Yozhanq Saw 5 - Gij Baujcingq Moq Caeuq Geij Bonj Gij Baujcingq Daeuzdaeuz

Yehsuh youq henz daemz yw bingh

¹ Gij saeh neix goq le, ngamqluj daengz Youzdaiq vunz dih aen ciet he. Yehsuh couh bae Yehluqsajlaengj.

² Youq Yehluqsajlaengj gaenh mwnq heuh Yiengz Dou hih mwnq dieg he, miz aen daemz he, aeu Hihbwzlaiz vah ma gangj couh dwg heuh Bizswqdaq. Henz aen daemz mwnq miz haj diuz soujlangz.

³ Youq soujlangz mwnq miz haujlai vunz bingh ninz youq mwnq, miz rafangz hih, ha vaij hih, ha gyad hih, guxmaz vunz bingh cungj miz. [

⁴ Gyoengqde youq dineix daengj raemx doengh, aenvih miz bouxcai Cangqdiq saemxmboujseiz roengz ndaw daemz bae ndau raemx hawj raemx doengh le, yiengq, hauhnaeuz miz byawz ndaej sien diuq roengzbae nex, mboujguenj ngaiz bingh maz cungj ndaej ndei liux.]

⁵ Yiengq youq mwnq miz boux he bingh baenx samcib bet bi lo.

⁶ Yehsuh yawjraen de ninz youq mwnq, couh rox de bingh baenx haujlai caez lo, couh cam de naeuz: “Mwngz siengj ndei liux lwi?”

⁷ Boux vunz bingh mwnq dingq le, han naeuz: “Goengjau, raemx doengh mwhde, mij'z vunz dawz gou coengq roengz ndaw daemz bae nej. Gou ijsiengj roengz bae hah, hoeng caenhrox miz vunz beij gou vaiq lah.”

⁸ Yehsuh dingq le, doiq de naeuz: “Mwngz hwnq bax! Mwngz ndaej byaij lo; dawz gij demh ninz mwngz maj bax.”

⁹ Yehsuh baex gangj gawq neix he le, boux vunz bingh mwnq couh doq ndei lo, couh dawz gij demh de maj lo.

¹⁰ Yiengq ngamqluj ngoenz mwnq dwg ngoenz ngoenzyietbaeg, sojhij couh miz vunz cam boux vunz bingh yw ndei mwnq naeuz: “Ngoenzneix dwg ngoenzyietbaeg, mbouj ndaej guh hong hih. Mwngz vihmaz dawz gij demh ninz mwngz deuz?”

¹¹ Hoeng, boux mwnq dauq han naeuz: “Boux yw gou ndei mwnq naeuz: ‘Dawz gij demh ninz mwngz maj bax’ vwz.”

¹² Gyoengqde dingq de yienghneix naeuz le, couh cam boux de naeuz: “Dwg byawz naeuz hawj mwngz dawz gij demh ninz mwngz bae hoh nej?”

¹³ Hoeng, boux mwnq gaenhbaenj mbouj rox dwg byawz naeuz, aenvih mwnq vunz lai raixcaix, Yehsuh caemh gaenq senqsi cix byaij deuz lo.

¹⁴ Gajlaeng, Yehsuh youq gunghdenq Cangqdiq nyangz boux de, couh doiq boux de naeuz: “Mwngz gaenq ndei liuxliux lo; mwngz couh mbouj caiq famh coih haem lo, mienxndaej baezneix roeb daengz hih engqgya camj.”

¹⁵ Boux de dingq le, couh bae naeuz lingjdauj ni, yw ndei de hih dwg Yehsuh.

¹⁶ Couh vih yienghneix, gij vunz Youzdaiq engqgya bwkhaih Yehsuh, aenvih Yehsuh youq ngoenz ngoenzyietbaeg yw bingh hawj vunz.

¹⁷ Yehsuh rox le, couh doiq gyoengqde naeuz: “Boh gou daengz seizneix itcig cungj dwg guh hong; gou caemh caeuq de doxdoengz.”

¹⁸ Gij vunz Youzdaiq dingq de yienghneix naeuz le, couh haenq hwj ijsiengj gaj de, aenvih de mbouj danhcij naeuz veizfanj ngoenzyietbaeg dih gveihdingq, vanzlij cwng Cangqdiq dwg boh de, yawj bonjfaenh de caeuq Cangqdiq doxdoengz.

Daeglwg Cangqdiq caemh miz gienz

¹⁹ Yehsuh caiq naeuz: “Gou saedsaeh naeuz sou ni, lwg gag baengh bonjfaenh, gijmaz cungj mbouj ndaej guh daengz; cawzok yawjraen boh soj guh hih, cij ndaej guh daengz he. Boh soj guh hih, lwg caemh ciuqyiengh guh.

²⁰ Aenvih boh aiq lwg, de couh dawz de soj guh hih hawj de raen. Mbouj danhcij yienghneix, vanzlij dawz gij engqgya geizmiuj he hawj lwg de raen, hawj faenhsou engqgya geizheih.

²¹ Boh baenzlaw hawj vunzrai ndaej dauqlix, hawj gyoengqde miz mingh, lwg caemh doxdoengz; de caemh ndaej youz bonjfaenh dih cawjeiq ndaej hawj vunz miz mingh.

²² Boh mbouj saemjbuenq guxmaz vunz; de dawz saemjbuenq hih saeh cungj gyau hawj lwg de liux,

²³ hawj vunz soenhgingq daeglwg de caemh luj soenhgingq boh ityiengh. Mbouj soenhgingq lwg hih, caemh mbouj soenhgingq baij daeglwg de daeuj hih boh lo.”

²⁴ Yehsuh vanzlij caiq naeuz: “Gou saedsaeh naeuz sou ni, mboujguenj byawz dingq gij vah gou caiq sinq boux baij gou daeuj hih, couh ndaej seiqseiz lix, mbouj ngaiz dingh miz coih, caemh ndaej daj rai ndaej dauqlix.

²⁵ Gou caiq saedsaeh naeuz sou ni, mwhde couh ij daengz lo, seizneix couh dwg lo, vunzrai ndaej dingqri gij sing daeglwg Cangqdiq; ndaej dingqri hih couh dwg ndaej dauqlix lo.

²⁶ Aenvih boh bonjfaenh de couh dwg doenj mingh, de caemh ciuqyiengh hawj daeglwg de ndaej guh doenj mingh.

²⁷ Caiq aenvih daeglwg de dwg Vunz dih Daiqbiuj, sojhij de couh nyok gij gienz saemjbuenq vunz lajmbwn he hawj daeglwg de.

²⁸ Faenhsou gaejyungh geizheih; couh ij daengz mwhde, sojmiz youq ndaw moh hih vunzrai cungj ij ndaej dingqri gij sing daeglwg Cangqdiq, cungj ij ok daeuj.

²⁹ Guh ndeisaeh hih vunz, dauqlix nex, ndaej seiqseiz lix; guh doeg guh sieb hih vunz, dauqlix nex, ngaiz dingh miz coih.”

Cingqmingz Yehsuh dwg Cangqdiq baij daeuj he

³⁰ Yehsuh vanzlij caiq doiq gij vunz Youzdaiq naeuz: “Gou gag baengh bonjfaenh gijmaz cungj mbouj ndaej guh; gou dwg ciuq gij cawjeiq Cangqdiq ma saemjbuenq hih, caemh dwg goengbingz hih, aenvih gou mbouj dwg ciuq gij cawjeiq bonjfaenh gou ma guh hih, dauq dwg ciuq gij cawjeiq baij gou daeuj hih Cangqdiq guh hih lah.

³¹ Yiengq, hauhnaeuz gou gag cingqmingz bonjfaenh gou, gij cingqmingz gou couh mij'z yungh lo.

³² Hoeng, hauhnaeuz miz lingh boux cingqmingz hawj gou nex, gou rox gij cingqmingz de dwg saedsaeh hih.

^33-34 “Gizsaed gou gaenhbaenj mboujyungh vunz cingqmingz; cijmboujgoq gou muengh faenhsou sinq hwj ndaej gouq, sojhij, gou naeuz sou ni, faenhsou wnggai sinq Yozhanq dih cingqmingz. [33]Faenhsou mbouj dwg baij vunz bae laeng guh sijlij dih Yozhanq goq, bae dingq de cingqmingz gij saedsaeh hih maz?

³⁵ Yozhanq luj aen daeng diemj rongh he; faenhsou caemh nyienh'eiq camqciz yangjcouq gij rongh de.

³⁶ “Gou nej, gou miz gij cingqmingz beij gij cingqmingz Yozhanq vanzlij miz yungh he, couh dwg boh gou hawj gou guh hih, couh dwg faenhsou raen gou soj guh hih, cingq dwg cingqmingz gou dwg daxboh baij gou daeuj he.

³⁷ Baij gou daeuj hih daxboh caemh cingqmingz gou goq. Hoeng, faenhsou mijyaengz dingqri gij sing de goq, caemh mijyaengz raen de goq,

³⁸ ndaw sim faenhsou caemh mij miz gij saedsaeh de, aenvih faenhsou mbouj sinq de baij daeuj hih boux mwnq.

³⁹ “Faenhsou nenhgyiuq Singqgingh, cungj naemqnaeuz ndaej daj ndaw Singqgingh ndaw de ndaej daengz seiqseiz lix. Gizsaed, ndaej cingqmingz gou hih couh dwg gij Singqgingh neix;

⁴⁰ hoeng, faenhsou dauq mij daeuj laeng gou neij gouz ndaej seiqseiz lix.

⁴¹ “Gou mbouj gouz vunz haenh gou.

⁴² Gou caemh rox faenhsou gaenhbaenj mbouj miz aen sim aiq Cangqdiq he.

⁴³ Boh gou baij gou daeuj; faenhsou dauq mij ciep gou, dauq ciep boux gag cej bonjfaenh he.

⁴⁴ Faenhsou caenhrox yawjnaek doxhaenh, dauq mbouj dawz haeuj rwz boux caencwnz mwnq haenh mbouj haenh faenhsou; yiengq ij baenzlaw bae sinq gou nej?

⁴⁵ “Faenhsou gaejyungh naemqnaeuz gou youq dangqnaj daxboh gauq faenhsou; gauq faenhsou hih dwg faenhsou soqsingq cungj baengh hih Mohsih lah.

⁴⁶ Yiengq, hauhnaeuz faenhsou sinq Mohsih hih, faenhsou caemh wnggai sinq gou hah, aenvih ndaw saw de cungj dwg daez daengz gou.

⁴⁷ Caiq hauhnaeuz faenhsou daiqlienz de sij hih cungj mbouj sinq, yiengq caemh ij baenzlaw sinq gou nej?”