu na nga adu dakayu diya nakapsut se̍ agsasakit, se̍ uwed da met pe̍ diya natey yin.

³¹ Ngem no panunuten tida kuma nga nalaing no nalinteg ya panggep tida, awan ngarud maipabasul dactida.

³² Ket no uwed maipabasul niya Apu dactida, palinteggen nactida, tasun makig-as tida. Ket iya agten iyan, madi tida mairaman iya pannakaukum diya madi mamati.

³³ Dikad pe̍ kakabsat ku, no aguurnung kayu nga mangan iya panangilagip nu ito pannakatey niya Apu, basta agiinnetton kayu, a.

³⁴ Ket no uwed isa nga nabisin dakayu, masapul nga mona pekkem nga mangan iya baley na, se̍ mawe̍ makisangu iya paguurnungan nu. Agten iyan kuma ngarud, tasun bekken kuma nga pakaukuman nu ya panaguurnung nu nga mangan iya panangilagip nu iya Apu. Ket no maipanggep kadiya duduma pekkem nga gabay ku nga ibagbaga dakayu, ket ipakaemmuc ngas nad no umbe̍t tac iyanin.