Yozhanq Saw 9 - Gij Baujcingq Moq Caeuq Geij Bonj Gij Baujcingq Daeuzdaeuz

Yw ndei boux rafangz daiqseng baenz he

¹ Yehsuh daj gunghdenq Cangqdiq ok ma ndoj deuz le, gajlaeng de youq dangjroen raen boux rafangz daiqseng baenz he.

² Yiengq gyoengq lwgsae de couh cam de naeuz: “Lahbij, boux neix seng okdaeuj couh rafangz lo; yiengq dwg byawz famh coih nej? Dwg de haj cixnaeuz dwg bohmeh de nej?”

³ Yehsuh dingq le, han naeuz: “Bouxlawz cungj mbouj dwg. De mbouj dwg, bohmeh de caemh mbouj dwg; dwg Cangqdiq ij youq gwnz ndang de yienh ok gij geizmiuj he lah.

⁴ Domh seizneix lij doengxngoenz, gyoengqraeuz ij vaiqdi guh gij hong boux baij gou daeuj hih mwnq; mijn'x baex daengz mbwn laep he, couh mij'z vunz ndaej guh lo.

⁵ Gou youq lajmbwn mwhde, gou couh dwg rongh.”

⁶ Yehsuh gangj sat doenghgij vah neix le, couh byiq myaiz roengz lajdoem bae, couh aeu gij myaiz de ma caeuq doem nuz baenz naez hwj swk haeuj cehra boux rafangz mwnq bae.

⁷ Swk le, couh doiq boux de naeuz: “Mwngz bae aen daemz Sihlozyaq mwnq swiq bax.” (‘Sihlozyaq’ gij iqswh de dwg naeuz ‘baij bae’ dih iqswh.) Yiengq boux de caemh ciuq de naeuz hih yienghmwnq bae guh lo. Gajlaeng cehra de couh ndaej yawjraen lo; de couh maj lo.

⁸ Gajlaeng, doenghheij gekleiz de caeuq doenghheij vunz bienqnaengz raen de vaq haeux hih doenghheij vunz mwnq raen de yienghneix le, couh naeuz: “Neq, bouxn'x, mbouj dwg bienqnaengz naengh youq mwnqn'x vaq haeux hih maz?”

⁹ Yiengq miz hih vunz naeuz: “Dwg hwj, dwg de hwj.” Caemh miz hih vunz naeuz: “Mbouj dwg de law, cijmboujgoq luj de hwj lah.” De dingq le, couh gag naeuz: “Dwg hah, gou couh dwg boux rafangz mwnq lo.”

¹⁰ Gyoengqde dingq le, couh cam de naeuz: “Cehra mwngz ij baenz ndaej ndei hwj lah?”

¹¹ De han naeuz: “Miz boux he, gij coh de heuh Yehsuh, de baenj naez hwj swk haeuj cehra gou daeuj, hawj gou bae aen daemz Sihlozyaq mwnq swiq. Gou caemh ciuq guh lo, gajlaeng cehra gou couh ndaej yawjraen lo.”

¹² Gyoengqde dingq le, caiq cam naeuz: “Yiengq boux vunz mwnq seizneix youq dilaw hax?” De han naeuz: “Mbouj rox hah.”

Saemjcam boux rafangz mwnq

^13-14 Aenvih Yehsuh aeu myaiz nuz naez hwj yw ndei boux rafangz mwnq hih ngoenz mwnq dwg ngoenzyietbaeg, [13]sojhij gyoengqde couh daiq de bae daengz doenghgij vunz Fazliqcaiq baij mwnq.

¹⁵ Yiengq gij vunz Fazliqcaiq baij mwnq couh cam boux rafangz mwnq baenzlawz ndaej yawjraen. Boux de dingq le, couh naeuz gyoengqde ni naeuz: “Boux de aeu naez swk haeuj cehra gou daeuj. Gou baex bae swiq he, couh doq ndaej yawjraen lo.”

¹⁶ Gajlaeng miz hih Fazliqcaiq baij vunz naeuz: “Boux mwnq gaengjdingq mbouj dwg daj Cangqdiq mwnq daeuj, aenvih de mbouj soenhsouj ngoenzyietbaeg.” Yiengq caemh miz mbangj hih Fazliqcaiq baij vunz dauq naeuz: “Hauhnaeuz boux vunz miz coih he, ij baenzlawz ndaej guh gij geizmiuj neix hwj?” Couh vih yienghneix hwj gyoengqde couh doxcwngq doxeuq hwnjdaeuj.

¹⁷ Gajlaeng, Fazliqcaiq baij vunz caiq cam boux rafangz ndaej ndei mwnq naeuz: “Giqyienz de ndaej hawj cehra mwngz ndaej yawjraen, yiengq mwngz naeuz de dwg guxmaz vunz nej?” Boux de han naeuz: “De dwg boux boux cenz gij vah Cangqdiq he.”

¹⁸ Hoeng, gij vunz Youzdaiq dang lingjdauj he vanzlij mbouj sinq boux vunz mwnq gaxgonq dwg rafangz gajlaeng ndaej raen he, couh heuh bohmeh de daeuj

¹⁹ cam bohmeh de naeuz: “Bouxn'x dwg daeglwg mwngz lwi? Faenhsou mbouj dwg naeuz de seng okdaeuj couh rafangz lo maz? Seizneix vihmaz engq ndaej yawjraen lo nej?”

²⁰ Yiengq bohmeh de han naeuz: “De dwg daeglwg raeuz hah; raeuz rox de seng okdaeuj couh rafangz lo hah.

²¹ Gangj naeuz de seizneix baenzlaw ndaej yawjraen, dwg byawz hawj de ndaej yawjraen, raeuz couh mbouj rox lo. De seizneix gaenq hung baenz vunz lo; faenhsou gag cam de bax. De aiq naeuz sou ni bax.”

²² Bohmeh de yienghneix naeuz dwg aenvih gij vunz Youzdaiq dang lingjdauj he gaenq senqsi cix cimciek ndei naeuz hauhnaeuz miz byawz nginh naeuz Yehsuh dwg Gihduz nex, couh boenq byawz ok veiqdangz bae.

²³ Sojhij bohmeh de cij doi naeuz “De gaenq hung baenz vunz lo; faenhsou gag cam de bax,” gawq neix.

²⁴ Gajlaeng, gij vunz Youzdaiq dang lingjdauj he vanzlij caiq heuh boux rafangz ndaej ndei mwnq daeuj, doiq de naeuz: “Mwngz ij youq dangqnaj Cangqdiq gangj lauxsaed vah, gyoengqraeuz rox boux mwnq dwg boux miz coih he.”

²⁵ Boux rafangz ndaej ndei mwnq dingq gyoengqde yienghneix naeuz le, couh han naeuz: “De dwg mbouj dwg boux miz coih he, gou mbouj rox; fanjcingq gou rox gienh saeh he, couh dwg gou yienzlaiz rafangz yawj mbouj raen, hoeng, seizneix gou ndaej yawjraen lo.”

²⁶ Gajlaeng gyoengqde caiq cam naeuz: “De bang mwngz guh gijmaz hax? De baenzlawz yw cehra mwngz ndei hax?”

²⁷ Boux de caiq han naeuz: “Gou gaenq naeuz faenhsou ni lo, hoeng, faenhsou mbouj dingq; vihmaz seizneix caiq ijsiengj dingq lo nej? Nanzdauh faenhsou caemh ijsiengj guh lwgsae de hajx?”

²⁸ Gyoengqde dingq de yienghneix han le, couh aeuqheiq hwj ndaq de naeuz: “Mwngz cij dwg ndaek vunz mwnq hih lwgsae huh; gyoengqraeuz dwg Mohsih dih lwgsae lah!

²⁹ Gyoengqraeuz rox Cangqdiq doiq Mohsih gangj vah goq, hoeng, ndaek vunz mwnq gyoengqraeuz gaenhbaenj mbouj rox de dwg dajlwh mwnqlaw daeuj.”

³⁰ Boux mwnq caiq han naeuz: “Ndaek gijn'x engqgya geizheih lo; de yw cehra gou ndei, faenhsou dauq mij rox de dwg daj mwnqlaw daeuj!

³¹ Gyoengqraeuz rox Cangqdiq mbouj dingq vunz miz coih hih, caenhgag dingq doengh boux yawjnaek de, ciuq gij cawjeiq de bae guh hih vunz lah.

³² Daj cauh mbwn cauh deih doxdaeuj, mijyaengz dingqri naeuz miz vunz ndaej yw ndei vunz rafangz daiqseng baenz he goq.

³³ Sojhij, hauhnaeuz boux vunz neix mbouj dwg daj Cangqdiq mwnq daeuj nex, gijmaz cungj guh mbouj daengz hih.”

³⁴ Gyoengqde dingq de yienghneix gangj le, couh naeuz de naeuz: “Ndaek mwngz daj seng okdaeuj cungj dwg miz coih hih lo; gingqyienz gamj daeuj naeuz gyoengqraeuz nex!” Gyoengqde yienghneix naeuz le, couh boenq de ok veiqdangz ma lo.

Cingqcaen rafangz

³⁵ Gajlaeng Yehsuh dingq daengz gij saeh neix le, couh bae cimh boux vunz mwnq, cam de naeuz: “Mwngz sinq Vunz dih Daiqbiuj lwi?”

³⁶ Boux de dingq le, han naeuz: “Goengjsae hax, de dwg byawz nej? Hawj gou sinq de!”

³⁷ Yiengq Yehsuh doiq de naeuz: “Mwngz gaenq raen de lo; seizneix caeuq mwngz gangj vah hih couh dwg de lo.”

³⁸ Boux de dingq le, couh naeuz: “Bouxcawj hax, gou sinq!” De yienghneix naeuz le, couh gvih roengzma sax de.

³⁹ Gajlaeng Yehsuh couh naeuz: “Gou daeuj lajmbwn dih muzdiz dwg ij yienh ok ndei caeuq yak lah, dwg ij hawj vunz rafangz ndaej yawjraen, vunz raraeh bienq rafangz lah.”

⁴⁰ Yiengq youq mwnq hih doenghheij gaep haeuj Fazliqcaiq baij hih vunz dingq daengz gij vah neix le, couh naeuz: “Nanzdauh gyoengqraeuz caemh rafangz lo mah?”

⁴¹ Yehsuh han naeuz: “Hauhnaeuz faenhsou dwg rafangz nex, faenhsou couh mij'z coih lo; yiengq, giqyienz faenhsou naeuz faenhsou ndaej yawjraen vwz, faenhsou couh dwg vunz lij miz coih he lo.”