1 Juan 3 - Ya Baru nga Tulag

¹ Lagipen nu kuma ya dackel nga panagayat niya Ama dactida: Gapu iya panagayat na, maawagan tida met ka anac ne̍ Apu Diyus, ket pudnu met nga nagbalin tida nga an-anac nan. Ngem diya madi mamati igina idi nga lubung, madi da mailasin ya kinapudnu maipanggep dactida nga anac na, ta madi da met pe̍ nailasin ya kinapudnu maipanggep e̍ Apu Diyus.

² Patpatgec nga kakabsat, an-anac nactida ngarud nge̍ Apu Diyusin. Ngem orey an-anac nactidan, bekken pekkem nga naipakaemmu dactida no kumaan nad niya pagbanagan nidi nga kasasaad tida. Ngem emmu tida nga no agparang nad manin nge̍ Kristu idi nga lubung, agbalin tida met nga agten igina. Ta no masingen tida, nalawag nad dactidan ya kinapudnu maipanggep igina.

³ Ket amin diya sinanama kadiyan gapu e̍ Kristu, masapul nga iparis da met ya panagbiyag da iya kinadalus na.

Pakailasinan kadiya anac ne̍ Apu Diyus ya madi panagbasbasul

⁴ Ngem ya orey nagan na nga agariman ka basul, ket agariman met ka maikuntra iya paglinteggan ne̍ Apu Diyus, ta maikuntra iya linteg na ya basul.

⁵ Ngem emmu nu nga awan basul ne̍ Je̍su Kristu. Ket to numbe̍tan na ito nagparang itun, ket tasun mangipac ka basul.

⁶ Dikad pe̍ ya toley nga silalagip e̍ Kristu, madi met agbasbasul. Ngem ya sibabasul nga toley, madi na pekkem nga nasingen nge̍ Je̍su Kristu, se̍ madi na pe̍ em-emmu.

⁷ Patpatgec nga an-anac, madi kayu kuma nga maiyaw-awan iya kunen diya toley. Ta ya kinapudnu na, ya toley nga agar-ariman kadiya nalinteg, ket nalinteg met, nga agten mettas e̍ Kristu nga nalinteg.

⁸ Ngem ya diyablu nga gennung, sibabasul met manipud ito panangrugi niya amin. Itu nga kameng na pe̍ ya agar-ariman ka basul. Ngem itu met ya gapu nito panagparang niya Anac ne̍ Apu Diyus itun, ta inumbe̍t tasun pirdiyen na diya wangwanglen niya diyablu.

⁹ Ket iya agten iyan, diya an-anac ne̍ Apu Diyus, madi da agar-ariman ka basul, ta uwed met igidan ya kinaDiyus na. Madi ngarud mabalin nga agbasbasul dan, ta an-anac ne̍ Apu Diyus dan.

¹⁰ Dikad pe̍ uwed pakailasinan tidan kadiya an-anac ne̍ Apu Diyus se̍ kadiya an-anac niya diyablu. Agten idi ya pakailasinan tida: Ya toley nga madi agariman ka nalinteg winno madi agayat iya kapada na, bekken met nga anac ne̍ Apu Diyus.

Ya pudnu nga panagayat diya anac ne̍ Apu Diyus

¹¹ Agten iyan ngarud, ta ya naisursuru dakayu manipud ito damu kayu nga mamati, ket idi met: Agiinnayat tida kuma.

¹² Bekken tida kuma nga agten ito Kain nga kameng niya diyablu nga managdacdake̍c. To Kain, pinatey na met to adi na itun. Ta dito wangwangel nito adi na, ket nalinteg. Ngem dito wangwangel ne̍ Kain nga gennung, dake̍c met. Itu ya gapu na nga pinatey na to adi na.

¹³ Dikad pe̍ kakabsat, madi kayu kuma nga masikuran no gumura dakayu diya madi mamati nga uwed idi nga lubung.

¹⁴ Dactida nga mamati, naiyalis tidan iya turay niya biyag, manipud iya turay niya patey. Ket ya panagayat tida kadiya kakabsat tida ka pammati, itu ya pakaemmuwan tida nga tutu yan. Ngem ya madi agayat kadiya kapada na, ket paiturayan met iya turay niya patey.

¹⁵ Ta orey nagan na nga gumura iya kapada na, maibilang nga pumatey. Ket emmu tida nga diya pumatey, madi da met paiturayan iya turay niya agnanayun nga biyag.

¹⁶ Ngem nalawag dactidan no kumaan niya pudnu nga panagayat, ta nipasingen ne̍ Kristu dactida ito nituluc na ya biyag na nga naipaay dactida. Ket agten tida kuma pe̍ iyan, ta ituluc tida kuma pe̍ yin ya biyag tida nga maipaay kadiya kakabsat tida ka pammati.

¹⁷ Ket no uwed makasingen iya kabsat na nga agkasapulan, ngem madi na kaasiyan orey uwed igina ya ikaasi na kuma, nalawag met nga bekken nga siaayat e̍ Apu Diyus.

¹⁸ Patpatgec nga an-anac, ya panagayat tida, ket bekken kuma ngas nga kagi tida winno kasaba tida ya patingga na, no di lugud ipasingen tida ya panagayat tida gapu kadiya wangwanglen tida, tasun pudnu kuma ya panagayat tida.

Ya panagtalged tida e̍ Apu Diyus

¹⁹ Ket ya napudnu nga panagayat tida iya kapada tida, itu ya pakaemmuwan tida nga kameng nactida ya pudnu nga pammati. Ket iya agten iyan, agtalged tida pe̍ iya imatang ne̍ Apu Diyus.

²⁰ Ket orey no madanagan tida pekkem gapu kadiya basbasul tida, agtalged tida latta e̍ Apu Diyus. Ta ad-adu ya emmu ne̍ Apu Diyus ngem iya uwed iya panpanunut tida, ta emmu na ya amin.

²¹ Ket agten idi, patpatgec nga kakabsat: No awan emmu tida nga basul tida, agtalged tida iya imatang ne̍ Apu Diyus.

²² Ket orey nagan na nga adngen tida igina, ipaay na dactida, ta tungpalen tida diya bilin na se̍ wanglen tida pe̍ diya makaay-ayu igina.

²³ Ket didi nga bilin ne̍ Apu Diyus nga tungpalen tida, ket agten idi: Mamati tida iya kinaturay niya Anac na nga Je̍su Kristu, se̍ agiinnayat tida pe̍, maikanatad ito nibilin na dactida.

²⁴ Ket diya agtungpal kadiya bilin ne̍ Apu Diyus, silalagip da igina, ket silalagip met pe̍ nge̍ Apu Diyus igida. Ket emmu tida nga tutu nga silalagip nge̍ Apu Diyus dactida, ta uwed met dactida ya Ispiritu na nga nipaay na dactidan.