Yozhanq Saw 14 - Gij Baujcingq Moq Caeuq Geij Bonj Gij Baujcingq Daeuzdaeuz

Yehsuh dwg roen, dwg saedsaeh, dwg mingh

¹ Yehsuh gangj daengz dineix le, vanzlij caiq doiq gyoengq lwgsae de naeuz: “Faenhsou gaejyungh you; ij sinq Cangqdiq, caemh ij sinq gou.

² Youq ndaw ranz boh gou miz haujlai mwnq youq; hauhnaeuz mbouj miz, gou couh mbouj yienghneix naeuz lo. Gou ij bae mwnq cwnjbiq mwnq youq he hawj faenhsou.

³ Gou bae mwnq cwnjbiq mwnq youq he hawj faenhsou ndei le, gou couh dauq ma ciep faenhsou bae lo. Gou youq mwnqlaw, caemh ij hawj faenhsou youq mwnqlaw.

⁴ Gou ij bae hih dieg mwnq, faenhsou caemh rox diuz roen de.”

⁵ Gajlaeng gyoengq lwgsae ndaw de miz boux heuh Dohmaj he cam de naeuz: “Bouxcawj hax, gyoengqraeuz cungj mbouj rox mwngz ij bae mwnqlaw haem; ij baenz ndaej rox diuz roen mwnq hwj?”

⁶ Yehsuh dingq le, han naeuz: “Gou couh dwg roen, dwg saedsaeh, dwg mingh; hauhnaeuz mbouj dunghgoq gou, mij'z vunz ndaej bae daengz daxboh mwnq.

⁷ Hauhnaeuz faenhsou rox gou, yiengq caemhdangq rox boh gou lo. Daj seizneix hwnj, faenhsou rox de, caemh raen de.”

⁸ Gajlaeng Feihliz gouz de naeuz: “Bouxcawj hax, gouz mwngz hawj raeuz raen daxboh bax, hawj gyoengqraeuz ndaej raen naj de, gyoengqraeuz caemh rox gaeuq lo.”

⁹ Yehsuh dingq le, couh doiq Feihliz naeuz: “Feihliz, gou caeuq faenhsou youq baenxlai caez lo, mwngz vanzlij mbouj rox gou haj? Byawz yawjraen gou hih couh dwg yawjraen daxboh lo. Mwngz vihmaz vanzlij naeuz: ‘Hawj raeuz raen daxboh veiq’ nej?

¹⁰ Nanzdauh mwngz mbouj sinq gou caeuq boh dwg dangq boux he, boh gou caeuq gou caemhdangq dwg boux he haj? Gou doiq faenhsou soj gangj hih vah mbouj dwg ciuq gij cawjeiq gou ma gangj law, dauq dwg daxboh youq ndaw sim gou hawj gou gangj lah; de dunghgoq gou daeuj guh gij hong de lah.

¹¹ Gou naeuz, gou caeuq boh caemhdangq dwg boux he; boh caeuq gou caemhdangq dwg boux he. Cungjsuenq naeuz faenhsou mbouj sinq gou gangj hih gij vah neix hwjx, caemh wnggai sinq sou yawjraen gou soj guh hih saeh hah.

¹² “Gou saedsaeh naeuz sou ni, sinq gou hih vunz, gou soj guh hih saeh, de caemh guh; mbouj danhcij naeuz yienghneix, vanzlij guh gij saeh engqgya hung he, aenvih gou ij maj laeng daxboh mwnq bae lo.

¹³ Hauhnaeuz faenhsou hij gij coh gou ma gouz, mboujguenj gouz gijmaz, gou cungj dapwngq hawj faenhsou gijmaz. Yienghneix gou guh lwg hih couh ndaej hawj boh najrongh lo.

¹⁴ Hauhnaeuz faenhsou hij gij coh gou ma gouz hih, gou cungj dapwngq hawj faenhsou.”

Dapwngq nyok Hoenzsaenz Cangqdiq

¹⁵ Yehsuh vanzlij caiq doiq gyoengq lwgsae de naeuz: “Hauhnaeuz faenhsou aiq gou nex, couh ij wnggai soenhsouj gij mingqlingq gou.

¹⁶ Yiengq gou couh gouz daxboh, gouz de baij daixlingh boux ndaej bang he daeuj hawj faenhsou, daeuj seiqseiz caeuq faenhsou youq.

¹⁷ Boux neix couh dwg heuh miz saedsaeh dih Hoenzsaenz. Aen seiqgyaiq neix hih vunz mbouj ndaej couh de, aenvih gyoengqde yawj mbouj raen de, caemh mbouj rox de. Hoeng, faenhsou rox de hah, aenvih de siengzseiz caeuq faenhsou youq, caemh ij doz youq gwnz ndang faenhsou.

¹⁸ “Gou gaengjdingq ij dauq ma faenhsou dineix, mbouj vwt faenhsou hawj faenhsou bienqbaenz lwggyax law.

¹⁹ Goq mbouj geijlwh caez, gij vunz mbouj caiq raen gou haem lo, hoeng, faenhsou dauq ndaej raen gou, aenvih gou ij dauqlix, faenhsou caemh ij ndaej dauqlix.

²⁰ Daengz ngoenz mwnq, faenhsou couh rox, gou caeuq daxboh gou youq, faenhsou caeuq gou youq, gou caeuq faenhsou youq.

²¹ “Famz dingq gij mingqlingq gou, caemh ciuq gij mingqlingq gou bae guh hih, couh dwg aiq gou hih vunz lo. Aiq gou hih vunz, boh gou caemh aiq de; gou caemh aiq de. Mbouj danhcij yienghneix, gou vanzlij yienh hawj de raen.”

²² Yehsuh gangj daengz dineix le, Youzdaq (dineix dih Youzdaq mbouj dwg boux cuzmaiq Yehsuh hih Youzdaq) de cam Yehsuh naeuz: “Bouxcawj hax, vihmaz caenhgag yienh hawj gyoengqraeuz raen, mbouj yienh hawj gij vunz lajmbwn raen nej?”

²³ Yehsuh han naeuz: “Aiq gou hih vunz gaengjdingq ciuq gij vah gou bae guh; boh gou caemh gaengjdingq aiq de. Mbouj danhcij yienghneix, boh gou caeuq gou caemh caeuq de youq.

²⁴ Mbouj aiq gou hih vunz couh mbouj ciuq gij vah gou bae guh. Faenhsou dingq daengz gou soj gangj hih cungj mbouj dwg ciuq gij cawjeiq bonjfaenh gou ma gangj, dauq dwg ciuq gij cawjeiq baij gou daeuj hih daxboh gangj lah.

²⁵ “Gou vanzlij caeuq sou youq hih mwhde, gou gaenq gangj naeuz sou ni goq doenghgij vah neix lo.

²⁶ Hoeng, ndaej bang vunz dih Hoenzsaenz, couh dwg daxboh vih gou hwj ij baij daeuj hih Hoenzsaenz, de ij dawz sojmiz hih saeh cungj naeuz sou ni liux, vanzlij hawj faenhsou ndaejgeiq gou doiq faenhsou soj gangj hih.

²⁷ “Gou louz gij bingzan gou nyok hawj faenhsou. Gou nyok bingzan hawj faenhsou hih caeuq gij vunz nyok hawj faenhsou hih bingzan mbouj doxdoengz. Faenhsou gaejyungh you, caemh gaejyungh lau.

²⁸ Gou doiq faenhsou gangj goq: ‘Gou ij bae laeng daxboh, hoeng, gou vanzlij ij dauq ma.’ Hauhnaeuz faenhsou cingqcaen aiq gou nex, couh wnggai vuenvuen heijheij, aenvih gou ij bae laeng daxboh; de ak goq gou.

²⁹ Gou youq gij saeh neix mijyaengz fatseng cihsenz, gou sien naeuz sou ni, muzdiz dwg ij hawj faenhsou daengz mwh gij saeh neix fatseng hih mwhde sinq.

³⁰ “Gou mbouj miz geijlwh cizgyenh ndaej caeuq faenhsou gangj haem lo, aenvih aen seiqgyaiq neix hih vuengz couh ij daeuj lo, hoeng, de mij'z gienz guenj gou law.

³¹ Vih ij hawj aen seiqgyaiq neix hih vunz rox gou aiq boh, boh hawj gou guh gijmaz, gou couh guh gijmaz.” Yehsuh gangj daengz dineix le, vanzlij caiq naeuz: “Daeuj, daengj gyoengqraeuz bae bax.”