1 Juan 1 - Ya Baru nga Tulag

Maipanggep e̍ Je̍su Kristu nga nainagan ka Kagi

¹ Agsurat tac dakayu maipanggep iya maawagan ka Kagi Biyag. Ket ya Kagi, uwed nga pe̍yeng, manipud ito panangrugi niya amin. Nagicna mi ya kinagi na se̍ nasingen mi met pe̍, ta binetbettaan mi se̍ sine̍cde̍ng mi pe̍ ya beggi na mettas.

² Dakami ya mangipadamag maipanggep iya biyag na, ta nasingen mi met ito nagparang dakami. Itu nga ipakaemmu mi dakayu yani nga biyag, ta naiparang dakami itun. Ket itu yan ya agnanayun nga biyag nga pe̍yeng nga uwed iya Ama orey itun pekkem.

³ Ngarud, nasingen mi se̍ nagicna mi, ket itu win ya ipakaemmu mi dakayun, tasun agpapada tida kuma ka panpanunut nga mibulubulun iya Ama se̍ iya Anac na nga Je̍su Kristu.

⁴ Ket didi nga banbanag, isurat mi dakayu tasun awan pagkurangan niya anggem tida.

Ya pannakibulun tida e̍ Apu Diyus

⁵ Ket ipakaemmu mi dakayu dito nagicna mi nga nisursuru ne̍ Je̍su Kristu. Ket agten idi: E̍ Apu Diyus, maawagan ka Wada, ket awan pulus gicbet igina.

⁶ Dikad pe̍ no sumurut tida pekkem kadiya nagicbet nga banbanag, agbusid tida met no kunen tida nga makibulun tida e̍ Apu Diyus, ket bekken nin nga ya pudnu nga pammati ya tungpalen tidan.

⁷ Ngem no sumurut tida nga gennung iya wada, nga agten iya panagedyan ne̍ Apu Diyus iya wada, ket uwed ngarud pannakibulun tida iya tunggal isa dactida, se̍ nadalusan tidan kadiya tunggal isa nga basul tida gapu ito pannakaidaga ne̍ Je̍sus nga Anac na.

⁸ No kunen tida nga awan basul tida, allilawen tida ya beggi tida, ket madi tida met emmu ya pudnu nga pammati.

⁹ Ngem no situtulnug tida nga mangipakaemmu kadiya basbasul tida, siguradu tida nga wanglen ne̍ Apu Diyus ya nalinteg, nga pakawanen nactida kadiya basbasul tida, se̍ dalusan nactida ka amin nga kinadake̍c.

¹⁰ No kunen tida nga madi tida nagbasul, ket arig met nga kunen tida nga agbusid nge̍ Apu Diyusin, ket madi tida pekkem patiyen ya kagi na.