1 Juan 2 - Ya Baru nga Tulag

Ya mangibegbeggi dactida e̍ Apu Diyus

¹ Isurat ku didi nga banbanag dakayu nga patpatgec nga an-anac, tasun madi kayu kuma agbasul. Ngem no uwed makabasul, uwed met agpakaasi nga mangibegbeggi dactida iya Ama, nga itu nge̍ Je̍su Kristu nga nalinteg.

² Ta e̍ Je̍su Kristu mettas ya pakaudasan nga pakapakawanan diya basbasul tida, ket bekken nas nga diya basbasul tida, no di pe̍ diya basbasul diya amin nga toltoley iya lubung.

Diya tutu nga makaawat maipanggep e̍ Apu Diyus

³ Ket masiguradu tida nga tutu nga em-emmu tida nge̍ Apu Diyus no tungpalen tida diya bilbilin na.

⁴ No uwed toley nga agkunen kuma nga, “Em-emmuc kun nge̍ Apu Diyus,” kunen na kuma, ngem madi na tungpalen diya bilbilin ne̍ Apu Diyus, ket agbusbusid met yan nga toley, ket madi na met emmu ya pudnu nga pammati.

⁵ Ngem ya agtungtungpal nga gennung iya kagi ne̍ Apu Diyus, napaw-is nga tutu win ya pagbanagan niya panagayat ne̍ Apu Diyus igina. Ket agten idi ya pakaemmuwan tida nga kameng nactida nge̍ Apu Diyus:

⁶ Ya agkunen nga, “Laglagipec nge̍ Apu Diyus,” kunen na, ket masapul nga tuladen na met ya nalinteg nga ugali ne̍ Apu Je̍sus.

Maipanggep iya bilin nga agayat tida iya kapada tida

⁷ Patpatgec nga kakabsat, bekken nga kabarbaru yani nga bilin nga isurat ku dakayu, ta sigud met nga naipakaemmu dakayun, manipud ito damu nito panamati nu. Dikad pe̍ bekken nga sabali yani nga ibagac dakayu, no di ket itu met to naipadamag dakayu itun.

⁸ Ngem orey bekken nga kabarbaru yani nga bilin nga isurat ku dakayun, ket arig nga kabarbaru met dakayu. Ket nasingen met ya nabaru nga pagbanagan na ito panagbiyag ne̍ Je̍sus itun, se̍ masingen met pe̍ iya panagbiyag nu ita. Agten iyan nga tutu, ta arig nga agsirnac kin ya pudnu nga mangwada, ket agpucpukaw mettin ya gicbet.

⁹ No uwed agkunen nga, “Makitipun nac kun iya wada,” kunen na kuma, ngem gumurgura met iya kapada na, ket nagicbet pekkem ya ugali na.

¹⁰ Ngem ya agayat iya kapada na, itu ya tutu nga silalagip iya ipawada ne̍ Apu Diyus nga arig nga wada, ket awan pakaiduclapan na.

¹¹ Ngem ya gumurgura iya kapada na, uwed pekkem iya gicbet, ket itu win ya sursuruten na. Ket ya agten iyan nga toley, madi met makailasin iya pennan na, ta arig nga nakulap gapu iya gicbet.

Pangpabileg kadito sinuratan ne̍ Juan

¹² Dakayu nga ebbing, agsurat tac dakayu gapu ta napakawanin diya basbasul nu, gapu iya kinaturay ne̍ Kristu.

¹³ Dakayu nga am-ama, agsurat tac dakayu gapu ta em-emmu nun nge̍ Kristu, nga igina mettas ya uwed nga pe̍yeng orey ito panangrugi niya amin. Dakayu nga babagu, agsurat tac dakayu gapu ta inabac nun ya diyablu nga managdacdake̍c. Ngarud, agsurat tac dakayu nga ebbing, gapu ta em-emmu nun ya Ama.

¹⁴ Agsurat tac pe̍ dakayu nga am-ama, gapu ta em-emmu nun ya uwed nga pe̍yeng orey ito panangrugi niya amin. Agsurat tac pe̍ dakayu nga babagu, gapu ta nabileg ya panamati nu e̍ Apu Diyus, se̍ silalagip kayu iya kagi na nga uwed nga pe̍yeng dakayu, ket se̍ gapu ta inabac nun ya managdacdake̍c.

Ya panangipateg kadiya dake̍c nga banbanag

¹⁵ Madi kayu kuma ipateg diya dake̍c nga ugali winno kukuwa nga uwed idi nga lubung. Ya toley nga mangipateg kadidi, ket madi na ipateg ya Ama.

¹⁶ Ta amin diya dake̍c nga ugali idi nga lubung, nga agten iya pakabasulan niya toley gapu kadiya tarigagay niya kinatoley na, se̍ ya panagagum kadiya masingen na, se̍ ya panangipasindayaw kadiya sansanicwa na, madi ngarud tumaud didi iya Ama, no di lugud tumaud kadiya uwed idi nga lubung.

¹⁷ Ket diya agten kadiyan nga ugali nga makaawis dakayu, agpatingga da ngas met, ta mapucpukaw mettin ya amin nga uwed iya lubung ngi. Ngem ya toley nga agtungpal iya tarigagay ne̍ Apu Diyus nga gennung, ket agnanayun met.

Diya mangkuntra e̍ Kristu

¹⁸ An-anac ku, dandani mettin ya panagpatingga nidi nga timpu. Ket nasuruwan kayun nga uwed umbe̍t nga mangkuntra e̍ Kristu no matungpal yani nga timpu win. Ket ita, adu mettin diya kumunkuntra e̍ Kristu. Itu nga emmu tida nga dandani ya kaodiyan nga timpu win.

¹⁹ Didi nga kumunkuntra e̍ Kristu, ket bekken tida nga tutu nga kamkameng didi, itu nga simina da dactidan. Ta no tutu da kuma nga kamkameng tida, ituluy da kuma ya pannakitipun da dactida. Ngem simina da mettin, ket itu nga nabatadin nga bekken tida da nga tutu nga kamkameng.

²⁰ Ket no dakayu, uwed dakayun ya tulung nga ipaay niya Ispiritu Santu, ket makaemmu kayu nga amin iya kinapudnu win.

²¹ Madic met kunen nga madi kayu pekkem emmu ya pudnu maipanggep iya pammati tida, ta emmu nu ngarudin. Ngem isurat ku yani dakayu gapu ta gabay ku was nga ipalagip dakayu, se̍ gapu ta emmu nu met nga awan busid nga tumaud iya kinapudnu.

²² Ket no nagan ya agbusid nga kunec, ket itu ya mangagi nga bekken nga e̍ Je̍sus ya Kristu nga nibon ne̍ Apu Diyus. Itu met ya kunec nga kumuntra e̍ Kristu, ta ilibac na met ya Ama se̍ ya Anac.

²³ Ngarud, ya orey nagan na nga mangilibac iya kinaKristu niya Anac, awan met pannakitipun na iya Ama. Ngem ya toley nga mangipakaemmu iya annamung na iya Anac, uwed ngarud pe̍ pannakitipun na iya Ama.

²⁴ Dikad pe̍ no dakayu, silalagip kayu kuma ngarud kadito naisuru dakayu, manipud ito damu nu pekkem nga mamati. Ta no pe̍yeng kayu nga silalagip kadiyan, pe̍yeng nu pe̍ nga laglagipen ya Anac se̍ ya Ama.

²⁵ Ket laglagipen nu pe̍ ya nikari ne̍ Kristu dactida, nga itu ya agnanayun nga biyag.

²⁶ Isurat ku didi dakayu tasun maawatan nu kuma maipanggep kadito mayat nga mangiyaw-awan dakayu.

²⁷ Ket no dakayu, silalagip kayu iya tulung nga ipaay niya Ispiritu Santu nga uwed nga pe̍yeng dakayu, nga itu ya ne̍cde̍ ne̍ Kristu dakayu. Itu nga awan met kasapulan nu nga sabali nga mangisursuru dakayun, ta ya Ispiritu Santu met ya mangisuru dakayu maipanggep ka amin nga banbanag. Ket pudnu was met ya isursuru na dakayu, nga awan busid na. Itu nga laglagipen nu kuma ngarud nge̍ Kristu, sigun iya nisuru niya Ispiritu Santu dakayu.

²⁸ Ket itan, an-anac ku, silalagip kayu kuma ngarud e̍ Je̍su Kristu, tasun nad no agparang manin, sinanama tida kuma. Ket iya agten iyan, madi tida nad malyew iya imatang na no umbe̍tin.

Diya naibilang nga anac ne̍ Apu Diyus

²⁹ Ket emmu nu met nga nalinteg nge̍ Kristu. Itu nga emmu nu met pe̍ nga anac ne̍ Apu Diyus ya amin nga agariman iya nalinteg.