Yozhanq Saw 18 - Gij Baujcingq Moq Caeuq Geij Bonj Gij Baujcingq Daeuzdaeuz

Yehsuh ngaiz vunz gaemh dawz

¹ Yehsuh doiq Cangqdiq gouzgangj doenghgij vah neix sat le, couh caeuq gyoengq lwgsae de goq Gizlwnz Rij bae aen suen mwnq.

² Yiengq, buenqduz cuzmaiq Yehsuh dih Youzdaq caemh rox mwnq, aenvih Yehsuh siengzseiz daiq gyoengq lwgsae bae mwnq doxcomz.

³ Couh youq mwhneix, Youzdaq daiq baenx gyoengq bing Lozmaj caeuq doengh boux souj gunghdenq Cangqdiq he; doengh boux neix dwg goengjsae dajbwiz caeuq gij vunz gaep haeuj Fazliqcaiq baij he baij daeuj he. Gyoengqde dawz daeng, dawz feiz, dawz giemq hwj daeuj daengz aen suen mwnq.

⁴ Yehsuh rox naeuz bonjfaenh de ij ngaiz roeb daengz gijmaz saeh lo, couh ok daeuj cam gyoengqde naeuz: “Faenhsou cimh byawz?”

⁵ Gyoengqde han naeuz: “Cimh vunz Mbanj Nazsajlwz dih Yehsuh.” Yehsuh dingq le, couh han naeuz: “Gou couh dwg!” (Mwhde buenqduz cuzmaiq Yehsuh Youzdaq caemh ndwn youq mwnq.)

⁶ Mwh Yehsuh ngamq baex naeuz: “Gou couh dwg,” gawq neix he, gyoengqde couh doenq gyaggyag laemx roengz doem bae.

⁷ Gajlaeng Yehsuh caiq cam gyoengqde naeuz: “Faenhsou cimh byawz?” Gyoengqde youhcaiq han naeuz: “Cimh vunz Mbanj Nazsajlwz Yehsuh!”

⁸ Yehsuh dingq le, couh naeuz: “Gou daxbaenh gaenq naeuz sou ni lo, gou couh dwg hah. Hauhnaeuz faenhsou dwg daeuj cimh gou nex, couh hawj doenghheij vunz neix sanq bae bax!”

⁹ Yehsuh yienghneix naeuz ngamqngamq lingz ok gij vah de gaxgonq gangj goq hih: “Boh hax, mwngz nyok hawj gou hih vunz, gou boux he cungj mbouj vwt.”

¹⁰ Couh youq mwhneix, Sihmaenz-Bijdwz couh yot fag giemq raek youq gwnz ndang de okdaeuj, couh doq raemj duj rwz Majlwzguj hih duj rwz baixgvaz de gat. (Majlwzguj dwg bouxhoiq goengjsae dajbwiz daeuzdaeuz he.)

¹¹ Gajlaeng Yehsuh couh doiq Bijdwz naeuz: “Sou fag giemq hwnjdaeuj! Daxboh hawj gou rap hih nanh gou mbouj wnggai rap mah?”

¹² Yiengq Youzdaq daiq daeuj hih buek bing Lozmaj caeuq goeng lienzcangj caeuq doengh boux souj gunghdenq Cangqdiq he couh cug dawz Yehsuh,

¹³ couh gam de bae hawj Yaqnaq. (Yaqnaq dwg goeng boxda Gaihyaqfaz; Gaihyaqfaz dwg bi mwnq hih goengjsae dajbwiz daeuzdaeuz he.

¹⁴ Boux Gaihyaqfaz neix couh dwg boux doiq gij lingjdauj Youzdaiq gangj naeuz goq naeuz: “Boux he dingj gij vunzlai rai dwg miz ndeicawq hih” dih boux mwnq lo.)

Bijdwz mbouj nginh Yehsuh

¹⁵ Yehsuh ngaiz gyoengq vunz mwnq gaemh dawz bae le, Sihmaenz-Bijdwz caeuq daixlingh boux lwgsae couh gaen youq gajlaeng Yehsuh bae. Boux lwgsae neix caeuq goengjsae dajbwiz daeuzdaeuz sug, sojhij de ndaej gaen Yehsuh haeuj ndaw daxhongh goengjsae dajbwiz daeuzdaeuz bae.

¹⁶ Hoeng, Bijdwz dauq ngaiz ndwn youq bakdou rog neix daengj. Gajlaeng boux lwgsae sug goengjsae dajbwiz daeuzdaeuz mwnq ok ma doiq bouxhoiq vunzbaz souj bakdou mwnq gangj gawq vah he, couh daiq Bijdwz haeuj bae.

¹⁷ Yiengq boux vunzbaz mwnq raen yienghneix le, couh cam Bijdwz naeuz: “Mwngz mbouj dwg boux lwgsae boux mwnq maz?” Bijdwz dingq le, engq han naeuz: “Gou mij dwg hah.”

¹⁸ Mwhde dienheiq nit; gyoengq hoiq caeuq doengh boux souj gunghdenq Cangqdiq he caux feiz youq mwnq byoq feiz. Yiengq Bijdwz haeuj bae le, caemh bae ndwn dep gyoengqde byoq feiz.

Yaqnaq saemj Yehsuh

¹⁹ Yehsuh ngaiz daiq bae daengz le, Yaqnaq couh saemjcam Yehsuh, saemjcam de gyoengq lwgsae de hih saeh caeuq saemjcam de son vunz gijmaz.

²⁰ Yiengq Yehsuh couh han naeuz: “Gou liglaiz cungj dwg youq Youzdaiq vunz dih gyauqdangz cixnaeuz youq gunghdenq Cangqdiq son vunz, gaenhbaenj mbouj youq boihgox gangj gijmaz.

²¹ Faenhsou caemh ndaej seizbienh bae cam doenghheij vunz dingq gou gangj vah goq hih hah; gyoengqde gaengjdingq rox gou gangj goq gijmaz vah. Hozbiet cam gou nej?”

²² Yehsuh ngamq gangj gawq vah neix sat bak, ndwn youq henz hih boux souj gunghdenq Cangqdiq he couh fak Yehsuh mbat baqfawz he, naeuz: “Mwngz gingqyienz baenxlai mbeihung, yienghneix han goengjsae dajbwiz daeuzdaeuz!”

²³ Hoeng, Yehsuh dauq cam naeuz: “Hauhnaeuz gou gangj loek gijmaz, mwngz ndaej naeuz daixgya ni gou loek youq mwnqlaw hah. Yiengq, hauhnaeuz gou mbouj loek, mwngz vihmaz ij doh gou nex?”

²⁴ Gannaeuz Yehsuh yienghneix naeuz lah, hoeng, Yaqnaq vanzlij gam de bae hawj Gaihyaqfaz goengjsae dajbwiz daeuzdaeuz neix. Mwhneix Yehsuh vanzlij dwg ngaiz goenj hwj.

Bijdwz vanzlij mbouj nginh Yehsuh

²⁵ Mwhde Sihmaenz-Bijdwz cungj lij youq mwnq byoq feiz. Yiengq miz vunz cam de naeuz: “Mwngz mbouj dwg lwgsae de hajx?” Bijdwz dingq le, couh doq han naeuz: “Gou mbouj dwg hah!”

²⁶ Yiengq bouxhoiq goengjsae dajbwiz daeuzdaeuz he, couh dwg boux caencik boux ngaiz Bijdwz aeu giemq ma raemj gat duj rwz de hih boux caencik de, caemh naeuz: “Gou mbouj dwg raen mwngz caeuq boux mwnq youq ndaw suen hajx?”

²⁷ Bijdwz dingq le, vanzlij mbouj nginh bonjfaenh de dwg caeuq Yehsuh miz gvanhaeh; de caemh naeuz: “Nwjlaw, mij dwg hah!” Bijdwz baex gangj gawq neix he, gaeq couh doq haen lo.

Bijlahdoh saemj Yehsuh

²⁸ Yiengq daengz haetlaeng ranz ij rongh, Youzdaiq vunz dih lingjdauj couh dajlaeng Gaihyaqfaz mwnq gam Yehsuh bae ndaw fuj Lozmaj saengjcangj, hoeng, doenghheij Youzdaiq vunz dih lingjdauj gam Yehsuh bae mwnq, mij saek boux gamj haeuj ndaw fuj Lozmaj saengjcangj bae, hoengjlau bonjfaenh ngaiz suenq dwg mbouj gancengh hwj mbouj ndaej camhgyah gw aen ciet Bienqgoqbae.

²⁹ Sojhij Bijlahdoh saengjcangj couh ok daeuj cam gyoengqde naeuz: “Faenhsou gauq boux neix gauq de gijmaz nej?”

³⁰ Gajlaeng gyoengqde han naeuz: “Hauhnaeuz bouxn'x mbouj guh gijmaz vaihsaeh nex, gyoengqraeuz mbouj veiq daiq de daeuj laeng mwngz dineix hih nej.”

³¹ Bijlahdoh saengjcangj dingq le, couh doiq gyoengqde naeuz: “Faenhsou gag daiq de maj bax; ciuq gij fazliz faenhsou bae saemjbuenq de bax!” Hoeng, gij vunz Youzdaiq dih lingjdauj dauq han naeuz: “Gyoengqraeuz mij'z gienz ndaej buenq hawj vunz rai hah.”

³² Gij neix couh lingz ok gij vah Yehsuh gaxgonq de gangj goq hih bonjfaenh de ij baenzlawz rai hih gawq vah mwnq lo.

³³ Bijlahdoh dingq gyoengq vunz yienghneix gangj le, couh dauq haeuj ndaw saengjfuj maj lo, couh heuh Yehsuh daeuj, saemjcam de naeuz: “Mwngz dwg Youzdaiq vunz hih vuengz hajx?”

³⁴ Yiengq Yehsuh han de naeuz: “Gawq vah neix dwg mwngz gag naeuz hajx, cixnaeuz dwg vunz naeuz mwngz ni hih nej?”

³⁵ Bijlahdoh dingq le, naeuz: “Haex! Ndaek gijn'x dwg gijmaz saeh nex? Gou couh mbouj dwg Youzdaiq vunz vwh. Dwg aen guek mwngz hih vunz caeuq goengjsae dajbwiz gag daiq mwngz daeuj hih lah. Dauqdaej mwngz guh gijmaz vaihsaeh hax?”

³⁶ Yehsuh dingq le, caiq han naeuz: “Aen guek gou mbouj dwg gaep haeuj aen seiqgyaiq neix hih nej; hauhnaeuz aen guek gou dwg gaep haeuj aen seiqgyaiq neix hih nex, gij vunz gou yaengz senqsi cix hwnj daeuj fanjgangq haz, gou caemh mbouj ngaiz gij vunz Youzdaiq gaemh dawz lo. Hoeng, cijmboujgoq aen guek gou mbouj dwg gaep haeuj aen seiqgyaiq neix hih lah.”

³⁷ Bijlahdoh dingq le, couh doq naeuz: “Yiengq mwngz couh dwg vuengz lo?” Bijlahdoh yienghneix naeuz le, Yehsuh couh doq han naeuz: “Dwg hah, gou couh dwg; mwngz naeuz ndaej deng lo. Gou cingq dwg vih yienghneix hwj seng he, caemh dwg vih ij cingqmingz saedsaeh hwj daeuj daengz lajmbwn he. Famz dwg haeuj saedsaeh hih vunz gaengjdingq dingq gij vah gou.”

³⁸ Bijlahdoh caiq cam naeuz: “Gijmaz dwg saedsaeh nej?” De cam gawq neix le, couh ok bae doiq gij vunz Youzdaiq naeuz: “Gou caz mbouj raen de miz gijmaz coih hah.

³⁹ Hoeng, ciuq faenhsou bienqnaengz dih laehbeih, moix it mbat daengz aen ciet Bienqgoqbae he cungj ij hawj gou coengq boux vunzfamh he. Yiengq faenhsou seizneix ij hawj gou coengq boux Youzdaiq vunz dih vuengz neix mah?”

⁴⁰ Bijlahdoh ngamq baex yienghneix naeuz hih lah, hoeng, gyoengq vunzlai cungj hemq oxox naeuz: “Coengq Bahlahbah, mbouj coengq boux mwnq! Coengq Bahlahbah!” Gyoengq vunz cungj yienghneix hemq, hoeng, boux Bahlahbah neix dwg boux auxcied hawj vunz nauh luenh he lah.