1 Juan 4 - Ya Baru nga Tulag

Ya pagilasinan iya pudnu nga panursuru

¹ Patpatgec nga kakabsat, madi kayu kuma patiyen diya amin nga agkunen nga uwed kanu igida ya Ispiritu ne̍ Apu Diyus. Emmuwen nu kuma nga mona no pudnu nga gayat e̍ Apu Diyus ya panpanunut da, ta adu win diya mangaskasaba ka busid iya amin nga lubungin.

² Agten idi ya pakaemmuwan nu no tutu nga ya Ispiritu ne̍ Apu Diyus ya mangidalan iya isa nga toley: No kunen na nga siaannamung nga e̍ Je̍su Kristu ya naipatoley nga nibon ne̍ Apu Diyus, ket maemmuwan nun nga gayat e̍ Apu Diyus ya panpanunut na.

³ Ngem diya amin nga madi umannamung iya panursuru nga e̍ Je̍sus ya naipatoley nga nibon ne̍ Apu Diyus, ket bekken nga gayat e̍ Apu Diyus ya panpanunut da. Ket itu met yan ya panpanunut nga maikuntra e̍ Kristu. Nadamag nu ngarudin maipanggep iya umbe̍t nad nga mangkuntra e̍ Kristu. Ket orey ita, uwed mettin ya agten iyan nga panpanunut idi nga lubung.

⁴ Patpatgec nga an-anac, kamkameng nakayu ngarud nge̍ Apu Diyusin, ket inabac nu mettin dito uwed panpanunut da nga maikuntra e̍ Kristu. Ta uwed met dakayu nge̍ Apu Diyus, ket nangatngatu ngarud met ya uwed dakayu ngem iya uwed kadiya mangituray idi nga lubung.

⁵ Dito mangaskasaba nga maikuntra e̍ Kristu, tumaud das iya lubung ya panpanunut da, ket itu ngarud ya isursuru da. Ket iya agten iyan, diya toltoley nga paiturayan iya panpanunut nga tumaud idi nga lubung, ipangag da ngarud diya agten iyan nga panursuru da.

⁶ Ngem dactida, kamkameng nactida nge̍ Apu Diyus. Ket diya makaem-emmu e̍ Apu Diyus, ipangag da ngarud diya isursuru tida. Ngem diya bekken nga kamkameng ne̍ Apu Diyus, madi nactida gabay nga ipangag. Ket agten iyan ya pakailasinan tida iya pudnu nga panpanunut nga gayat e̍ Apu Diyus, se̍ ya panpanunut nga busid.

Ya ayat ne̍ Apu Diyus dactida

⁷ Patpatgec nga kakabsat, agiinnayat tida kuma, ta gayat e̍ Apu Diyus ya ayat. Dikad pe̍ gapu ta gayat e̍ Apu Diyus ya ayat, emmu tida nga nagbalin nga anac ne̍ Apu Diyus diya amin nga agayat, se̍ emmu tida nga em-emmu da nge̍ Apu Diyus.

⁸ Ngem diya madi agayat, emmu tida nga madi da pekkem em-emmu nge̍ Apu Diyus, ta e̍ Apu Diyus met ya paggayatan niya ayat.

⁹ Ket nipasingen ne̍ Apu Diyus ya ayat na dactida ito nibon na ya kackaisu nga Anac na idi nga lubung, tasun biyagen nactida gapu igina.

¹⁰ Ket ya ayat nga kunec, bekken nga ya panagayat tida e̍ Apu Diyus, no di lugud ya panagayat ne̍ Apu Diyus dactida. Ta igina, nibon na met ya Anac na nga pakaudasan nga pakapakawanan diya basbasul tida.

¹¹ Patpatgec nga kakabsat, agten iyan ngarud ya panagayat ne̍ Apu Diyus dactida, ket itu nga masapul tida met pe̍ ya agiinnayat.

¹² Pudnu met nga awan pekkem nakasingen e̍ Apu Diyus. Ngem no agiinnayat tida, maemmuwan tida nga laglagipen nactida nge̍ Apu Diyus, se̍ maemmuwan tida pe̍ nga matungpalin ya panggep na maipanggep iya ayat na dactida.

Ya panangiparis tida iya panagayat ne̍ Apu Diyus

¹³ Nae̍cdan tida mettin iya nipaay ne̍ Apu Diyus dactida nga tumaud iya Ispiritu na. Ket iya agten iyan, emmu tida nga silalagip tida nga tutu e̍ Apu Diyus, se̍ silalagip met pe̍ nge̍ Apu Diyus dactida.

¹⁴ Ket no dakami, nasingen mi met itun ya Anac ne̍ Apu Diyus, ket ipadamag mi met nga igina ya nibon niya Ama idi nga lubung tasun isalakan na diya toltoley.

¹⁵ Ket diya orey nagan na nga umannamung iya panursuru nga Anac ne̍ Apu Diyus nge̍ Je̍sus, laglagipen ne̍ Apu Diyus da, se̍ laglagipen da met pe̍ nge̍ Apu Diyus.

¹⁶ Ket iya agten iyan, naemmuwan se̍ namnamaen tidan ya panagayat ne̍ Apu Diyus dactida. Ngarud, e̍ Apu Diyus ya paggayatan niya ayat. Dikad pe̍ ya toley nga silalagip iya panagayat na kadiya kapada na, ket silalagip pe̍ yin e̍ Apu Diyus, ket laglagipen met pe̍ ne̍ Apu Diyus yan nga toley.

¹⁷ Ket iya agten iyan, matungpal nad ya panggep ne̍ Apu Diyus maipanggep iya ayat na dactida, tasun sitatalged tida nad iya timpu niya panangukum na. Agtalged tida ngarud met gapu ta iparparis tida met ita idi nga lubung ya ugali tida iya ugali ne̍ Kristu.

¹⁸ Tutu met nga agtalged tida iya imatang ne̍ Apu Diyus, ta awan kansing diya agayat. Agten iyan nga tutu, ta ya panagayat nga awan pagkurangan na, ket pagpukawen na met ya ansing. Ket diya agansing pekkem, agkurang pekkem ya panagayat da, ta mansing da pekkem kaynun no madusa da.

¹⁹ Ket no dactida, agayat tida ngarudin gapu ta nona nga inayat nactida nge̍ Apu Diyus.

²⁰ Ngem no uwed agkunen nga ayaten na kanu nge̍ Apu Diyus, ngem kagura na met latta ya kapada na, agbusid met. Ta no madi na ayaten ya kapada na nga masingen na, madi met mabalin nga ayaten na nge̍ Apu Diyus nga madi na masingen.

²¹ Ngarud, uwed met ya nibilin ne̍ Kristu dactida, nga ya agayat e̍ Apu Diyus, masapul met pe̍ nga agayat iya kapada na.