Yozhanq Saw 19 - Gij Baujcingq Moq Caeuq Geij Bonj Gij Baujcingq Daeuzdaeuz

Yehsuh ngaiz buenqhingz

¹ Gyoengq vunz yienghneix hemq le, Bijlahdoh couh hawj vunz dawz diuz bien ma fad Yehsuh.

² Gyoengq binggyep caiq aeu oen ma san guh aen mauh luj goengjvuengz daenj he hwj daenj hawj Yehsuh, youhcaiq aeu diuz buhbauz raez aeuj he daeuj daenj hawj de,

³ caiq lengx de naeuz: “Youzdaiq vunz dih vuengz vanqseiq hwx!” Yienghneix hemq le, vanzlij caiq mbap de.

⁴ Gajlaeng, Bijlahdoh youhcaiq ok daeuj doiq gyoengq vunzlai naeuz: “Yawj veiq, gou daiq de okdaeuj hawj faenhsou, hawj faenhsou rox, gou caz mbouj raen de miz maz coih.”

⁵ Couh yienghneix, Yehsuh couh ngaiz daenj aen mauh oen he caeuq daenj diuz buhbauz raez aeuj he ok daeuj. Bijlahdoh couh doiq gyoengqde naeuz: “Faenhsou yawj boux vunz neix bax!”

⁶ Yiengq, doenghheij goengjsae dajbwiz caeuq doenghheij souj gunghdenq Cangqdiq baex raen Yehsuh he le, couh hemq naeuz: “Dawz de ding hwnj gwnz gyaq cixcib bae! Dawz de ding hwnj gwnz gyaq cixcib bae!” Bijlahdoh raen yienghneix le, doiq gyoengqde naeuz: “Faenhsou gag ding bax! Aenvih gou caz mbouj raen de miz maz coih haem.”

⁷ Bijlahdoh yienghneix naeuz lo, hoeng, gyoengqde cungj mbouj fug, vanzlij naeuz: “Ciuq gij fazliz gyoengqraeuz, de hab rai, aenvih de gag naeuz bonjfaenh de dwg lwg Cangqdiq.”

⁸ Bijlahdoh dingq gyoengqde yienghneix gangj le, cungj lau hwj ij rai bae.

⁹ De couh majcangq daiq Yehsuh dauq haeuj ndaw saengjfuj maj cam de naeuz: “Mwngz dauqdaej dwg daj mwnqlaw daeuj hax?” Hoeng, Yehsuh dauq mij han de.

¹⁰ Yiengq Bijlahdoh raen Yehsuh mbouj han de le, couh naeuz: “Mwngz vihmaz mbouj han gou? Nanzdauh mwngz mbouj rox gou miz gienz ndaej coengq mwngz, caemh miz gienz ndaej ding mwngz hwnj gwnz gyaq cixcib bae maz?”

¹¹ Yehsuh dingq de yienghneix naeuz le, couh han naeuz: “Hauhnaeuz mbouj dwg Cangqdiq hawj mwngz gij gienz neix nex, mwngz gaenhbaenj mbouj ndaej guenj gou. Sojhij boux buenqduz cuzmaiq gou dawz gou gyau hawj mwngz hih boux mwnq, gij coih boux de engqgya naek.”

¹² Bijlahdoh dingq de yienghneix naeuz le, engqgya ijsiengj coengq de, hoeng, mij banqfaz; gij vunz Youzdaiq engqgya hemq naeuz: “Hauhnaeuz mwngz coengq boux vunz neix nex, couh mbouj dwg Gaijsaj goengjvuengz neix hih baengzyoux lo! Famz gag naeuz bonjfaenh dwg vuengz hih couh dwg Gaijsaj dih dizyinz!”

¹³ Bijlahdoh dingq gyoengq vunz yienghneix hemq naeuz le, de mij banqfaz, ak mbouj goq vunzlai, couh daiq Yehsuh bae daengz mwnq dieg heuh Bu Rin he (gangj vah Hihbwzlaiz dwg heuh Gyahbahdaq he), youq mwnq gaihdingz saemjbuenq Yehsuh.

¹⁴ Yiengq ngoenz mwnq dwg ngoenz cwnjbiq ij goq aen ciet Bienqgoqbae he, daihgaiq gyangjngoenz cingq yienghneix. Bijlahdoh doiq gyoengq vunz Youzdaiq naeuz: “Yawj hax! Goengjvuengz faenhsou hax!”

¹⁵ Gyoengqde raen le, couh hemq oxox naeuz: “Cawz de bae! Cawzcag de bae! Dawz de ding hwnj gwnz gyaq cixcib bae!” Gajlaeng Bijlahdoh cam gyoengqde naeuz: “Faenhsou hawj gou ding goengjvuengz faenhsou hwnj gwnz gyaq cixcib bae haj?” Yiengq doengh goengjsae dajbwiz he han de naeuz: “Cawzok Gaijsaj, gyoengqraeuz mij lingh goengjvuengz hah!”

¹⁶ Gyoengqde cungj yienghneix naeuz lo, guh hwj Bijlahdoh mij banqfaz, couh swhswh gyau Yehsuh hawj gyoengqde, ajcaih gyoengqde dawz de bae ding hwnj gwnz gyaq cixcib bae.

Yehsuh ngaiz ding hwnj gwnz gyaq cixcib

¹⁷ Couh yienghneix, gyoengqde couh daiq Yehsuh bae lo. Yehsuh caemh gag aemq aen gyaq cixcib de bae, bae daengz mwnq dieg heuh Dieg Ndokraeuj he (gangj Hihbwzlaiz vah dwg heuh Gozgozdah).

¹⁸ Gyoengqde couh youq mwnq dawz de ding hwnj gwnz gyaq cixcib bae. Caemh vanzlij miz song boux caemh ngaiz gyoengqde ding hwnj gwnz gyaq cixcib bae, it boux ding youq it mbiengj, Yehsuh ding youq cungqgyan.

¹⁹ Bijlahdoh vanzlij hawj vunz dawz baj baiz he gwnz de sij miz: “Mbanj Nazsajlwz dih Yehsuh, Youzdaiq vunz dih vuengz,” ding hwnj gwnz dingj gyaq cixcib Yehsuh bae.

²⁰ Baj baiz neix gwnz de dwg yungh sam cungj saw ma sij; gwnz de sij miz Hihbwzlaiz saw, Lozmaj saw, Hihlaz saw, sam cungj saw neix. Aenvih ding Yehsuh hih mwnq deixfueng neix dwg gaenh Yehluqsajlaengj Singz he, sojhij miz haujlai Youzdaiq vunz cungj ndaej yawjraen baj baiz neix, caemh rox gij saw gwnz de.

²¹ Yiengq Youzdaiq vunz hih doengh goengjsae dajbwiz mwnq couh doiq Bijlahdoh naeuz: “Mbouj ndaej sij ‘Youzdaiq vunz dih vuengz;’ wnggai sij ‘Boux vunz neix gag naeuz bonjfaenh de dwg Youzdaiq vunz dih vuengz.’”

²² Bijlahdoh dingq le, han naeuz: “Gou haenj sij gijmaz couh sij gijmaz!”

²³ Gij binggyep Lozmaj dawz Yehsuh ding hwnj gwnz gyaq cixcib bae le, couh dawz gwnz ndang de soj daenj hih buh aeu ma faen guh seiq faenh hwj, it boux it faenh, caemhcaiq aeu diuz buhbauz raez de. Diuz buhbauz raez neix dwg yungh vangq boiq dog, couh dwg gwnzlaj vangq boiq dog, mij mwnq doxgap he.

²⁴ Sojhij gyoengqde couh cimciek naeuz: “Gyoengqraeuz mboujyungh mbek diuz de vaih nej; nyaebgaeu aeu ndaej lo, yawj byawz nyaeb ndaej deng diuz de.” Gyoengqde yienghneix guh ngamq lingz ok ndaw Singqgingh ndaw de soj sij hih: Gyoengqde faen aeu gij daenj gou, nipgaeu aeu gij buh gou. Cingqgawq gwhraix, gij binggyep cingqcaen yienghneix guh lo.

²⁵ Mwhde ndwn youq henz gyaq cixcib Yehsuh hih miz daxmeh de caeuq daxheiz de, caeuq Majliqyaq mehyah Gwzlozbaq, caeuq Mbanj Mazdaqlah dih Majliqyaq.

²⁶ Yehsuh yawjraen daxmeh de caeuq boux lwgsae bonjfaenh de haenjheiq he ndwn youq henz de le, couh yinx haeuj laeng boux lwgsae mwnq bae doiq daxmeh de naeuz: “Neq, meh, boux neix couh dwg lwg mwngz!”

²⁷ De yienghneix naeuz le, youhcaiq doiq boux lwgsae mwnq naeuz: “Neq, boux neix dwg daxmeh mwngz.” Daj mwhmwnq hwnj, boux lwgsae mwnq couh daiq daxmeh de maj ranz bonjfaenh de lo.

Yehsuh rai

²⁸ Gajlaeng Yehsuh rox naeuz bonjfaenh de gaenq guh sat gij hong Cangqdiq hawj de guh he lo. Vih ij lingz ok gij vah ndaw Singqgingh, de couh naeuz: “Gou hozhawq lo.”

²⁹ Yiengq ngamqluj youq mwnq miz guenq laeuj he; gyoengqde couh aeu haijmenz ma yomx hwj cug haeuj gaeu nywjvaiz bae, couh dawz ma dwk haeuj vengjbak Yehsuh bae.

³⁰ Yehsuh sup gw le, couh naeuz: “Ox, guh sat lo!” De naeuz gawq neix sat le, couh goemz raeuj gatcaw lo.

³¹ Ngoenz mwnq cingq dwg ngoenz cwnjbiq (couh dwg singhgiz haj), ij daengz ngoenz ngoenzyietbaeg lo. Youq ngoenz ngoenzyietbaeg mwnq mbouj ndaej venj seihaiz, aenvih ngoenz ngoenzyietbaeg mwnq dwg aen ciet Bienqgoqbae hih ngoenz he, dwg ngoenz dwzdwzbez he. Sojhij gij vunz Youzdaiq couh gouz Bijlahdoh, gouz de baij vunz doh raek gij ha doengh boux ding youq gwnz gyaq cixcib mwnq, hawj doengh boux de rai haemq vaiq, ndaej dawz gij seihaiz gyoengqde deuz.

³² Yiengq Bijlahdoh caemh dungziq. Gajlaeng gij binggyep couh dawz song boux caeuq Yehsuh ngaiz ding hih baez boux baez boux doh raek.

³³ Gyoengqde dawz song boux mwnq cungj doh raek le, couh goq bae ij doh Yehsuh, laixlawz raen Yehsuh gaenq rai lo, yiengq couh mij doh raek gij ha de.

³⁴ Hoeng, miz boux binggyep he engq aeu hungzinghcangh ma ndaemq famhdungx de, ndaemq hwj famhdungx de couh doq ok lwed ok raemx okdaeuj.

³⁵ Boux caenra raen gij saeh neix hih boux mwnq caemh cingqmingz goq gij saeh neix hwj. Gij cingqmingz de caemh dwg saedsaeh he; de caemh rox bonjfaenh de soj gangj hih dwg saedsaeh hih. De cingqmingz dwg vih ij hawj faenhsou caemh sinq.

³⁶ Doenghgij saeh gwnz neix ngamqluj lingz ok ndaw Singqgingh ndaw de soj sij naeuz hih: Gij ndok de diuz he cungj mbouj ndaej raek.

³⁷ Ndaw de caemh vanzlij caiq sij miz gawq he: Gyoengqde ij yawj boux ngaiz bonjfaenh gyoengqde ndaemq hih vunz.

Cangq Yehsuh

³⁸ Gajlaeng, Yozswz Yaqliqmajdaiq Singz vunz bae gouz Bijlahdoh, gouz de hawj de lingx gij seihaiz Yehsuh maj. Bijlahdoh caemh hawj; yiengq de couh bae dawz Yehsuh ma. Boux Yozswz neix caemh dwg gij lwgsae Yehsuh, hoeng, de mbouj hawj vunz rox de caemh dwg lwgsae Yehsuh, aenvih de lau gij lingjdauj Youzdaiq.

³⁹ Yiengq miz boux he, gij coh de heuh Nizgohdijmuj, couh dwg boux gaxgonq doengxhaemh bae laeng Yehsuh goq hih boux mwnq, de caemh caeuq Yozswz itheij bae. De daiq gij rang aeu mozyoz caeuq cinzyangh ma doxgyaux he daiq daeuj, daihgaiq daiq miz roekcib gaen yienghneix.

⁴⁰ Song boux de caemh ciuq gij vunz Youzdaiq bienqnaengz moek vunzrai dih guhfap, aeu boiqmaz ma yomx ndei gij rang doxgyaux mwnq hwj, couh gyuj ndei gij seihaiz Yehsuh.

⁴¹ Youq mwnq Yehsuh ngaiz vunz ding hwnj gwnz gyaq cixcib bae hih mwnq, miz aen suen he. Ndaw suen de miz congh moh moq mijyaengz miz vunz coengq goq he.

⁴² Aenvih ngoenz mwnq dwg gij vunz Youzdaiq dih ngoenz cwnjbiq, caiq gyacangq congh moh mwnq caiq gaenh, gyoengqde couh dawz Yehsuh bae mwnq cangq lo.