1 Kurintu 10 - Ya Baru nga Tulag

Pamagbaga dactida dito napasamac kadito pasurut nito Muyse̍s

¹ Kakabsat, gabay ku nga ipalagip dakayu to napasamac kadito am-ama mi nga nipanguluwan nito Muyse̍s itun. To ulep nga nanglidum igida, itu ya nangidalan igida nga amin. Ket nakalasat da nga amin ito Nadgang nga Baybay.

² Ket to panangsurut da ito Muyse̍s ito naidalan da ito ulep se̍ ito nakalasat da ito baybay, itu ya arig nga pannakabautisar niya tunggal isa igida nga pasurut nito Muyse̍s.

³ Ket igida nga amin, nangan da pe̍ ito makan nga pinataud ne̍ Apu Diyus,

⁴ se̍ iminum da pe̍ nga amin ito danum nga pinagayus ne̍ Apu Diyus ito batu. Ket e̍ Kristu mettas ya kaiyarigan nitun nga batu nga pe̍yeng nga uwed igida itun.

⁵ Ngem orey agten iyan to kasasaad da, madi nga naay-ayu nge̍ Apu Diyus iya winangwangel diya kaaduwan igida. Ket itu nga natey da nga nadusa kadiya nadumaduma nga lugar enna away.

⁶ Ket diyan nga napasamac itun, nagbalin da nga pakaemmu nga agpaay dactida, tasun madi tida kuma agtarigagay kadiya dake̍c nga agten igida itun.

⁷ Ngarud, dito duduma igida, nagtungtungpal da ka didiyusen itun, agten mettas iya naisurat iya Bibliya maipanggep ito panagdayaw da itun nga kunen na, “Nangnangan se̍ nagin-inum dito toltoley, se̍ da nagsasala pe̍ nga sidadayaw iya didiyusen da,” kunen na. Ngem no dakayu, bay-an nu ya panagtungpal ka didiyusen.

⁸ Ket dito duduma igida itun, nagariman da ka pannakikamalala. Ket gapu iyan nga winangwangel da nga dake̍c, uwed duwa nga pulu ket tellu nga ribu igida nga nadusa nga natey iya isa ngas nga algew itun. Ket no dactida, madi tida kuma ngarud nga agwangel iya agten iyan nga dake̍c.

⁹ Ket dito duduma igida itun, sinigsigir da met nge̍ Apu Diyus, ket nadusa da pe̍ nga natey gapu iya kagat dito malaga itun. Ket no dactida, masapul nga madi tida kuma lugud sigiren nge̍ Apu Diyus.

¹⁰ Se̍ madi kayu pe̍ pagtagobotoban nge̍ Apu Diyus nga agten kadito duduma igida itun, nga itu to nangibonan ne̍ Apu Diyus igida ito Pumapatey nga Anghe̍l.

¹¹ Ket amin diyan nga napaspasamac igida itun, nagpaay da nga pakaemmu igida. Ket nipaisurat pe̍ ne̍ Apu Diyus diyan para dactida nga aglak-am idi nga timpu nga panungpalan diya timtimpu, tasun pakabagbagaan tida kuma ita.

¹² Dikad pe̍ agannad kuma ya mangipagarup nga nabileg ya panamati nan, ta kaynun no masulisug pekkem nga agbasul.

¹³ Ket tunggal sulisug nga dumateng dakayu, kadawyan da ngas nga pakasulisugan niya toley. Ket e̍ Apu Diyus, laglagipen nactida nga pe̍yeng, nga madi na ipalubus nga masulisug kayu ka madi nu mabalin nga atipaen. Ta no masulisug kayu, e̍cdan nakayu nge̍ Apu Diyus ka gundaway nu nga makalasat, tasun mabalin nu nga ibturan yan nga panulisug.

Awan biyang tidan kadiya didiyusen

¹⁴ Dikad pe̍ patpatgec nga kakabsat, sigun kadito pamagbaga dactida, lisiyan nu ngarudin ya panagtungpal kadiya didiyusen.

¹⁵ Ibagac didi dakayu ta emmuc nga nanakem kayu nga toley. Dakayu mettas kuma ya mangikeddeng no kustu didi nga kunec winno bekken.

¹⁶ Ket itan, ipalagip ku dakayun ya banbanag niya ugali tida nga agtungpal ka panangilagip tida ito pannakatey ne̍ Kristu. Ket ya pananginum tida iya binasu nga mainum nga maikararagan e̍ Apu Diyus, itu yani ya panangipasingen tida nga nairaman tida iya pagbanagan nito pannakaidaga ne̍ Kristu. Ket agten pe̍ ya tinapay nga maibingay dactida, no mangan tida, itu met ya panangipasingen tida nga nairaman tida iya pagbanagan nito pannakaidatun niya beggi ne̍ Kristu.

¹⁷ Ket orey adu tida nga mangan, is-isa nga bukel nga tinapay ya pagbibingayan tida nga kanen. Ket itu ya panangipasingen tida nga nagbalin ya tunggal isa dactida nga parte̍ niya is-isa nga beggi.

¹⁸ Lagipen nu kuma ya ugali diya Israe̍lita. Ta amin diya mangan kadiya idatun da e̍ Apu Diyus, ket makipagdayaw da met e̍ Apu Diyus nga pagdatunan da.

¹⁹ Ket no maipanggep kadiya didiyusen diya bekken nga Hudyu, madic met kayat nga kagiyen nga uwed sirbi niya panangidatun diya toley ka macmakan igida. Ta awan met sirbi da nga tutu, ket awan met pe̍ kaipapennan diya didiyusen da.

²⁰ Ngem ya kayat ku nga kagiyen nga gennung, ket diya bekken nga mamati e̍ Apu Diyus, no agidatun da, ket bekken nga e̍ Apu Diyus ya pagdatunan da, no di lugud diya sacsairu. Ket madic ngarud gabay no makipagtungpal kayu kadiya sacsairu.

²¹ Ta agkuntra met ya uminum kayu ka panangilagip nu iya Apu, se̍ ya mawe̍ kayu pe̍ makiinum iya pagdayaw ka sacsairu. Bekken ngarud nga umisu ya makisangu kayu iya pannangan nga mangipasingen iya panagtungpal nu e̍ Apu Je̍sus, no makisangu kayu pe̍ iya pannangan nga mangipasingen iya panagtungpal nu kadiya sacsairu.

²² Madi tida ngarud wanglen ya agten iyan, tasun madi tida nga pagimunen nga paungten ya Apu. Ta madi tida ngarud kabaellan ya unget na.

Ya pannangan ka makan nga naidatun kadiya didiyusen

²³ Tutu met ya kunen nu nga awan maiparit dactida. Ngem pudnu met pe̍ nga bekken tida nga paglaingan diya amin nga mawangel tida. Tutu ngarud nga awan maiparit dactida, ngem bekken met nga mangpabileg iya panamati tida diya duduma.

²⁴ Ket iya agten iyan, masapul nga laglagipen niya tunggal isa ya paglaingan niya kapada na, bekken nas nga ya bukud na nga paglaingan.

²⁵ Dikad pe̍ no maipanggep iya karni nga laku ka tindaan, mabalin nu nga nginaan nga sidaen. Ngem bekken nu nga saludsuden no naidatun yan nga karni kadiya didiyusen, tasun madi kuma mariribuc ya panpanunut nu.

²⁶ Ta pudnu met ya kunen na iya Bibliya nga, “Ya Apu ya akin-kuwa idi nga lubung se̍ diya amin nga uwed iya lubung,” kunen na.

²⁷ Ket no awisen naka ya isa nga madi mamati, nga makipangan ka kanu igina, se̍ gabay mu ya mawe̍, siwayawaya ka nga mangan iya orey nagan na nga maipasangu ikew. Madi ka agsalsaludsud no awac ya naggayatan na, tasun awan pakariribukam.

²⁸ Ngem no uwed mangibaga ikew nga naidatun kanu yan nga sida ka didiyusen, ket bay-am ngarud nga kanen nin. Ta kaynun no makapasakit ka iya nakem niya nangibaga ikew, no kanem. Se̍ kaynun pe̍ no uwed pakariribukan panpanunut, no kanem latta.

²⁹ Igina ya kayat ku nga kagiyen nga mariribuc ya panpanunut na a, bekken nga ikew. Ngem mabalin nga agsaludsud kayu ngata nga agten idi: “Ape̍ aya nga matiped ya wayawayac gapu ngas iya kurang nga pannakaawat niya sabali nga toley?

³⁰ No pagyaman ku e̍ Apu Diyus ya kanec, ape̍ nga uwed pekkem mangdellaw iyaken gapu iya kanec?” kunen nu ngata.

³¹ Ket agten idi ya isungbat ku iya agten iyan nga saludsud: Orey nagan na nga wanglen nu, agraman ya mangan winno uminum man, ket ipaay nu kuma ngas iya pakaidayawan ne̍ Apu Diyus.

³² Awan kuma wanglen nu nga pakabasulan nga arig nga pakaisacdulan diya Hudyu man winno diya bekken nga Hudyu, winno kadiya pada nu nga mamati.

³³ Ta no iyaken, panggep ku nga paanggemmen diya amin nga toley kadiya orey nagan na nga wangwanglec. Bekken nga ya beggic ki ya ipangpangrunac, no di lugud ya paglaingan niya kaaduwan nga toley, tasun uwed kuma pe̍ pakaisalakanan da.