Yozhanq Saw 4 - Gij Baujcingq Moq Caeuq Geij Bonj Gij Baujcingq Daeuzdaeuz

Yehsuh youq henz cingj caeuq vunz gangj vah

¹ Gij vunz Fazliqcaiq baij he dingqri naeuz Yehsuh sou lwgsae, sijlij hawj lwgsae beij Yozhanq sijlij vanzlij lai.

² (Gizsaed mwhde, gaenhbaenj mbouj dwg Yehsuh bonjfaenh de bang vunz sijlij, dauq dwg doenghheij lwgsae de bang vunz sijlij lah.)

³ Yehsuh rox yienghneix le, couh daj Youzdaiq Saengj ok ma dauq bae dieg Gyahliqliq.

⁴ Yiengq bae Gyahliqliq nex, ij goq dieg Sajmajliqyaq bae cij ndaej.

⁵ Gajlaeng de bae daengz dieg Sajmajliqyaq hih aen singz heuh Siqgyah he. Aen singz neix gaenh gij reih Yozswz; gij reih neix dwg daxboh de Yajgoz soengq hawj de he.

⁶ Youq mwnq reih mwnq miz aen cingj heuh Yajgoz Cingj he. Yehsuh bae daengz mwnq le, roxnginh naet, yiengq de couh naengh youq henz aen cingj mwnq yietbaeg. Mwhde daihgaiq dwg gyangjngoenz cingq.

⁷ Yiengq, miz boux Sajmajliqyaq vunzbaz he daeuj aeu raemx. Yehsuh raen le, couh doiq de naeuz: “Cingj mwngz hawj di raemx he hawj gou gw ndaej lwi?”

⁸ (Mwhde doengh boux lwgsae de gaenq haeuj singz bae cawx gij gw lo.)

⁹ Boux vunzbaz mwnq dingq le, raen geizheih raixcaix, couh han naeuz: “Mwngz dwg Youzdaiq vunz, gou dwg Sajmajliqyaq vunz; mwngz ij baeq cam gou aeu raemx ma gw hwj nej?” (Boux vunzbaz mwnq yienghneix naeuz dwg aenvih yienzlaiz Youzdaiq vunz caeuq Sajmajliqyaq vunz cungj mbouj doxcwnz haem.)

¹⁰ Gajlaeng Yehsuh han naeuz: “Hauhnaeuz mwngz rox Cangqdiq siengj hawj mwngz gijmaz caeuq rox seizneix cam mwngz aeu raemx ma gw hih dwg byawz nex, mwngz cungj senqsi cix gouz de lo; de caemh senqsi cix hawj gij raemx hawj vunz ndaej seiqseiz lix he lo.”

¹¹ Boux vunzbaz mwnq dingq le, cam de naeuz: “Goengjau, mwngz cungj mij aen daekraemx hih haem, cingj caemhcix laeg; mwngz nwj bae ndaej aeu gij raemx hawj vunz ndaej seiqseiz lix he nej?

¹² Cojgoeng raeuz Yajgoz louz aen cingj neix hawj gyoengqraeuz; bonjfaenh de caeuq doengh daeglwg de caeuq doenghheij cukseng de cungj gw goq gij raemx cingj neix. Nanzdauh mwngz beij de vanzlij veijdaq haj?”

¹³ Yehsuh dingq le, caiq han de naeuz: “Famz gw goq gij raemx aen cingj neix hih vunz ciuqyiengh vanzlij hozhawq;

¹⁴ hoeng, famz gw goq gij raemx gou hawj he hih vunz couh ndaej yungjyenj mbouj rox hozhawq, aenvih gou hih gij raemx neix ij youq gwnz ndang de bienqbaenz aen cingjraemx riuz mbouj rox sat, hawj de ndaej seiqseiz lix.”

¹⁵ Gajlaeng boux vunzbaz mwnq cam Yehsuh naeuz: “Goengjau, yiengq cingj mwngz dawz cungj raemx neix soengq hawj gou bax, hawj gou couh mbouj caiq hozhawq lo, caemh mboujyungh ngoenzngoenz riq daeuj baenx gyae aeu raemx lo.”

¹⁶ Yehsuh dingq le, couh doiq de naeuz: “Mwngz maj heuh goeng gojyez mwngz daeuj dineix bax.”

¹⁷ Boux vunzbaz mwnq han naeuz: “Gou mij gojyez nej.” Yiengq Yehsuh han de naeuz: “Mwngz naeuz ndaej deng lo. Mwngz gaenhbaenj mij gojyez,

¹⁸ aenvih mwngz gaenq miz haj goeng goq lo; seizneix caeuq mwngz youq hih caemh mij dwg goeng mwngz haem. Mwngz naeuz it di cungj mbouj loek; mwngz mij gojyez!”

¹⁹ Boux vunzbaz mwnq dingq daengz neix le, couh doiq Yehsuh naeuz: “Goengjau, gou yawj ndaej ok, mwngz dwg boux cenz gij vah Cangqdiq he.

²⁰ Yiengq gou cam mwngz ndaej lwi? Couh dwg cojgoeng gyoengqraeuz soqsingq cungj dwg youq gwnz bya neix gingqbaiq Cangqdiq, hoeng, faenhsou gij vunz Youzdaiq vihmaz dauq naeuz Yehluqsajlaengj cij dwg gingqbaiq Cangqdiq dih deixfueng nej?”

²¹ Yehsuh dingq le, couh han de naeuz: “Mehsimj hax, mwngz wnggai sinq gou. Gou naeuz mwngz ni, mwhde couh ij daengz lo, gingqbaiq Cangqdiq dih deixfueng mbouj dwg youq gwnz bya neix, caemh mbouj dwg youq Yehluqsajlaengj.

²² Faenhsou Sajmajliqyaq vunz soj baiq hih, faenhsou cungj mbouj rox dwg byawz, hoeng gyoengqraeuz Youzdaiq vunz gingqbaiq hih, gyoengqraeuz rox dwg byawz, aenvih Cangqdiq ij gouq vunz dwg dunghgoq gij vunz Youzdaiq hih.

²³ Gangj naeuz mwhde, couh ij daengz lo, gizsaed mwhde couh dwg mwhneix lo. Cingqcaen gingqbaiq Cangqdiq Bohmbwn hih couh dwg ij caensim caen'eiq ciuq saedsaeh gingqbaiq de, aenvih de haenj vunz yienghneix gingqbaiq de.

²⁴ Cangqdiq dwg hoenzsaenz, sojhij ij caensim caen'eiq ciuq saedsaeh gingqbaiq de cij ndaej.”

²⁵ Gajlaeng boux vunzbaz mwnq caiq naeuz: “Gou rox boux heuh Gihduz dih Mizcaiqyaq mwnq, de ij daeuj hwj; daengj de daeuj le, gaengjdingq naeuz gyoengqraeuz ni sojmiz hih.”

²⁶ Yehsuh dingq de yienghneix naeuz le, couh han de naeuz: “Seizneix caeuq mwngz gangj vah hih couh dwg mwngz naeuz hih boux mwnq lo.”

²⁷ Couh youq mwhneix, doengh boux lwgsae Yehsuh ma lo. Gyoengqde ma raen Yehsuh caeuq boux vunzbaz he gangj vah, cungj raen geizheih ij rai bae, hoeng, mij saek boux cam naeuz: “Mwngz ij guxmaz lah?” cixnaeuz: “Mwngz vihmaz ij caeuq de gangj vah lah?”

²⁸ Boux vunzbaz mwnq dingq Yehsuh yienghneix naeuz le, cungj mbouj leix aen doengj de huh, couh majcangq riq maj daengz ndaw singz doiq vunz naeuz:

²⁹ “Veix! Vaiq bae yawj veiq! Miz boux he, de dawz gij saeh gou cungj gangj okdaeuj liux. Gaeuq lingz hoh! Gou naemj boux de aiq dwg Gihduz dinghluh!”

³⁰ Gij vunz dingq le, cungj caezgya ok singz bae yawj Yehsuh.

Dajroek caeuq dajsou

³¹ Caemh youq mwhneix, gyoengq lwgsae Yehsuh doiq Yehsuh naeuz: “Lahbij, cingj mwngz gw di doxgaiq he bax.”

³² Yehsuh han gyoengqde naeuz: “Gou miz gij gw he hwj, hoeng faenhsou mij rox gij de law.”

³³ Gyoengq lwgsae de dingq le, cungj doxcam naeuz: “Nanzdauh miz vunz aeu gijmaz hawj de gw lo?”

³⁴ Yehsuh caiq doiq gyoengqde naeuz: “Gij gw gou couh dwg ciuq gij cawjeiq boux baij gou daeuj mwnq bae guh gij hong de.

³⁵ Gannaeuz dwg: ‘Daj roek daengz sou ij miz seiq ndwen cij ndaej sou’ lah, hoeng, faenhsou yawjyawj doengh reihnaz mwnq veiq; haeux, mienh gaenq ndaej daeng sou lo, ndaej gvej lo.

³⁶ Boux sougvej he mbouj danhcij ndaej ngaenzhong, vanzlij ndaej vunz, caemh vanzlij ndaej hawj doenghheij vunz neix ndaej seiqseiz lix, hawj boux roek boux ndaem he caeuq boux sou he cungj angq.

³⁷ Sugvah naeuz ndaej deng: ‘Boux gonq roek, boux laeng ndaej sou.’

³⁸ Gou baij faenhsou bae sou doenghgij faenhsou mij guh roek he. Gij vunz dwgrengz sinhoj; faenhsou dauq ndaej yangjcouq gij vunz guh dwgrengz sinhoj cij ndaej sou he.”

Sajmajliqyaq vunz sinq Yehsuh

³⁹ Caiq gangj daengz boux vunzbaz mwnq maj ndaw singz gangj naeuz gij vunz ni le, miz haujlai Sajmajliqyaq vunz cungj sinq Yehsuh, aenvih boux vunzbaz mwnq naeuz: “De dawz gou gaxgonq soj guh hih saeh cungj gangj okdaeuj liux.”

⁴⁰ Gajlaeng gij vunz Sajmajliqyaq couh daeuj gouz Yehsuh, gouz de youq laeng gyoengqde mwnq youq, yiengq Yehsuh caemh youq mwnq youq song ngoenz.

⁴¹ Mwhde miz haujlai vunz cungj ndaej caenra raen caenrwz dingq Yehsuh gangj vah, sojhij miz vunz sinq de engqgya lai.

⁴² Gij vunz caemh doiq boux vunzbaz mwnq naeuz: “Seizneix gyoengqraeuz sinq, mbouj dwg vih gij vah mwngz hwj sinq, dauq dwg vih gyoengqraeuz ndaej caenrwz dingq daengz de gangj hih vah, ndaej rox de dwg boux cingqcaen daeuj gouq vunz he hwj sinq lah.”

Yehsuh yw ndei daeglwg boux dang ak he

⁴³ Youq mwnq youq song ngoenz le, Yehsuh couh daj mwnq okdin maj Gyahliqliq lo.

⁴⁴ Gaxgonq de naeuz goq: “Boux cenz gij vah Cangqdiq gag youq dieg bonjdeih bonjfaenh mij'z vunz soenhcungq gyoengqde.”

⁴⁵ Hoeng, mbat neix de baex maj daengz dieg bonjfaenh de Gyahliqliq he, dauq miz vunz vuenhringz de hwj, aenvih gyoengqde bae Yehluqsajlaengj goq ciet hih mwhde ndaej caenra raen de soj guh hih saeh.

⁴⁶ Gajlaeng de caiq bae daengz aen mbanj Gyahnaz. (Mbanj Gyahnaz caemh dwg youq dieg Gyahliqliq he, couh dwg mwnq gaxgonq de youq mwnq hawj raemx bienq laeuj he.) Miz boux daqcwnz he, daeglwg de youq Gyahbwznungz Singz fat bingh hung.

⁴⁷ Boux daqcwnz mwnq dingq naeuz Yehsuh daj dieg Youzdaiq daeuj daengz Gyahliqliq le, couh majcangq bae cimh de, gouz de naeuz: “Daeglwg gou bingh lo; cingj mwngz bae yw de bax, aenvih daeglwg gou bingh hwj ij rai lo.”

⁴⁸ Yehsuh dingq le, doiq boux de naeuz: “Hauhnaeuz faenhsou mbouj raen gij geizmiuj hih saeh hwj ndaej cingqmingz gou dwg byawz nex, faenhsou cungj mbouj sinq.”

⁴⁹ Boux de gannaeuz dingq Yehsuh yienghneix naeuz lah, hoeng, vanzlij caiq doiq de naeuz: “Goengjau, gouz mwngz domh daeglwg gou vanzlij miz gaemz heiq he, mwngz vaiqdi bae bax!”

⁵⁰ Gajlaeng Yehsuh couh doiq boux de naeuz: “Mwngz maj bax; daeglwg mwngz gaenq ndei lo.” Gajlaeng boux de caemh sinq gij vah de, couh dauq maj ranz lo.

⁵¹ Boux de dauq maj hih mwhde, bouxhoiq de daeuj naeuz de ni naeuz: “Daeglwg mwngz ndaej ndei lo!”

⁵² Boux de dingq le, couh cam naeuz: “Daeglwg gou seizlaw ndei lah?” Bouxhoiq de han de naeuz: “Ngoenzlwenz yaquj it diemjcung mwhde couh mij fatndat lo, doiq lo.”

⁵³ Gajlaeng boux de couh ngeix daengz mwhde cingq dwg Yehsuh doiq de gangj naeuz: “Daeglwg mwngz ndei lo!” hih mwhde lo. Couh yienghneix, daj mwhmwnq hwnj, boux de caeuq ndaw ranz de cungj sinq Yehsuh.

⁵⁴ Mbat neix dwg Yehsuh daj dieg Youzdaiq ok ma le dauq ma daengz dieg Gyahliqliq guh hih daixngeih mbat geizmiuj hih saeh hwj ndaej cingqmingz de dwg byawz.