Yozhanq Saw 7 - Gij Baujcingq Moq Caeuq Geij Bonj Gij Baujcingq Daeuzdaeuz

Doengh daegnuengx Yehsuh mbouj sinq Yehsuh

¹ Gij saeh neix goq le, Yehsuh couh mbouj caiq nyienh'eiq bae dieg Youzdaiq lo, couh bae Gyahliqliq Saengj dih heij mbanj heij singz he, aenvih gij lingjdauj Youzdaiq siengj gaj de.

² Mbouj geijlwh caez, gij vunz Youzdaiq dih aen ciet Dap Bungz he couh ij daengz lo.

³ Yiengq doengh daegnuengx de couh lengx de naeuz: “Gaejyungh youq mwnqneix lo; mwngz wnggai bae dieg Youzdaiq, bae mwnq hawj gij lwgsae mwngz ndaej raen mwngz soj guh hih saeh hah.

⁴ Hauhnaeuz it boux vunz siengj ok mingz hih, couh mbouj wnggai ndojndoj baexbaex, ij wnggai loh youq dangqnaj vunzlai. Yiengq, giqyienz mwngz ndaej guh doenghgij saeh neix lo, mwngz couh wnggai youq dangqnaj vunzlai guh hawj vunzlai yawj.”

⁵ Doengh daegnuengx de doiq de gangj doenghgij vah neix, yienzlaiz dwg gyoengqde caemh mbouj sinq de.

^6-8 Yehsuh dingq doengh daegnuengx de yienghneix naeuz le, couh doiq gyoengqde naeuz: [6b,8b]“Seizneix mbouj dwg daengz mwh gou bae he; [6c]dauq dwg faenhsou seizlaw bae cungj ndaej. [8a]Faenhsou sien bae goq ciet bax, [7]aenvih gyoengqde mbouj veiq dwgcaengz faenhsou law; gyoengqde caenhgag dwgcaengz gou lah, aenvih gou byoengq gij vaihsaeh gyoengqde goq.”

⁹ Couh yienghneix, Yehsuh vanzlij dwg youq Gyahliqliq youq.

Yehsuh goq aen ciet Dap Bungz

¹⁰ Gajlaeng doengh daegnuengx de bae le, de caemh bae Youzdaiq goq ciet hwj, hoeng de dwg caegcaeg bae he, mbouj hawj vunz rox haw.

¹¹ Yiengq aen ciet neix daengz lo. Gij vunz Youzdaiq dih lingjdauj cungj caenhrox caz naeuz: “Boux Yehsuh mwnq youq nwjh lah?”

¹² Dauqcawq cungj caemh miz vunz lwnh yebyeb de. Miz mbangj hih vunz lwnh naeuz: “De dwg vunz ndei,” miz mbangj hih vunz lwnh naeuz: “De dwg auxcied gyoengq vunzlai he.”

¹³ Hoeng, mij'z vunz gamj dingxdaeuz youq dangqnaj vunzlai cizsez gangj de hih saeh, aenvih lau gij lingjdauj Youzdaiq.

¹⁴ Yiengq, goq aen ciet neix ndaej dingxfaen le, Yehsuh bae gunghdenq Cangqdiq gangj gvanhhih Cangqdiq dih ndei siuhsiz.

¹⁵ Yiengq, dieg mwnq hih vunz dingq de gangj le, cungj raen geizheih ij rai, couh naeuz: “Boux vunz bouxn'x, cungj mij hag goq haem, ij baenz rox ndaej baenx lai nej?”

¹⁶ Yehsuh dingqri gij vunz yienghneix naeuz le, couh naeuz: “Gou gangj hih doenghgij siuhsiz neix mbouj dwg gou gag rox law; dwg boux baij gou daeuj mwnq hawj gou rox hih lah.

¹⁷ Hauhnaeuz faenhsou gietsim ciuq gij cawjeiq Cangqdiq bae guh nex, couh ndaej rox doenghgij vah neix dwg Cangqdiq hawj gou gangj haj cixnaeuz dwg gou gag gangj hih lo.

¹⁸ Doengh boux gag ciuq gij cawjeiq bonjfaenh ma gangj hih dwg siengj gag hawj bonjfaenh najrongh lah; caenhgag boux siengj hawj boux baij de daeuj mwnq ndaej najrongh hih, caenhgag boux mwnq cij dwg caen he, mbouj miz saek di gyaj hih.

¹⁹ Mohsih mbouj dwg dingh fazliz hawj faenhsou maz? Hoeng, faenhsou dauq mij saek boux soenhsouj, dauq ijsiengj gaj gou nejx.”

²⁰ Gyoengq vunz dingq le, han naeuz: “Mwngz gaengjdingq dwg ngaiz fangz doz lo! Byawz naeuz ij gaj mwngz nex?”

²¹ Yehsuh naeuz: “Gou guh gij saeh geizmiuj he, faenhsou couh roxnginh raen geizheih lo mah?

²² Mohsih cenz hawj faenhsou gozlij—gizsaed, gozlij gaenhbaenj mbouj dwg Mohsih dingh okdaeuj, dwg daj cojgoeng raeuz cix dingh miz lo—faenhsou dwg youq ngoenz ngoenzyietbaeg guh gozlij lah.

²³ Yiengq, giqyienz faenhsou youq ngoenz ngoenzyietbaeg guh gozlij, dwg siengj soenhsouj Mohsih dih fazliz lo, yiengq gou youq ngoenz ngoenzyietbaeg hawj vunz bingh ndei, faenhsou vihmaz ij ndatheiq gou nej?

²⁴ Wnggai nienxnienx ndei dwg gijmaz saeh, menhcij dingh deng caeuq mbouj deng; ij ciuq saedsaeh ma dingh deng caeuq mbouj deng.”

Yehsuh dwg mbouj dwg Gihduz?

²⁵ Youq Yehluqsajlaengj, miz mbangj hih vunz naeuz: “Boux neix mbouj dwg boux gyoengqde ijsiengj gaj hih maz?

²⁶ Hawjm'z yawj hux, de vanzlij youq dangqnaj vunzlai hoi ra cenzgangj Cangqdiq dih ndei siuhsiz, gingqyienz mij vunz naeuz de. Nanzdauh doengh boux dang ak mwnq naemqnaeuz de cingqcaen dwg Gihduz mah?

²⁷ Hoeng, Gihduz daeuj mwhde, mij saek boux rox de dwg daj nwj daeuj, dauq dwg boux neix, gyoengqraeuz bouxboux cungj rox de dwg daj nwj daeuj hah.”

²⁸ Gyoengq vunz gangj doenghgij vah neix hih mwhde, Yehsuh vanzlij dwg youq ndaw gunghdenq Cangqdiq gangj vah hih. De gangj goggog naeuz: “Faenhsou rox gou, caemh rox gou dwg daj mwnqlaw daeuj. Gizsaed gou daeuj, mbouj dwg gou gag guh cawjeiq daeuj hih; dwg boux lauxsaed sinq ndaej goq dih Cangqdiq baij gou daeuj lah. Faenhsou mbouj rox de law,

²⁹ hoeng, gou dauq rox de, aenvih gou dwg dajlaeng de daeuj hih; dwg de baij gou daeuj hih.”

³⁰ Gyoengqde dingq Yehsuh yienghneix naeuz le, couh ijsiengj gaemh dawz de, hoeng, geizheih, mij vunz gamj doengh fawz gaemh de; dwg aenvih Cangqdiq dingh hih mwhde mijyaengz daengz.

³¹ Hoeng, youq ndaw gyoengq vunz ndaw de, miz haujlai vunz sinq de; sinq de hih dauq lwnh yebyeb naeuz: “Cungjsuenq naeuz Gihduz daeuj lo, de guh gij geizmiuj he caemh mbouj ndaej beij boux neix guh ndaej lai, mbouj dwg haj?”

³² Yiengq gij vunz gaep haeuj Fazliqcaiq baij he dingq gyoengq vunzlai yienghneix lwnh yebyeb naeuz Yehsuh le, couh caeuq goengjsae dajbwiz doxyuk hwj baij doengh boux souj gunghdenq Cangqdiq he bae gaemh Yehsuh.

³³ Yehsuh vanzlij doiq gyoengq vunzlai naeuz: “Gou vanzlij ndaej caeuq faenhsou camqciz youq; goq mbouj geijlwh caez, gou couh ij dauq maj daengz laeng boux baij gou daeuj mwnq lo.

³⁴ Daengz mwhmwnq, faenhsou ij cimh gou, hoeng, caemh cimh mbouj raen gou; gou youq hih mwnq dieg mwnq, faenhsou caemh mbouj ndaej bae.”

³⁵ Doenghgij vunz Youzdaiq dang lingjdauj he dingq de yienghneix naeuz le, cungj doxcam naeuz: “De siengj bae mwnqlaw hawj gyoengqraeuz cimh mbouj raen de nex? Nanzdauh de ij bae mwnq doenghgij vunz Youzdaiq faensanq youq Hihlaz dih gak aen cingzciq bae cenzgangj naeuz gij vunz Hihlaz ni mah?

³⁶ De naeuz: ‘Faenhsou ij cimh gou, hoeng cimh mbouj raen gou; gou youq dih deixfueng, faenhsou mbouj ndaej bae.’ Gij vah neix dwg gijmaz iqswh nex?”

³⁷ Yiengq daengz ngoenz aen ciet neix hih ngoenz ceiq gatsat he le, caemh dwg ngoenz ceiq nauhyied he, Yehsuh youq gunghdenq Cangqdiq ndwn hwnjdaeuj doiq gij vunz gangj goggog naeuz: “Hauhnaeuz miz byawz hozhawq nex, couh daeuj laeng gou gw.

³⁸ Sinq gou hih vunz couh luj ndaw Singqgingh ndaw de soj sij naeuz hih: Gij raemx gw ndaej miz mingh he daj ndaw sim de luj diuz dah yienghmwnq riuz okdaeuj.”

³⁹ Yehsuh gangj doenghgij vah neix dwg ceij gij vunz sinq de he baezneix ndaej Hoenzsaenz Cangqdiq, hoeng, mwhde Hoenzsaenz Cangqdiq mijyaengz roengz daeuj haem, aenvih Yehsuh vanz mijyaengz ndaej najrongh haem.

⁴⁰ Gij vunz dingq de gangj doenghgij vah neix le, couh miz mbangj hih vunz naeuz: “De cingqcaen dwg boux cenz gij vah Cangqdiq mwnq!”

⁴¹ Caemh miz mbangj hih vunz naeuz: “De dwg Gihduz!” Caemhcaiq miz mbangj hih vunz naeuz: “Gihduz ij baenz daj Gyahliqliq daeuj hwj?

⁴² Aenvih ndaw Singqgingh ndaw de mbouj dwg sij naeuz Gihduz dwg doengh daih gajlaeng Daqveiq he; ij dwg daj Bwzliqhaengz Singz, aen singz Daqveiq ok daeuj he maz?”

⁴³ Gajlaeng gij vunz couh vih Yehsuh hih saeh hwj faen banghbaij.

⁴⁴ Miz hih vunz ijsiengj gaemh dawz Yehsuh, hoeng, mij vunz gamj doengh fawz.

Gij lingjdauj Youzdaiq vunz mbouj sinq Yehsuh

⁴⁵ Gajlaeng, goengjsae dajbwiz caeuq gaep haeuj Fazliqcaiq baij hih vunz raen doengh boux souj gunghdenq Cangqdiq baij bae gaemh Yehsuh mwnq ma le, couh cam naeuz: “Faenhsou vihmaz mbouj gaemh dawz de ma hah?”

⁴⁶ Doengh boux de han naeuz: “Gyoengqraeuz coengzlaiz mij'z vunz luj de yienghmwnq gangj vah!”

⁴⁷ Gij vunz Fazliqcaiq baij dingq le, naeuz: “Faenhsou caemh ngaiz de coemx lo mah?

⁴⁸ Nwjh miz Youzdaiq vunz dih lingjdauj caeuq Fazliqcaiq vunz sinq de hwj?

⁴⁹ Caenhgag buek vunz mbouj rox Mohsih fazliz neix cij sinq de; buek vunz neix cungj hab mang!”

⁵⁰ Yiengq gij vunz Fazliqcaiq baij ndaw de miz boux he heuh Nizgohdijmuj; de gaxgonq bae cimh Yehsuh goq hwj. De doiq gyoengqde naeuz:

⁵¹ “Mbouj sien dingqdingq de gangj gijmaz hwj caz yawj de guh gijmaz, nanzdauh gij fazliz raeuz couh ndaej dingh de miz coih lo mah?”

⁵² Gyoengqde dingq de yienghneix naeuz le, couh ndatheiq hwj doiq de naeuz: “Nanzdauh mwngz caemh dwg Gyahliqliq vunz haj? Mwngz bae cazcaz Singqgingh yawj, mwngz couh rox, Gyahliqliq mbouj veiq miz boux cenz gij vah Cangqdiq hih.”