1 Kurintu 1 - Ya Baru nga Tulag

¹ Iyaken nge̍ Pablu nga pinili ne̍ Apu Diyus gapu iya tarigagay na, nga pinagbalin nac nga apustul nga agpaay e̍ Kristu Je̍sus. Dakami nge̍ kabsat tida nga Suste̍ne̍s ya makin-surat idi.

² Isurat mi yani dakayu nga bungguy nga agpaay e̍ Apu Diyus iyan Kurintu. Nisibna nakayu nge̍ Apu Diyus nga maibilang nga toley na gapu e̍ Kristu Je̍sus. Ket nairaman kayun kadiya amin nga napili nga toley ne̍ Apu Diyus iya orey awac nga edyan da, nga itu diya umaw-awag nga sidadayaw iya nagan ne̍ Je̍su Kristu nga Apu da, nga Apu tida met pe̍.

³ Sapay kuma ta uwed dakayu ya siaayat nga asi, se̍ talna, nga gayat e̍ Apu Diyus nga Ama tida se̍ e̍ Apu Je̍su Kristu.

Maipanggep e̍ Kristu nga pagnamnamaan tida

⁴ Siiiyaman nac nga pe̍yeng e̍ Apu Diyus gapu iya siaayat nga panangaasi na dakayu, gapu iya pannakaitipun nu e̍ Kristu Je̍sus.

⁵ Ta gapu iya pannakaitipun nu e̍ Kristu, nae̍cdan kayu kadiya amin nga masapul nu, nga agten kadiya masapul nu iya panangibaga nu se̍ iya pannakaemmu nu maipanggep iya pammati nu.

⁶ Ket naemmuwanin nga nabileg met ya panamati nu ito naipakaemmu dakayu maipanggep e̍ Kristu itun.

⁷ Itu nga awan pagkurkurangan nu kadiya ikaasi ne̍ Apu Diyus, bayat niya panagpadaan nu iya pannakaiparang manin niya Apu tida nga Je̍su Kristu.

⁸ Ket igina mettas ya mangpabaked iya panamati nu, tasun awan pakaukuman nu no madatnganin ya Timpu niya Apu tida nga Je̍su Kristu.

⁹ Tutu met nga mapagtalkan nge̍ Apu Diyus nga mangtungpal kadiyan, ket igina met ya nangpili dakayu nga maibulun iya Anac na, nga itu nge̍ Je̍su Kristu nga Apu tida.

To madi panagsusurut dito mamati

¹⁰ Kakabsat, gapu iya turay niya Apu tida nga Je̍su Kristu, ipacpakaasic dakayu nga agkikinnaawatan kayu kuma. Ta madi kuma mabingabingay ya bungguy nu, no di lugud is-isa kayu kuma ngin ka panggep se̍ panpanunut.

¹¹ Kunec yani dakayu nga kakabsat ku, ta nadamag ku kadiya kabbalay ne̍ Kluwe̍ nga agsusupyat kayu kanu.

¹² Agsusupyat kayu kunec, ata kunen kanu diya duduma dakayu, “Pasurut nac nge̍ Pablu.” Ket, “E̍ Apulus iyaken,” kunen kanu met diya duduma. Ket diya duduma, kunen da kanu, “Pasurut nac nge̍ Pe̍dru,” winno, “Pasurut nac nge̍ Kristu,” kunen pe̍ kanu diya duduma.

¹³ Ape̍? Nabengbengley aya nge̍ Kristu win? Iyaken nga Pablu aya to natey ito krus para dakayu? Winno ya panangsurut nu mettas iyaken kad to nakabautisaran nu?

¹⁴ Agyaman nac ta bekken nga iyaken ya nangbautisar dakayu, ta awan binautisarac dakayu, malacsid kade̍ Krispu nge̍ Gayu.

¹⁵ Itu nga awan makaibaga nga iyaken ya sinursurut nu ito nabautisaran kayu.

¹⁶ Ay, bo! Malagip ku lugud de̍ E̍ste̍panas nga sangabaley, ta binautisarac da met pe̍, ngem awan malagip kun no uwed pekkem sabali nga binautisarac.

¹⁷ Ta bekken met nga mamacbautisar ya nangibonan ne̍ Kristu iyaken, no di lugud tasun ipakaemmuc ya Makaparagsac nga Damag maipanggep igina. Ket iya panangipakaemmuc iyan, kadawyan nas nga panagkagi ya usarec. Ta no usarec ya kinasirib toley, kaynun lugud no maipalikud ya sirbi nito pannakatey ne̍ Kristu ito krusin.

E̍ Kristu ya pakasingnan tida iya pannakabalin se̍ sirib ne̍ Apu Diyus

¹⁸ Ket bekken nga agpapada ya pannakaawat diya toltoley iya panursuru maipanggep ito inariman ne̍ Je̍su Kristu ito krus. Ta diya toley nga agbanag ngas nga maukum, ibilang da nga awan kaipapennan na. Ngem no dactida nga maisalakan nga toley, pakaemmuwan tida ya kaipapennan na iya pannakabalin ne̍ Apu Diyus.

¹⁹ Ta uwed ngarud to kunen ne̍ Apu Diyus nga naisurat iya Bibliya nga, “Pirdiyec nad ya kinasirib diya mamasirib iya lubung, se̍ pagbalinec nad nga awan mamaay na ya pannakaawat diya uwed kanu pannakaawat na,” kunen na.

²⁰ Dikad pe̍ awan met sirsirbi niya sirib diya mamasirib, orey pe̍ diya manursuru iya Linteg, se̍ diya nalaing nga makidisdiskutir ita nga timpu. Ta nipakaemmu mettin ne̍ Apu Diyus nga awan met sirsirbi iya imatang na ya kinasirib nga tumaud ngas kadiya toley idi nga lubung.

²¹ Ket sigun iya sirib ne̍ Apu Diyus, nirimidyu na nga dactida nga toley, madi tida kabaellan ya mangemmu igina gapu ngas iya kinasirib tida. Ket iya agten iyan, nikeddeng ngarud ne̍ Apu Diyus nga isalakan na nga gennung diya amin nga mamati iya isursuru mi, nga itu met pe̍ ya panursuru nga kunen diya duduma nga awan kanu kaipapennan na.

²² Ta no diya Hudyu, ket ya gabay da, itu ya pagilasinan nga pakapanecnekkan da no pudnu yan nga panursuru. Ket no diya bekken nga Hudyu, ket kinasirib met ya ipatpateg da.

²³ Ngem ya isuru mi nga gennung, itu ya maipanggep e̍ Kristu nga nailansa ka krus. Ket idi nga panursuru mi maipanggep iya nakatayan na, ket arig nga pakaisacdulan diya Hudyu win, nga pakalucsawan da. Ket no diya bekken nga Hudyu, kunen da met nga awan kanu kaipapennan niyan nga panursuru.

²⁴ Ngem kadiya toley nga pinili ne̍ Apu Diyus, nga Hudyu man winno bekken nga Hudyu, e̍ Kristu met ya ibilang da nga pakaemmuwan iya pannakabalin se̍ sirib ne̍ Apu Diyus.

²⁵ Ta diya rimidyu ne̍ Apu Diyus nga ipagarup diya toley nga awan kaipapennan na, ket ad-adu lugud ya kinasirib na kadidi ngem iya kinasirib niya toley. Ket ya maipagarup nga kinakapsut ne̍ Apu Diyus, nabilbileg lugud ngem iya kinabileg toley.

²⁶ Orey dakayu, kakabsat, laglagipen nu kuma no kumaan nito nakapiliyan nu e̍ Apu Diyus, ta manmanu dakayu ya ibilang toley nga nasirib, winno naturay, winno naiyanac nga mabigbig.

²⁷ Ngem orey agten iyan, ta diya ibilang toley nga awan kaipapennan na, itu lugud diya pinili ne̍ Apu Diyus nga agbalin nga kuwa na, tasun iyal-alyew na diya agkunen nga nasirib da kanu. Ket diya ibilang toley nga nakapsut, itu pe̍ diya pinili ne̍ Apu Diyus, tasun iyal-alyew na diya agkunen nga nabileg da kanu.

²⁸ Ngarud, pinili ne̍ Apu Diyus nga mapadayawan iya imatang na diya bekken nga nadayaw winno napateg ka toley idi nga lubung. Se̍ orey diya ibilang toley nga awan kanu mamaay na, ket itu mettas diya pinili ne̍ Apu Diyus, tasun agbalin nga gennung nga awan lugud mamaay diya ipatpateg toley idi nga lubung.

²⁹ Agten iyan ngarud ya winangel ne̍ Apu Diyus tasun awan toley nga makapagpasindayaw iya imatang na.

³⁰ Ta e̍ Apu Diyus mettas ya nangpaitipun dactida e̍ Kristu Je̍sus, nga igina ya pinagbalin ne̍ Apu Diyus nga pagtaudan niya sirib tida, se̍ ya pannakapalinteg tida iya imatang na, se̍ ya pannakaisaad tida nga toley na, se̍ ya pannakawayawaya tida kadiya basbasul tidan.

³¹ Ket iya agten iyan, tutu ngarud met to naisurat iya Bibliya nga kunen na, “No uwed mayat nga agpasindayaw, ket diya ar-ariman nas niya Apu kuma ya ipasindayaw na,” kunen na.