Yozhanq Saw 2 - Gij Baujcingq Moq Caeuq Geij Bonj Gij Baujcingq Daeuzdaeuz

Raemx bienq laeuj

¹ Goq song ngoenz le, youq Gyahliqliq dih aen mbanj heuh Gyahnaz he miz vunz aeu bawx cingj laeuj, yiengq daxmeh Yehsuh caemh bae mwnq gw laeuj.

² Yehsuh caeuq doengh boux lwgsae de caemh ndaej cingj bae gw laeuj hwj.

³ Gajlaeng laeuj yungh liux le, daxmeh de doiq de naeuz: “Gyoengqde mij'z laeuj huh.”

⁴ Yehsuh dingq le, couh doiq de naeuz: “Meh hax, mwngz vihmaz ij naeuz gou ni nej? Mijyaengz daengz mwh gou guh hih saeh haem.”

⁵ Hoeng daxmeh de caenh lujnaeuz dingq mbouj rox gij vah de nwih, couh gag doiq doenghheij vunzhoiq mwnq naeuz: “Yaepm'x de hawj faenhsou guh gijmaz, faenhsou couh guh gijmaz hoq.”

⁶ Yiengq ngamqluj youq mwnq miz roek aen gang; roek aen gang neix dwg gij vunz Youzdaiq aeu ma guh ngiqsiz, couh dwg swiq fawz yungh he. It aen gang coux ndaej song sam doengj raemx.

⁷ Couh yienghneix, Yehsuh couh doiq doenghheij vunzhoiq mwnq naeuz: “Coux raemx doengh aen gang mwnq rim bae!” Gajlaeng doenghheij vunzhoiq mwnq caemh dingq de, couh dawz doengh aen gang mwnq coux raemx rim.

⁸ Gyoengqde coux raemx rim le, Yehsuh couh naeuz: “Seizneix ndaej daek di he bae hawj boux fuqswz daih hek mwnq lo.” Gyoengqde dingq le, couh daek bae lo.

⁹ Doengh bouxhoiq coux raemx mwnq gan rox naeuz gij laeuj neix dwg baenzlaw bienq hih, hoeng, mij saek boux naeuz boux fuqswz daih hek mwnq ni. Boux fuqswz daih hek mwnq cimz gij laeuj raemx bienq mwnq le, couh heuh goeng gojyez moq goq daeuj,

¹⁰ doiq de naeuz: “Heijvunz cungj dwg sien dawz laeuj ndei daeuj daih hek gaxgonq, daengj gw gaeuq le, cij dawz gij laeuj yaez he okdaeuj lah. Hoeng, mwngz nej, mwngz dauq dawz gij laeuj ndei he louz daengz gajlaeng!”

¹¹ Yehsuh dawz raemx bienq laeuj dwg de daixit mbat guh gij ndaej cingqmingz naeuz de dwg byawz he, dwg youq aen saengj Gyahliqliq dih aen mbanj heuh Gyahnaz he guh he. Gij saeh neix ndaej yienh ok de miz bonjsaeh luj Cangqdiq; doenghheij lwgsae de raen le couh sinq de lo.

¹² Gij saeh neix goq le, Yehsuh caeuq daxmeh de caeuq daegnuengx de caeuq doengh boux lwgsae de bae Gyahbwznungz Singz, caemh youq mwnq youq geij ngoenz.

Gunghdenq Cangqdiq mbouj dwg hawciengz

¹³ Aen ciet Bienqgoqbae, couh dwg Youzdaiq vunz goq hih aen ciet mwnq, couh ij daengz lo; Yehsuh couh bae Yehluqsajlaengj Singz.

¹⁴ De bae daengz Yehluqsajlaengj baex haeuj doumonz gunghdenq Cangqdiq bae he, couh yawjraen miz vunz youq mwnq hai cwz, hai yiengz, hai roegguqgap, vanzlij yawjraen miz vunz naengh youq mwnq vuenh ngaenz.

¹⁵ De yawjraen yienghneix le, cungj aeuqheiq hwj ij rai bae, couh aeu cag ma dangq guh faexbien hwj boenq doenghheij cwzcwz, yiengzyiengz, vunzvunz okma, vanzlij dawz aen daiz boux baij vuenh ngaenz mwnq lienz daiz lienz ngaenz nyoengx fan byoekbyak liux.

¹⁶ De vanzlij doiq boux hai roegguqgap mwnq naeuz: “Dawz doenghheij doxgaiq neix deuz! Mboujcwnj dawz aen ranz daxboh gou ma dangq guh hawciengz.”

¹⁷ Couh youq mwhneix, doengh boux lwgsae de couh ngeix daengz ndaw Singqgingh ndaw de sij naeuz: Gou vih aen ranz mwngz, ndaw sim gou ndat luj feiz nwih.

¹⁸ Gajlaeng gij vunz mwnq aeuqheiq hwj saemjcam Yehsuh naeuz: “Mwngz miz maz gienzliz boenq gyoengq vunz neix deuz? Mwngz guh gij geizmiuj he okdaeuj hawj gyoengqraeuz ndaej cingqmingz mwngz miz gienz ndaej yienghneix guh lux.”

¹⁹ Yehsuh dingq le, han gyoengqde naeuz: “Faenhsou cek aen gunghdenq neix, gou sam ngoenz ndaw de couh ndaej doiqyungz dawz aen de hwnq hwnjdaeuj.”

²⁰ Gyoengqde dingq le, couh doq buek de naeuz: “Aen gunghdenq neix yienzlaiz yungh baenx seiqcib roek bi cij ndaej hwnq baenz; mwngz sam ngoenz couh ndaej hwnq baenz?”

²¹ Gizsaed gyoengqde gaenhbaenj mbouj rox Yehsuh dwg aeu aen ndangdaej bonjfaenh de ma dangq guh gunghdenq Cangqdiq.

²² Daiqlienz doenghheij lwgsae de cungj daengj daengz de rai le ndaej dauqlix le, cij ngeix daengz gaxgonq de gangj goq hih gawq vah neix. Sojhij gyoengqde engqgya sinq Singqgingh caeuq Yehsuh soj gangj hih vah.

²³ Yehsuh youq Yehluqsajlaengj goq aen ciet Bienqgoqbae hih duenh mwnq, miz haujlai vunz ndaej raen de soj guh hih geizmiuj hih saeh; gyoengqde caemh sinq de dwg Cangqdiq baij daeuj dih vuengz.

²⁴ Hoeng, Yehsuh dauq mij sinq gyoengqde, aenvih de yawj ndaej ok gij vunz dih singqcingz.

²⁵ De caemh mboujyungh hawj vunz naeuz de ni; de cungj ndaej rox daengz ndaw sim vunz.