1 Juan 5 - Ya Baru nga Tulag

Ya panangabac tida iya kinadake̍c

¹ Amin diya mamati nga e̍ Je̍sus ya Kristu nga nibon ne̍ Apu Diyus, ket anac ne̍ Apu Diyus da. Ket emmu tida met nga amin diya agayat iya isa nga ama, ayaten da met pe̍ ya anac na.

² Ket no ayaten tida nge̍ Apu Diyus se̍ tungpalen tida diya bilbilin na, emmu tida nga pudnu ya panagayat tida kadiya anac na.

³ Ta ya pudnu nga panagayat e̍ Apu Diyus, ket agten idi: Pudnu ya panagayat tida igina no tungpalen tida diya bilbilin na. Ket bekken met nga pumarigat dactida diya bilbilin na.

⁴ Tutu met yan, ta orey nagan na nga nagbalin nga anac ne̍ Apu Diyus, abaken na ya kinadake̍c idi nga lubung. Ket ya panamati tida, itu met ya pangabac tida iya kinadake̍c iya lubung.

⁵ Dikad pe̍ ya makaabac iya kinadake̍c iya lubung, awan sabali no di yas ya mamati nga e̍ Je̍sus ya Anac ne̍ Apu Diyus.

Diya pammanecnec maipanggep e̍ Je̍sus

⁶ Ket e̍ Je̍su Kristu, igina met ya uwed duwa nga pammanecnec nga nipasingen na ito inumbe̍t itun. Ket danum se̍ daga dito pammanecnec na. Bekken nas nga danum ya pammanecnec ne̍ Je̍sus, no di pe̍ daga. Ket ya Ispiritu Santu met pe̍ ya mangipanecnec iya pudnu maipanggep igina, ta agpudnu was met ya Ispiritu Santu.

⁷ Dikad pe̍ uwed met tellu nga mangipanecnec maipanggep e̍ Je̍su Kristu:

⁸ Uwed ya Ispiritu Santu, ya danum, se̍ ya daga. Ket agpapada met ya ipanecnec didi nga tellu nga pammanecnec.

⁹ No uwed kuma toley nga mangpanecnec, patiyen tida ngarud ya kagi na. Dikad pe̍ no e̍ Apu Diyus, nangnangruna kuma ngarud nga patiyen tida ya pammanecnec na maipanggep iya Anac na. Ta napatpateg met ya pammanecnec ne̍ Apu Diyus ngem iya pammanecnec niya toley.

¹⁰ Dikad pe̍ ya toley nga mamati iya Anac ne̍ Apu Diyus, uwed mettas iya lemlemmet na ya pammanecnec maipanggep kadidi nin. Ngem ya madi mamati iya nipanecnec ne̍ Apu Diyus, arig nga kunen na nga agbusid nge̍ Apu Diyus, ta madi na patiyen ya nipanecnec ne̍ Apu Diyus maipanggep iya Anac na.

¹¹ Ket ya banag nidi nga panangipanecnec ne̍ Apu Diyus maipanggep iya Anac na, agten idi: Ne̍cdan nactida nge̍ Apu Diyus ka agnanayun nga biyag, ket ya Anac na mettas ya paggayatan niyan nga biyag.

¹² Ya naitipun iya Anac, uwed met igina yan nga biyagin. Ngem ya madi naitipun iya Anac ne̍ Apu Diyus, awan met igina yan nga biyag.

Ya talged tida maipanggep iya biyag nga agnanayun

¹³ Isurat ku didi nga banag dakayu nga mamati iya kinaturay niya Anac ne̍ Apu Diyus, tasun maemmuwan nu nga uwed dakayun ya biyag nga agnanayun.

¹⁴ Ket sinanama tida e̍ Apu Diyusin, ta emmu tida nga ipangag nactida iya orey nagan na nga adngen tida igina nga maitutup iya tarigagay na.

¹⁵ Ket gapu ta emmu tida nga ipangag nactida nge̍ Apu Diyus iya orey nagan na nga adngen tida igina, emmu tida met pe̍ nga mae̍cdan tida ngarud kadiya adngen tida.

¹⁶ Ket iya agten iyan, no uwed isa dakayu nga makasingen iya kabsat na ka pammati nga agar-ariman ka basul, agpacpakaasi kuma e̍ Apu Diyus maipanggep iyan nga agbasbasul. Ket no bekken nga itu ya panagbasbasul nga agbanag ka patey, mae̍cdan ka biyag. Uwed met panagbasbasul nga agbanag ka patey, ngem bekken nga itu ya kunec nga ikararagan nu kuma.

¹⁷ Tutu met nga basul ya amin nga dake̍c nga wanglen niya toley, ngem uwed met pe̍ panagbasul nga madi agbanag ka patey.

Diya maemmuwan diya mamati

¹⁸ Emmu tida nga diya nagbalin nga anac ne̍ Apu Diyus, madi da agbasbasulin, ta aywanan met niya Anac ne̍ Apu Diyus da, tasun awan mabalin niya diyablu nga managdacdake̍c igida.

¹⁹ Emmu tida nga no dactida, kamkameng nactida nge̍ Apu Diyus. Ngem diya duduma nga toltoley iya lubung, kamkameng met niya diyablu nga managdacdake̍c.

²⁰ Ket emmu tida pe̍ nga inumbe̍tin ya Anac ne̍ Apu Diyus, ket ne̍cdan nactida ka pannakaawat tasun maemmuwan tida ya pudnu nga Diyus. Ket naitipun tidan iya pudnu nga Diyus, ta naitipun tida mettin iya Anac na nga Je̍su Kristu. Igina met ya pudnu nga Diyus se̍ paggayatan niya agnanayun nga biyag.

²¹ Dakayu nga patpatgec nga an-anac, madi kayu kuma ngarud makibiyang kadiya didiyusen.